దేశవ్యాప్తంగా హోలీ వేడుకలు ఘనంగా జరుగుతున్నాయి. చిన్నా – పెద్దా తేడా లేకుండా ప్రతి ఒక్కరూ రంగుల పండుగను ఉత్సాహంగా జరుపుకుంటున్నారు. మిత్రులు, కుటుంబ సభ్యులు, పొరుగు వారితో కలిసి హోలీ పండుగను ఆనందంగా జరుపుకుంటూ రంగులు చల్లుకుంటున్నారు. ప్రధానంగా ఉత్తర భారతదేశంలో ఈ వేడుకలకు ప్రత్యేక స్థానం ఉంది. అయితే, గత కొన్ని సంవత్సరాలుగా దక్షిణ భారతదేశంలోనూ హోలీకి విశేషమైన గుర్తింపు పెరుగుతోంది.
సీఎం రేవంత్ రెడ్డి హోలీ శుభాకాంక్షలు
తెలంగాణ ముఖ్యమంత్రి రేవంత్ రెడ్డి హోలీ సందర్భంగా ప్రజలకు శుభాకాంక్షలు తెలిపారు. ‘ఎక్స్’ (ట్విట్టర్) వేదికగా తన సందేశాన్ని పంచుకుంటూ, “సప్తవర్ణ శోభితం.. సకల జనుల సంబరం.. ప్రజలందరికీ హోలీ శుభాకాంక్షలు” అంటూ ట్వీట్ చేశారు. హోలీ పండుగ అందరి జీవితాల్లో సంతోషాన్ని నింపాలని, ఆనందోత్సాహాలతో జరుపుకోవాలని ఆకాంక్షించారు. హోలీ పండుగ సందర్భంగా పలు నగరాల్లో పోలీసులు ప్రత్యేక భద్రతా ఏర్పాట్లు చేశారు. ముఖ్యంగా అసాంఘిక కార్యకలాపాలను నిరోధించేందుకు ముందస్తు జాగ్రత్తలు తీసుకున్నారు. మద్యం మత్తులో డ్రైవింగ్ చేయొద్దని, మహిళలపై అసభ్య ప్రవర్తనతో సంబరాలు పాడుచేయొద్దని పోలీసులు హెచ్చరించారు. హోలీ సందర్భంగా జల్లెడ నిర్వహించనున్నట్లు అధికారులు ప్రకటించారు. హోలీ పండుగ ప్రధానంగా రెండు రోజుల పాటు జరుపుకుంటారు. మొదటి రోజు హోలీకా దహనం (చిట్టి వేడుక) నిర్వహిస్తారు. రెండో రోజు రంగుల హోలీ జరుపుకుంటారు. మైత్రి, స్నేహానికి హోలీ ప్రతీకగా నిలుస్తుంది. ఈ సందర్భంగా కుటుంబసభ్యులు, స్నేహితులు పరస్పరం రంగులు చల్లుకుని శుభాకాంక్షలు చెప్పుకుంటారు.
