తెలంగాణలో యాసంగి (రబీ) సీజన్ సాగు పనులు ముమ్మరంగా సాగుతున్న వేళ, పెట్టుబడి సాయం కోసం రైతులు ‘రైతుభరోసా’ నిధుల వైపు ఆశగా ఎదురుచూస్తున్నారు. గత ప్రభుత్వం అందించిన రైతుబంధు స్థానంలో, ప్రస్తుత ప్రభుత్వం ఎకరానికి రూ. 15,000 (ఏడాదికి) చొప్పున అందిస్తామని హామీ ఇచ్చిన సంగతి తెలిసిందే. ఇందులో భాగంగా యాసంగి కోటా కింద ఎకరానికి రూ. 7,500 పడాల్సి ఉండగా, ప్రస్తుతానికి ఎకరానికి రూ. 6,000 చొప్పున పంపిణీ చేసేందుకు ప్రభుత్వం కసరత్తు చేస్తోంది. అయితే, నిన్న జరిగిన రాష్ట్ర మంత్రివర్గ సమావేశంలో ఈ పథకంపై స్పష్టమైన నిర్ణయం వెలువడుతుందని భావించినప్పటికీ, ఎటువంటి ప్రస్తావన రాకపోవడంతో రైతుల్లో కొంత ఆందోళన నెలకొంది.
CM Revanth : రాములవారి సాక్షిగా చెబుతున్నా తెలంగాణ లో మళ్లీ వచ్చేది మా ప్రభుత్వమే – సీఎం రేవంత్
ఈసారి నిధుల పంపిణీలో పారదర్శకత కోసం ప్రభుత్వం సరికొత్త విధానాన్ని అనుసరిస్తోంది. గతంలో సాగు చేయని భూములకు, కొండలు, గుట్టలకు కూడా నిధులు వెళ్లాయనే విమర్శలు ఉండటంతో, ఈసారి శాటిలైట్ సర్వే (Satellite Survey) ద్వారా కేవలం సాగులో ఉన్న భూములను మాత్రమే గుర్తిస్తున్నారు. రిమోట్ సెన్సింగ్ టెక్నాలజీని ఉపయోగించి ఏ భూమిలో పంట ఉంది, ఏది ఖాళీగా ఉందో నిర్ధారించిన తర్వాతే లబ్ధిదారుల జాబితాను సిద్ధం చేస్తున్నారు. ఈ సర్వే ప్రక్రియ ఇంకా కొనసాగుతుండటమే నిధుల విడుదలలో జాప్యానికి ప్రధాన కారణంగా కనిపిస్తోంది. ఈ సాంకేతిక ప్రక్రియ పూర్తయితేనే అర్హులైన ప్రతి రైతు ఖాతాలోకి నేరుగా నగదు బదిలీ (DBT) అయ్యే అవకాశం ఉంది.
నిధులు ఎప్పుడు విడుదలవుతాయి అనే అంశంపై ప్రభుత్వం ఇప్పటివరకు ఎటువంటి అధికారిక ప్రకటన చేయలేదు. అయితే, క్షేత్రస్థాయి పరిశీలన మరియు శాటిలైట్ సర్వే ప్రక్రియ వేగంగా జరుగుతున్న నేపథ్యంలో, ఫిబ్రవరి ఆఖరులో లేదా మార్చి మొదటి వారంలో రైతుభరోసా నిధులు రైతుల ఖాతాల్లో జమ అయ్యే అవకాశం ఉందని సచివాలయ వర్గాల సమాచారం. బడ్జెట్ కేటాయింపులు మరియు లబ్ధిదారుల వడపోత ప్రక్రియను ప్రభుత్వం అత్యంత జాగ్రత్తగా పర్యవేక్షిస్తోంది. నిధుల విడుదల ఆలస్యమవుతున్న కొద్దీ సాగు పెట్టుబడుల కోసం రైతులు ప్రైవేట్ వడ్డీ వ్యాపారులను ఆశ్రయించాల్సి వస్తోందని, ప్రభుత్వం వీలైనంత త్వరగా స్పష్టత ఇవ్వాలని రైతు సంఘాలు కోరుతున్నాయి.
Read hindi news: hindi.vaartha.com
Epaper : epaper.vaartha.com
