కలియుగ దైవం శ్రీ వేంకటేశ్వర స్వామి సేవలో పాల్గొనే సేవకులకు తిరుమల తిరుపతి (Tirumala Tirupati) దేవస్థానం (టీటీడీ) (TTD) మరో కీలక నిర్ణయం తీసుకుంది. భక్తులకు మరింత మెరుగైన సేవలందించాలనే లక్ష్యంతో, వాలంటీర్లకు ప్రత్యేక శిక్షణా మాడ్యూల్‌ను అందుబాటులోకి తెచ్చింది.ఐఐఎం అహ్మదాబాద్ వంటి ప్రముఖ విద్యాసంస్థల సహకారంతో రూపొందించిన ఈ మాడ్యూల్‌ను బుధవారం అన్నమయ్య భవనంలో ఆవిష్కరించారు. ఈ కార్యక్రమాన్ని టీటీడీ ఛైర్మన్ బీఆర్‌ నాయుడు, ఈఓ శ్యామలరావు, అదనపు ఈఓ వెంకయ్య చౌదరి కలిసి ప్రారంభించారు.ఈ సందర్భంగా బీఆర్‌ నాయుడు మాట్లాడుతూ, సీఎం చంద్రబాబు ఆదేశాల మేరకు శ్రీవారి సేవ వ్యవస్థలో మార్పులు తెస్తున్నామని తెలిపారు. 2000లో ప్రారంభమైన ఈ సేవ ద్వారా ఇప్పటివరకు 17 లక్షల మంది వాలంటీర్లు సేవలందించారని గుర్తుచేశారు. ప్రస్తుతం రోజుకు 3,500 మంది వివిధ విభాగాల్లో సేవ చేస్తారని వివరించారు.
డిజిటల్ శిక్షణ సౌకర్యం
ఇకపై సేవకులు, గ్రూప్ సూపర్‌వైజర్లు నిరంతరం శిక్షణ పొందేలా టీటీడీ వెబ్‌సైట్‌లో ప్రత్యేక ‘ట్రైనర్ మాడ్యూల్’ను అందుబాటులోకి తెచ్చారు. ఈ మాడ్యూల్ రూపకల్పనలో ఐఐఎం అహ్మదాబాద్‌తో పాటు ప్రభుత్వ ప్రణాళిక విభాగం కూడా పాలుపంచుకుందని అధికారులు తెలిపారు.సేవలతో పాటు భక్తులకు నాణ్యమైన ఆహారాన్ని తక్కువ ధరలకు అందించడంపై టీటీడీ ప్రత్యేక శ్రద్ధ చూపుతోంది. ఇటీవల తిరుమలలోని ఐదు జనతా, ఐదు బిగ్ క్యాంటీన్ల కేటాయింపులో పూర్తిస్థాయి పారదర్శకత పాటించినట్లు ఈఓ శ్యామలరావు చెప్పారు.
పారదర్శక హోటల్ ఎంపిక
కేటాయింపుల కోసం కొత్త పాలసీ రూపొందించామని, నిపుణుల కమిటీ పరిశీలన తర్వాతే బ్రాండెడ్ హోటళ్లను ఎంపిక చేశామని అధికారులు వివరించారు. ఆహార నాణ్యత, ధరల విషయంలో నిబంధనలు తప్పనిసరిగా పాటించాల్సిందేనని స్పష్టం చేశారు.నిబంధనలు ఉల్లంఘించిన హోటళ్లకు కేటాయించిన లైసెన్సులను వెంటనే రద్దు చేస్తామని అధికారులు హెచ్చరించారు. భక్తుల సేవలో ఎలాంటి రాజీ ఉండదని, నాణ్యత విషయంలో ఎలాంటి తగ్గింపు ఉండదని స్పష్టంచేశారు.శ్రీవారి సేవలో భాగమైన ప్రతి వాలంటీర్ సమర్థవంతంగా పని చేయాలనే ఉద్దేశంతో ఈ సంస్కరణలు చేపట్టినట్లు టీటీడీ తెలిపింది. శిక్షణతో పాటు ఆహార నాణ్యత నియంత్రణ భక్తుల అనుభవాన్ని మరింత మెరుగుపరుస్తుందని అధికారులు నమ్ముతున్నారు.
Read Also :
