Meta ai:మెటాకు గూగుల్ బిగ్ షాక్.. జెమినీ ఏఐ వాడకంపై కఠిన పరిమితులు

Meta ai: ప్రపంచ టెక్ రంగంలో ఆర్టిఫిషియల్ ఇంటెలిజెన్స్ (AI) మౌలిక వసతుల కొరత ఏ స్థాయిలో ఉందో స్పష్టం చేస్తూ ఒక సంచలన పరిణామం వెలుగులోకి వచ్చింది. సెర్చ్ ఇంజన్ దిగ్గజం గూగుల్ (Google), ప్రముఖ సోషల్ మీడియా ప్లాట్‌ఫామ్స్ మాతృసంస్థ అయిన మెటా (Meta)కు ఊహించని షాక్ ఇచ్చింది. తన పవర్‌ఫుల్ ఏఐ మోడల్ అయిన ‘జెమినీ’ (Gemini) వాడకంపై మెటాకు గూగుల్ కఠినమైన పరిమితులు (Caps/Restrictions) విధించింది. ఏఐ ప్రాజెక్టుల రన్ కోసం మెటా డిమాండ్ చేసిన భారీ స్థాయి ‘కంప్యూటింగ్ సామర్థ్యాన్ని’ (Computing Capacity) సరఫరా చేయడంలో గూగుల్ వెనుకబడటమే ఇందుకు ప్రధాన కారణంగా తెలుస్తోంది.

మార్చి నుంచే ఆంక్షలు.. మెటా అంతర్గత ప్రాజెక్టులు బ్రేక్

టెక్ ఇండస్ట్రీలో గూగుల్ క్లౌడ్ (Google Cloud) మరియు జెమినీ ఏఐ సేవలను అత్యధికంగా వినియోగించుకుంటున్న టాప్ కస్టమర్లలో మెటా ఒకటి. అయితే, ఈ ఏడాది మార్చి నుంచే గూగుల్ ఈ పరిమితులను అమలు చేసినట్లు సమాచారం. మెటా తన అంతర్గత ఏఐ అప్లికేషన్ల డెవలప్‌మెంట్ కోసం అసాధారణ స్థాయిలో క్లౌడ్ వనరులను కోరగా.. గూగుల్ తన వద్ద ఉన్న డేటా సెంటర్ల కెపాసిటీతో ఆ డిమాండ్‌ను అందుకోలేక చేతులెత్తేసింది. గూగుల్ విధించిన ఈ పరిమితుల కారణంగా మెటాకు చెందిన పలు కీలక ఏఐ రీసెర్చ్ ప్రాజెక్టులు ఆలస్యమవ్వడమే కాకుండా కొన్నింటికి అంతరాయం కలిగింది. దీంతో అప్రమత్తమైన మెటా యాజమాన్యం.. తమ ఉద్యోగులు, డెవలపర్లు ఏఐ వాడకాన్ని కొలిచే యూనిట్లయిన ‘ఏఐ టోకెన్ల’ (AI Tokens) వినియోగాన్ని వీలైనంత తగ్గించుకోవాలని, అత్యంత సమర్థవంతంగా (Efficiently) వాడుకోవాలని అంతర్గత ఆదేశాలు జారీ చేసింది.

Meta ai: సుందర్ పిచాయ్ అధికారిక అంగీకారం

ఈ ఏఐ కంప్యూటింగ్ పవర్ సంక్షోభం కేవలం మెటాకు మాత్రమే పరిమితం కాలేదు. గూగుల్ క్లౌడ్ సేవలను వాడుతున్న మరికొన్ని స్టార్టప్స్, ఎంటర్‌ప్రైజ్ కంపెనీలు కూడా ఇలాంటి పరిమితులనే ఎదుర్కొంటున్నాయి. టెక్ కంపెనీలు డేటా సెంటర్లు (Data Centers), అత్యాధునిక ఏఐ చిప్‌ల (AI Chips – GPUs) కోసం బిలియన్ల డాలర్లు కుమ్మరిస్తున్నప్పటికీ.. మార్కెట్ డిమాండ్‌కు సరిపడా మౌలిక వసతుల (Infrastructure) సరఫరా జరగడం లేదు. ఈ సవాలును గూగుల్ సీఈఓ సుందర్ పిచాయ్ (Sundar Pichai) స్వయంగా అంగీకరించారు. కంపెనీ తొలి త్రైమాసిక (Q1) ఆర్థిక ఫలితాల వెల్లడి సందర్భంగా ఆయన మాట్లాడుతూ.. కంప్యూటింగ్ సామర్థ్య పరిమితుల వల్లే తమ క్లౌడ్ విభాగం వృద్ధి రేటు కొంత మందగించిందని, క్లౌడ్ విభాగం బ్యాక్‌లాగ్ (Backlog) గణనీయంగా పెరిగిపోయిందని స్పష్టం చేశారు.