రాజమహేంద్రవరం వద్ద అఖండ గోదావరి ప్రాజెక్ట్‌కు జూన్ మొదటి వారంలో డిప్యూటీ సీఎం పవన్ కల్యాణ్ శంకుస్థాపన చేయనున్నారని రాష్ట్ర మంత్రి దుర్గేశ్ తెలిపారు. ఈ ప్రాజెక్టు ద్వారా గోదావరి పుష్కరాల (Godavari Pushkaralu) నాటికి తీర ప్రాంతాలను పర్యాటక కేంద్రాలుగా అభివృద్ధి చేయాలని ప్రభుత్వం లక్ష్యంగా పెట్టుకుంది. 2027 గోదావరి పుష్కరాల నేపథ్యంలో ఈ ప్రాజెక్టుకు ప్రాధాన్యత ఇవ్వడం జరుగుతోంది.
రూ.97 కోట్ల వ్యయంతో పర్యాటక అభివృద్ధి
ఈ ప్రాజెక్టు తొలి దశకు సంబంధించిన టెండర్లు ఇప్పటికే పూర్తయ్యాయని మంత్రి తెలిపారు. మొత్తం రూ.97 కోట్ల వ్యయంతో ఈ ప్రాజెక్టును నిర్మించనున్నారు. రాజమహేంద్రవరం, ధవళేశ్వరం, కడియం, కొవ్వూరు, నిడదవోలు వంటి ప్రాంతాల్లో పర్యాటక ఆకర్షణలు, అభివృద్ధి పనులు చేపట్టబోతున్నారు. నదీ తీర ప్రాంతాల్లో వాకింగ్ ట్రాక్‌లు, ప్రకృతి దృశ్యాలు, నావికాశాఖకు సంబంధించిన అవకాశాలు ఏర్పాటు చేయనున్నట్లు వెల్లడించారు.
ఇతర పర్యాటక ప్రాజెక్టులు కూడా ప్రారంభం
గోదావరి ప్రాజెక్టుతో పాటు రాష్ట్రంలోని ఇతర ముఖ్య పర్యాటక ప్రదేశాల అభివృద్ధి పనులు కూడా త్వరలోనే ప్రారంభం కానున్నాయని మంత్రి తెలిపారు. ముఖ్యంగా కడప జిల్లా గండికోట, గుంటూరు జిల్లా సూర్యలంక బీచ్ అభివృద్ధికి సంబంధించిన పనులు ప్రారంభానికి సిద్ధంగా ఉన్నాయని చెప్పారు. పర్యాటక రంగాన్ని బలోపేతం చేసి రాష్ట్ర ఆదాయ వనరులను పెంచాలన్నదే ప్రభుత్వ ధ్యేయమని మంత్రి దుర్గేశ్ (Minister Durgesh) స్పష్టం చేశారు.
Read Also : Tooth Brush: ప్రతి మూడు నెలల ఒకసారి టూత్ బ్రష్ ని మార్చాల్సిందే
