Mahabubabad News: మహబూబాబాద్‌ బైపాస్ పై అనుమానాస్పద అవయవాలు.. పోలీసుల ఆరా

Mahabubabad News: మహబూబాబాద్ జిల్లాలో ఓ తీవ్ర దిగ్భ్రాంతికరమైన ఘటన వెలుగు చూసింది. రోడ్డు పక్కన మానవ అవయవాలను పోలిన గుండె, లివర్ కనిపించడం స్థానికంగా తీవ్ర కలకలం రేపింది. వివరాల్లోకి వెళ్తే.. జిల్లాలోని చిన్న వంగర బైపాస్ రహదారి వద్ద దారి వెంట గుండె, లివర్‌ను పోలిన అవయవాలు పడి ఉండటాన్ని గమనించిన స్థానికులు భయాందోళనలకు గురయ్యారు. ఏం జరుగుతుందో తెలియక వెంటనే ఈ సమాచారాన్ని స్థానిక పోలీసులకు అందించారు.

Mahabubabad News: పోలీసులు ఆరా: మానవ అవయవాలా? లేక జంతువులవా?

సమాచారం అందుకున్న వెంటనే పోలీసులు హుటాహుటిన ఘటనాస్థలికి చేరుకుని పరిశీలించారు. రహదారి పక్కన పడి ఉన్న ఆ అవయవాలను స్వాధీనం చేసుకుని దర్యాప్తు ప్రారంభించారు. అయితే, అవి నిజంగానే మానవ అవయవాలా? లేక ఏదైనా జంతువుకు సంబంధించిన అవయవాలా? అనే కోణంలో పలు అనుమానాలు వ్యక్తమవుతున్నాయి. ఒకవేళ అవి మానవ అవయవాలే అని తేలితే.. సమీపంలో ఏదైనా దారుణ హత్య జరిగిందా, ఆ తర్వాత శరీరం నుంచి వాటిని వేరు చేసి ఇక్కడ పడేశారా? అనే కోణంలో కూడా పోలీసులు తీవ్రంగా ఆరా తీస్తున్నారు.

నివేదిక తర్వాతే పూర్తి వివరాలు!

అనుమానాస్పదంగా లభ్యమైన అవయవాలను నిపుణుల పరిశీలన, ఫొరెన్సిక్ విశ్లేషణ కోసం తరలించేందుకు అధికారులు చర్యలు చేపట్టారు. సైంటిఫిక్ ఆడిట్ మరియు నిపుణుల పరిశీలన పూర్తయిన తర్వాతే ఆ అవయవాల నిజానిజాలు బయటపడతాయని, పూర్తి వివరాలు వెల్లడిస్తామని పోలీసులు తెలియజేశారు. ఈ ఘటనతో చిన్న వంగర బైపాస్ పరిసర ప్రాంత ప్రజలు భయాందోళనలో మునిగిపోయారు.