మార్చి 8న జరగనున్న అంతర్జాతీయ మహిళా దినోత్సవాన్ని పురస్కరించుకుని తెలంగాణ ప్రభుత్వం మహిళల సాధికారత కోసం పలు సంక్షేమ కార్యక్రమాలను ప్రకటించనుంది. ముఖ్యంగా మహిళల ఆర్థిక స్వాతంత్య్రాన్ని పెంచేందుకు ముఖ్యమంత్రి రేవంత్ రెడ్డి నేతృత్వంలో ఓ కీలక పథకాన్ని ఆవిష్కరించనున్నారు.
మహిళల ఉపాధిని మెరుగుపరిచే దిశగా ప్రభుత్వం మహిళలకు ఆటో రిక్షాలను అందించనుంది. ప్రభుత్వ శిక్షణ పూర్తి చేసిన మహిళలకు అనుకూల ధరలకు ఆటోలను అందించేందుకు రాష్ట్ర ప్రభుత్వం నూతన కార్యక్రమాన్ని ప్రకటించనుంది. ముఖ్యమంత్రి రేవంత్ రెడ్డి ఈ కార్యక్రమాన్ని హైదరాబాద్‌లో ప్రకటించనున్నారు. మహిళలు స్వయం ఉపాధిని పెంపొందించుకుని, ఆర్థికంగా మరింత బలోపేతం కావడానికి ఇది చక్కటి అవకాశం కానుంది. వ్యాపారం ప్రారంభించాలనుకునే మహిళలకు తక్కువ వడ్డీ రుణాలు అందించేందుకు ప్రభుత్వం కొత్త పథకాలను అమలు చేయనుంది. ఈ రుణాలను రాష్ట్ర స్థాయి బ్యాంకుల ద్వారా అందజేయడం ద్వారా మహిళా పారిశ్రామికవేత్తలకు ఆర్థిక ప్రోత్సాహం కల్పించనున్నారు.
ఇందిరా మహిళ శక్తి-2025 అవిష్కరణ
ఈ దినోత్సవాన్ని పురస్కరించుకుని తెలంగాణ కాంగ్రెస్ ప్రభుత్వం ‘ఇందిరా మహిళ శక్తి – 2025’ అనే కొత్త కార్యక్రమాన్ని ప్రారంభించనుంది. గ్రామీణ మహిళల ఆర్థిక స్థాయిని మెరుగుపరచడానికి ప్రత్యేక నిధులు. మహిళా పారిశ్రామికవేత్తలకు రుణ సదుపాయాలు. స్వయం సహాయక సంఘాల (SHG) అభివృద్ధికి నూతన ప్రణాళికలు. స్వయం ఉపాధి అవకాశాలు, చిన్న స్థాయి వ్యాపారాలను అభివృద్ధి చేయడం ప్రధాన లక్ష్యం. మహిళా వ్యవస్థాపిత వ్యాపారాలకు ప్రోత్సాహం. ఈ ప్రణాళికలపై మంత్రి సీతక్క సమీక్ష సమావేశం నిర్వహించి, అధికారులతో ముఖ్యమైన నిర్ణయాలు తీసుకున్నారు. ఈ కార్యక్రమాల ద్వారా మహిళల ఆర్థిక స్థితిని మెరుగుపరచడమే కాకుండా, వారి సామాజిక స్థాయిని కూడా పెంచాలని ప్రభుత్వం సంకల్పించింది.
సికింద్రాబాద్ పరేడ్ గ్రౌండ్‌లో వైభవంగా వేడుకలు
ప్రధాన అతిథులు: సీఎం రేవంత్ రెడ్డి, ఉప ముఖ్యమంత్రి మల్లూ భట్టి విక్రమార్క, ఇతర ప్రముఖ నేతలు.
మహిళా సమూహాల ద్వారా ఏర్పాటు చేసిన సౌర విద్యుత్ ప్రాజెక్టుల ప్రారంభోత్సవం 32 జిల్లాల్లో 64 మెగావాట్ల సౌర విద్యుత్ కేంద్రాల ప్రారంభోత్సవం. మహిళా స్వయం సహాయక సంఘాల (SHG) ద్వారా TSRTCకు బస్సుల అద్దె ఒప్పందాలు. SHG కుటుంబాలకు రూ. 40 కోట్లు విలువైన ప్రమాద బీమా చెల్లింపులు.
14,000 పైగా అంగన్‌వాడీ ఉపాధ్యాయుల నియామక ప్రక్రియ ప్రారంభం. దీని ద్వారా పలు గ్రామీణ ప్రాంతాల్లో అభివృద్ధికి కొత్త అవకాశాలు లభించనున్నాయి.పెట్రోల్ బంకుల నిర్వహణలో మహిళా స్వయం సహాయక సంఘాలకు అవకాశాలు. ఈ కార్యక్రమంలో తెలంగాణ మహిళా సంక్షేమ రంగానికి కొత్త ఉత్సాహం రానుంది. మహిళలు స్వయం ఉపాధి, పారిశ్రామిక రంగాల్లో మరింత ముందుకు వెళ్లేందుకు ప్రభుత్వం మరిన్ని అవకాశాలను కల్పించనుంది. మహిళల ఆర్థికాభివృద్ధి దిశగా తెలంగాణ ప్రభుత్వం తీసుకుంటున్న ఈ నిర్ణయాలు, దేశవ్యాప్తంగా మరిన్ని రాష్ట్రాలకు ఆదర్శంగా నిలిచే అవకాశముంది. ఈ కొత్త కార్యక్రమాలు తెలంగాణ మహిళలకు ఆర్థిక స్వాతంత్ర్యం అందించడమే కాకుండా, రాష్ట్ర ఆర్థిక వ్యవస్థలో వారి పాత్రను మరింత బలపరిచేలా ఉంటాయి.
