తెలంగాణ రాజధాని హైదరాబాద్లోని రాజీవ్ గాంధీ అంతర్జాతీయ విమానాశ్రయం (RGIA) త్వరలోనే భారీ విస్తరణకు సిద్ధమవుతోంది. జి.హెచ్.ఐ.ఎ.ఎల్ (GHIAL), అంటే జీఎంఆర్ హైదరాబాద్ ఇంటర్నేషనల్ ఎయిర్పోర్ట్ లిమిటెడ్, ఈ విస్తరణకు ముందుకొచ్చింది. దాదాపు రూ.14,000 కోట్ల వ్యయంతో ఈ ప్రాజెక్ట్ను చేపట్టేందుకు ప్రణాళికలు సిద్ధం చేశాయి. ప్రయాణికుల సంఖ్య పెరుగుతున్న నేపథ్యంలో అంతర్జాతీయ ప్రమాణాలకు (International Standards) అనుగుణంగా మెరుగైన సౌకర్యాలు కల్పించాలనే లక్ష్యంతో ఈ విస్తరణ చేపడుతున్నారు.హైదరాబాద్, దేశంలోనే వేగంగా అభివృద్ధి చెందుతున్న ఐటీ, ఫార్మా, లాజిస్టిక్స్ కేంద్రంగా మారడంతో అంతర్జాతీయ, దేశీయ ప్రయాణాల డిమాండ్ గణనీయంగా పెరిగింది.
ప్రయాణికుల సౌకర్యార్థం
ఈ నేపథ్యంలో ప్రయాణికులకు మెరుగైన సౌకర్యాలు కల్పించడానికి, భవిష్యత్ అవసరాలకు అనుగుణంగా విమానాశ్రయాన్ని సిద్ధం చేయడానికి విస్తరణ అవసరమని GHIAL గుర్తించింది.ఈ విస్తరణ ప్రణాళికలో భాగంగా ప్రయాణికుల సౌకర్యార్థం ఒక కొత్త టెర్మినల్, విమానాల రాకపోకలను సులభతరం చేయడానికి ఒక అదనపు రన్వే (Run Way)ను నిర్మించబోతున్నట్లు తెలుస్తోంది. ఈ నూతన మౌలిక సదుపాయాలు విమానాశ్రయం కార్యాచరణ సామర్థ్యాన్ని గణనీయంగా పెంచుతాయి. వచ్చే ఏడాది (2026) ప్రారంభంలోనే విస్తరణ పనులను మొదలుపెట్టి 2029 నాటికి వాటిని పూర్తి చేయాలని లక్ష్యంగా పెట్టుకున్నారు.
ఆర్థిక వ్యవస్థపై
ఈ కాలపరిమితిలో పనులు వేగంగా, సమర్థవంతంగా పూర్తి చేయడానికి GHIAL కృషి చేయనుంది.రూ.14,000 కోట్ల భారీ పెట్టుబడి కేవలం మౌలిక సదుపాయాల పెంపుదలకు మాత్రమే పరిమితం కాదు ఇది రాష్ట్ర ఆర్థిక వ్యవస్థపై బహుముఖ సానుకూల ప్రభావాన్ని చూపుతుంది. విమానాశ్రయం విస్తరణ పనుల ద్వారా ప్రత్యక్షంగా పరోక్షంగా (Directly Indirectly) వేలాది మందికి ఉద్యోగావకాశాలు లభిస్తాయి. నిర్మాణ రంగం, లాజిస్టిక్స్, హాస్పిటాలిటీ, ఇతర అనుబంధ పరిశ్రమలకు ఇది ఊతమిస్తుంది. అంతేకాకుండా మెరుగైన వాయు కనెక్టివిటీ పర్యాటక రంగానికి, వాణిజ్య కార్యకలాపాలకు, అంతర్జాతీయ పెట్టుబడులను ఆకర్షించడానికి దోహదపడుతుంది.
అతిపెద్ద ఆర్థిక శక్తుల్లో ఒకటిగా
ఈ విస్తరణ ప్రాజెక్టులో సుస్థిరత అంశాలకు కూడా ప్రాధాన్యత ఇవ్వనున్నట్లు తెలుస్తోంది. పర్యావరణ అనుకూల సాంకేతికతలు, స్మార్ట్ ఎయిర్పోర్ట్ ఫీచర్ల (Smart Airport Features) ను ఉపయోగించి భవిష్యత్ అవసరాలకు ధీటుగా విమానాశ్రయాన్ని తీర్చిదిద్దాలని GMR భావిస్తోంది. రానున్న పదేళ్లలో హైదరాబాద్ దేశంలోనే అతిపెద్ద ఆర్థిక శక్తుల్లో ఒకటిగా మారాలనే లక్ష్యంతో ఈ విమానాశ్రయం విస్తరణ ఒక కీలకమైన సాధనంగా నిలుస్తుంది.
విమానయాన రంగానికి
ఇది హైదరాబాద్ను ప్రపంచ పటంలో మరింత ప్రముఖంగా నిలుపుతుంది.హైదరాబాద్ శంషాబాద్ విమానాశ్రయ విస్తరణ ప్రాజెక్ట్ (Shamshabad Airport Expansion Project) దేశానికి గర్వకారణం కావచ్చు. ఇది ఒక వైపు విమానయాన రంగానికి నూతన దిశ, మరోవైపు తెలంగాణ అభివృద్ధికి మైలురాయిగా నిలవనుంది. అభివృద్ధి చెందుతున్న హైదరాబాద్కు ఇది మరింత ఉత్సాహాన్ని ఇచ్చే అంశం.
Read Also: Charlapalli: ఆంధ్రా నుంచి చర్లపల్లి, లింగపల్లికి ప్రత్యేక రైళ్ల
