ఫోన్ ట్యాపింగ్ కేసులో కీలక మలుపు
తెలంగాణ రాజకీయాల్లో గత కొన్ని వారాలుగా కలకలం రేపుతున్న ఫోన్ ట్యాపింగ్ (Phone Tapping) కేసులో మరో కీలక పరిణామం చోటుచేసుకుంది. ఈ కేసుకు సంబంధించి కేంద్ర హోంశాఖ సహాయమంత్రి, కరీంనగర్ ఎంపీ బండి సంజయ్ను (Bandi Sanjay) విచారణకు పిలవనున్నట్టు సమాచారం. శుక్రవారం సాయంత్రం సిట్ అధికారులు బండి సంజయ్కు ఫోన్ చేసి, “మీ ఫోన్ కూడా ట్యాప్ (Phone Tap) అయ్యిందని మాకు ఆధారాలు లభించాయి. దయచేసి విచారణకు సిద్ధంగా ఉండండి,” అంటూ తెలియజేశారని తెలుస్తోంది. దీంతో ఈ వ్యవహారంపై తెలంగాణ రాజకీయ వర్గాల్లో తీవ్ర ఉత్కంఠ నెలకొంది.
బీఆర్ఎస్ పాలనలోనే ట్యాపింగ్..? సిట్ అధికారుల దూకుడు
గతంలో బీఆర్ఎస్ హయాంలో ఫోన్ ట్యాపింగ్ ఘనంగా అమలైనట్టు ఇప్పటికే అనేక ఆధారాలు వెలుగు చూశాయి. వందలాది ఫోన్ నెంబర్లను ట్యాప్ చేసినట్టు సిట్ దర్యాప్తులో తేలింది. తాజాగా బండి సంజయ్ (Bandi Sanjay) ఫోన్ కూడా ట్యాప్ అయ్యిందని నిర్ధారణ కావడంతో, ఆయనను కీలక సాక్షిగా పరిగణించి వాంగ్మూలం నమోదు చేయాలనే నిర్ణయానికి సిట్ అధికారులు వచ్చారు. ఇప్పటికే బండి సంజయ్ గతంలో అనేక సందర్భాల్లో తాను, తన కుటుంబ సభ్యులు, సిబ్బంది ఫోన్లు ట్యాప్ చేయబడ్డాయని ఆరోపించిన సంగతి తెలిసిందే. ఇప్పుడు ఆయన ఆరోపణలకు న్యాయబద్ధత వస్తోందనే ఊహాగానాలు రాజకీయ వర్గాల్లో చర్చకు దారితీశాయి.
“ట్యాపింగ్ ద్వారా నన్ను లక్ష్యంగా చేసుకున్నారు” – బండి సంజయ్ పాత వ్యాఖ్యలు గుర్తు
ఇదిలా ఉండగా గతంలో బీజేపీ రాష్ట్ర అధ్యక్షుడి హోదాలో ఉన్న బండి సంజయ్ నాటి బీఆర్ఎస్ ప్రభుత్వం హాయాంలో ప్రజా వ్యతిరేక విధానాలపై అనేక ఉద్యమాలు, ఆందోళన కార్యక్రమాలను నిర్వహించారు. దీంతో బీజేపీ కార్యక్రమాలను భగ్నం చేసేందుకు తనతో పాటు కుటుంబ సభ్యుల, వ్యక్తిగత సిబ్బంది ఫోన్లను నాటి ప్రభుత్వం ట్యాపింగ్ చేసింది గతంలో ఆయన ఆరోపించారు. ఫోన్ ట్యాపింగ్ ద్వారా సమాచారం తెలుసుకుని అర్ధరాత్రి సంజయ్ నివాసంపై దాడి చేసి టెన్త్ పేపర్ లీక్ ఆరోపణలతో ఆయన్ను అరెస్ట్ చేశారు పోలీసులు.
రాజకీయ కుట్రల కోణం? కేసీఆర్పై బండి సంజయ్ తీవ్ర విమర్శలు
బండి సంజయ్ తరచూ కేసీఆర్ ప్రభుత్వాన్ని విమర్శిస్తూ, “ఫోన్ ట్యాపింగ్ కేసులు రాజకీయంగా ప్రత్యర్థులను భయపెట్టేందుకు జరిగిన కుట్ర,” అని ఆరోపించారు. కరీంనగర్ ఎంపీ కార్యాలయంలో 317 జీవో సవరణ దీక్షను అడ్డుకునేందుకు ప్రభుత్వం పలు ప్రయత్నాలు చేసినట్టు, ఫోన్ ట్యాపింగ్ కూడా దాని భాగమేనని ఆరోపించారు. ఆయన చేసిన ఆరోపణలు ఇప్పుడు సిట్ వర్గాల నిర్ధారణలతో మరింత బలపడుతున్నట్టు రాజకీయ విశ్లేషకులు అంచనా వేస్తున్నారు.
వాంగ్మూలం కోసం సిట్ సిద్ధం.. బండి సంజయ్ షెడ్యూల్కు అనుగుణంగా విచారణ
శుక్రవారం సాయంత్రం జరిగిన ఫోన్ సంభాషణలో బండి సంజయ్, తన షెడ్యూల్ చూసి సమయం చెబుతానని సిట్ అధికారులకు తెలిపినట్టు సమాచారం. తదుపరి ఒకటి రెండు రోజుల్లో ఆయనకు అధికారిక నోటీసులు (Official Notices)జారీ చేసి విచారణకు పిలవనున్నారు. బండి సంజయ్ వాంగ్మూలం ఈ కేసులో కీలకంగా మారే అవకాశం ఉంది. దీనిపై ఆయన ఏమి చెబుతారు, దర్యాప్తుకు ఏవిధంగా సహకరిస్తారు అనే దానిపై సర్వత్రా ఉత్కంఠ నెలకొంది.
తెలంగాణలో వేడెక్కుతున్న రాజకీయ వాతావరణం
ఈ కేసు నేపథ్యంలో బీఆర్ఎస్ పూర్వవైభవంపై విమర్శలు మళ్లీ పునరుజ్జీవింపబడుతున్నాయి. బండి సంజయ్ వాంగ్మూలం బయటపడితే మరిన్ని రాజకీయ పీటలు శిథిలమవుతాయనే ఊహలు వినిపిస్తున్నాయి. సిట్ దర్యాప్తు ఇంకా వేగం పుంజుకునే అవకాశముంది. ఫోన్ ట్యాపింగ్ అంశం మళ్లీ కేంద్ర రాజకీయాల్లోకి చొచ్చుకుపోతుందా? అనే ప్రశ్నపై దేశవ్యాప్తంగా దృష్టి కేంద్రీకృతమవుతోంది.
Read also: Padi Kaushik Reddy: బీఆర్ఎస్ ఎమ్మెల్యే పాడి కౌశిక్ రెడ్డి అరెస్ట్
