Medak Municipal Elections 2026: మెదక్ పాలిటిక్స్లో మారుతున్న సమీకరణాలు మెదక్ జిల్లాలో మున్సిపల్ ఎన్నికల నగారా మోగకముందే రాజకీయ సమీకరణాలు వేగంగా మారిపోతున్నాయి. ఇప్పటికే అధికార కాంగ్రెస్ పార్టీకి జిల్లా కేంద్రంలో గట్టి ఎదురుదెబ్బలు తగిలాయి. సీనియర్ నాయకులు ఒక్కొక్కరుగా పార్టీని వీడి ‘కారు’ ఎక్కుతుండటంతో కాంగ్రెస్ శ్రేణుల్లో ఆందోళన మొదలైంది. జిల్లాలోని నాలుగు మున్సిపాలిటీలను కైవసం చేసుకుంటామని ధీమాగా ఉన్న అధికార పార్టీకి, క్షేత్రస్థాయిలో సీనియర్ నేతల నిష్క్రమణ పెద్ద సవాల్గా మారింది.
Read Also: TG Politics: కేసీఆర్ పాలనలో సాగు విస్తీర్ణం పెరిగిందన్న హరీశ్ రావు
కాంగ్రెస్కు కోలుకోలేని దెబ్బ: సుప్రభాత్ రావు కారెక్కడం
రామాయంపేట రాజకీయాల్లో తనదైన ముద్ర వేసిన సీనియర్ నాయకుడు సుప్రభాత్ రావు కాంగ్రెస్ను వీడటం జిల్లా రాజకీయాల్లో సంచలనం సృష్టించింది. అసెంబ్లీ ఎన్నికల్లో పార్టీ విజయం కోసం అహర్నిశలు కృషి చేసిన ఆయన, కీలక సమయంలో హస్తం వీడి బీఆర్ఎస్లో చేరడం పార్టీకి తీరని లోటు. పార్టీకి కరుడుకట్టిన కార్యకర్తగా, నమ్మకమైన నాయకునిగా గుర్తింపు పొందిన ఆయన నిర్ణయం కాంగ్రెస్ను ఆత్మరక్షణలో పడేసింది.
12 వార్డులపై ప్రభావం – రామాయంపేటలో బీఆర్ఎస్ జోష్
రామాయంపేట మున్సిపాలిటీలో మొత్తం 12 వార్డులు ఉండగా, అందులో సుమారు 8 వార్డుల్లో చౌదరి సుప్రభాత్ రావుకు వ్యక్తిగతంగా బలమైన పట్టు ఉంది. ఆయన మాటకు ఆయా వార్డుల్లో ప్రత్యేకమైన బరువు ఉండటంతో, రానున్న ఎన్నికల్లో ఈ ప్రభావం స్పష్టంగా కనిపించనుంది. ముఖ్యంగా కీలక ఓటు బ్యాంకును బీఆర్ఎస్ వైపు మళ్లించడంలో ఆయన పాత్ర కీలకం కానుందని రాజకీయ విశ్లేషకులు భావిస్తున్నారు.
అంతర్గత విభేదాలు – కాంగ్రెస్ శిబిరంలో నిశ్శబ్దం
ప్రస్తుతం మెదక్(Medak Municipal Elections 2026) కాంగ్రెస్లో నిశ్శబ్ద వాతావరణం నెలకొంది. అభ్యర్థుల ఎంపికలో నెలకొన్న విభేదాలు, ప్రచార వ్యూహాల్లో స్పష్టత లేకపోవడం పార్టీని ఇబ్బందుల్లోకి నెట్టాయి. సుప్రభాత్ రావు చేరికపై స్థానిక నాయకత్వం ఇప్పటివరకు అధికారికంగా స్పందించనప్పటికీ, అంతర్గతంగా మాత్రం అసహనం వ్యక్తమవుతోంది. మరికొందరు నేతలు కూడా ఇదే బాటలో పయనిస్తారన్న ప్రచారం కాంగ్రెస్ అధిష్టానానికి కొత్త తలనొప్పులు తెచ్చిపెడుతోంది.
డిఫెన్స్లో కాంగ్రెస్.. అటాకింగ్లో బీఆర్ఎస్
మున్సిపల్ ఎన్నికల బరిలో బీఆర్ఎస్ దూకుడుగా ప్రచారాన్ని కొనసాగిస్తోంది. ఈ చేరికతో అధికార పార్టీ కాంగ్రెస్ ఒక్కసారిగా డిఫెన్స్లోకి వెళ్లగా, విపక్ష బీఆర్ఎస్ రెట్టింపు ఉత్సాహంతో ముందుకు వెళ్తోంది. రామాయంపేట మున్సిపాలిటీపై పట్టు సాధించేందుకు బీఆర్ఎస్ వేస్తున్న ఎత్తుగడలు సక్సెస్ అవుతున్నట్లు కనిపిస్తోంది. మరి ఈ రాజకీయ కుదుపుల నుండి కాంగ్రెస్ ఎలా తేరుకుంటుందో వేచి చూడాలి.
Read hindi news: hindi.vaartha.com
Epaper: epaper.vaartha.com
Read Also:
