హైబ్రిడ్ రోడ్లు తెలంగాణ రహదారులకు మంచి రోజులు

తెలంగాణ రహదారులకు కొత్త ఒరవడి – హైబ్రిడ్ రోడ్లు ప్రవేశం

తెలంగాణ రాష్ట్ర రహదారులకు మంచి రోజులు రాబోతున్నాయి. ఇంతకాలం గుంతలు, గతుకుల రోడ్లతో ఇబ్బందులు పడ్డ వాహనదారులు ఇకపై ప్రశాంతంగా తమ ప్రయాణాన్ని కొనసాగించే అవకాశాలు కనిపిస్తున్నాయి. అత్యంత నూతన విధానమైన హైబ్రిడ్ రోడ్లు (హ్యాం మోడల్) విధానాన్ని రాష్ట్ర ప్రభుత్వం అమలు చేయడానికి రంగం సిద్ధం చేస్తోంది. హైబ్రిడ్ రోడ్లు నిర్మాణం ద్వారా త్వరితగతిన నాణ్యమైన రోడ్లు అందుబాటులోకి తీసుకురావాలని ప్రభుత్వం భావిస్తోంది.

హ్యామ్ విధానం – కొత్త శకం

హైబ్రిడ్ యాన్యుటీ మోడల్ (హ్యామ్) నిర్మాణ రంగంలో అత్యంత ఆధునికమైన విధానం. మునుపటి రోడ్ల నిర్మాణ విధానాల కంటే ఈ పద్ధతి మెరుగైన ఫలితాలు ఇస్తోంది. ఇప్పటికే కేంద్ర ప్రభుత్వం జాతీయ రహదారుల సంస్థ ద్వారా ఈ విధానాన్ని అమలు చేసి మంచి ఫలితాలు సాధించింది. మహారాష్ట్రలో కూడా గత రెండు సంవత్సరాలుగా ఈ విధానం అమలులో ఉండి విజయవంతమైంది. తెలంగాణ ప్రభుత్వం నుంచి మంత్రులతో పాటు అధికార బృందం మహారాష్ట్ర వెళ్లి ఈ విధానం ఎలా పనిచేస్తుందో అధ్యయనం చేసింది.

ఇంతకుముందు అమలైన రోడ్ల నిర్మాణ విధానాలు

1. EPC (ఇంజనీరింగ్, ప్రొక్యూర్మెంట్, కన్స్ట్రక్షన్) విధానం

   – గుత్తేదారు రూపాయి కూడా పెట్టకుండానే ప్రభుత్వం నిధులు అందించే విధానం. అయితే, ఈ పద్ధతిలో ఆర్థిక భారం పూర్తిగా ప్రభుత్వంపైనే ఉండేది.

2. PPP (పబ్లిక్ ప్రైవేట్ పార్టనర్షిప్) విధానం :

   గుత్తేదారే మొత్తం నిధులు సమకూర్చాల్సి ఉండేది. కానీ, అవసరమైన పెట్టుబడి సమకూర్చడం కష్టంగా మారేది.
   హ్యామ్ మోడల్ఉత్తమమైనదిగా భావిస్తున్నారు.

ఈ రెండు పద్ధతులలో అనేక ఇబ్బందులు ఎదురైన నేపథ్యంలో హ్యామ్ మోడల్ ఉత్తమమైనదిగా భావిస్తున్నారు.

హ్యామ్ విధానం విశేషాలు

• 40% నిధులను ప్రభుత్వం అందిస్తుంది, 60% నిధులు గుత్తేదారు సమకూర్చాలి.
• ఈ విధానం ద్వారా ఇద్దరి మధ్య పరస్పర అవగాహన ఏర్పడుతుంది.
• ప్రాజెక్టులు త్వరగా పూర్తి అయ్యే అవకాశం ఉంటుంది.
• మిగతా 60% మొత్తం వాయిదాల పద్ధతిలో గుత్తేదారికి తిరిగి చెల్లించబడుతుంది.
• దీనివల్ల ప్రభుత్వంపై ఒక్కసారిగా భారీ ఆర్థిక భారం పడదు.

1000 కోట్లతో ప్రయోగాత్మక ప్రాజెక్టు

ప్రస్తుతం రాష్ట్ర ప్రభుత్వం రూ.1000 కోట్లతో హ్యామ్ మోడల్ రోడ్ల నిర్మాణాన్ని ప్రయోగాత్మకంగా ప్రారంభించాలని నిర్ణయించింది. ఈ ప్రాజెక్టును మూడు విభాగాలుగా విభజించారు:

1. గ్రామీణ ప్రాంతాల నుంచి మండల కేంద్రాలకు రోడ్లు.
2. మండల కేంద్రాల నుంచి జిల్లా కేంద్రాలకు రోడ్లు.
3. జిల్లా కేంద్రాల నుంచి రాజధానికి అనుసంధానించే రోడ్లు.

టోల్ టాక్స్ ద్వారా నిధుల వసూలు

ఈ మోడల్‌లో గుత్తేదారు పెట్టుబడి పెట్టిన 60% మొత్తాన్ని టోల్ టాక్స్ ద్వారా తిరిగి పొందే అవకాశం ఉంది. అయితే, గ్రామీణ ప్రాంతాల్లో టోల్ వసూలు చేయడం ప్రజలకు ఎంతవరకు ఆమోదయోగ్యమో అనుమానాలు ఉన్నప్పటికీ, మెరుగైన రహదారులతో ప్రయాణ సమయం తగ్గుతుందని ప్రభుత్వం నమ్ముతోంది. ద్విచక్ర వాహనదారులకు మినహాయింపు ఇవ్వడంతో, లారీలు, పెద్ద వాహనాల నుంచి మాత్రమే టోల్ వసూలు చేయనున్నారు.

హ్యామ్ రోడ్ల ప్రయోజనాలు

• త్వరిత రహదారుల అభివృద్ధి– సాధారణంగా ఆలస్యమయ్యే రహదారుల ప్రాజెక్టులు వేగంగా పూర్తవుతాయి.
• ప్రభుత్వ ఖర్చు తగ్గింపు –పెద్ద మొత్తంలో నిధులను ఒక్కసారిగా విడుదల చేయాల్సిన అవసరం ఉండదు.
• రోడ్ల నాణ్యత మెరుగుదల – ఉత్తమ ప్రమాణాలతో రోడ్లు నిర్మించబడతాయి.
• వాహనదారులకు ప్రయోజనం – సమయంతో పాటు వాహనాల నిర్వహణ ఖర్చు తగ్గుతుంది.

రాష్ట్ర మంత్రివర్గం దృష్టి

హ్యామ్ రోడ్ల ప్రాజెక్టుపై రవాణా శాఖ మంత్రి కోమటిరెడ్డి వెంకట్ రెడ్డి ప్రత్యేక దృష్టి పెట్టారు. ఇప్పటికే అధికారులతో మూడు సార్లు సమీక్ష నిర్వహించి, పనులను త్వరగా ప్రారంభించాలని ఆదేశించారు. ప్రాథమిక దశలో 1000 కోట్లతో అమలు చేసి, విజయవంతమైతే మరిన్ని నిధులు కేటాయించేందుకు ప్రభుత్వం సిద్ధంగా ఉంది.

ఈ విధానం ద్వారా తెలంగాణ రహదారులు మరింత మెరుగుపడతాయని, ప్రయాణం సాఫీగా సాగుతుందని ప్రభుత్వం భావిస్తోంది.