రాయల్ ఛాలెంజర్స్ బెంగళూరు (RCB) ఐపీఎల్ 2025 టైటిల్ గెలిచిన అనంతరం నిర్వహించిన విజయోత్సవ ర్యాలీ సమయంలో బెంగళూరులో జరిగిన తొక్కిసలాట ఘటనపై భారత క్రికెట్ నియంత్రణ మండలి (BCCI) కీలక చర్యలు చేపట్టింది. భవిష్యత్తులో ఇలాంటి దుర్ఘటనలు పునరావృతం కాకుండా ఉండేందుకు, మ్యాచ్ల అనంతరం నిర్వహించే విజయోత్సవాలకు పటిష్టమైన భద్రతా మార్గదర్శకాలను రూపొందించేందుకు ఒక త్రిసభ్య కమిటీని ఏర్పాటు చేసింది. నిన్న జరిగిన బీసీసీఐ 28వ అపెక్స్ కౌన్సిల్ సమావేశంలో ఈ నిర్ణయం తీసుకున్నారు.బీసీసీఐ కార్యదర్శి దేవాజిత్ సైకియా నేతృత్వంలోని ఈ కమిటీలో ఉపాధ్యక్షుడు రాజీవ్ శుక్లా, కోశాధికారి ప్రభ్తేజ్ సింగ్ భాటియా (Prabhtej Singh Bhatia) సభ్యులుగా వ్యవహరించనున్నారు.ఈ కమిటీ పదిహేను రోజుల్లోగా తమ నివేదికను, నూతన మార్గదర్శకాలను సమర్పించాలని బీసీసీఐ ఆదేశించింది.
బీసీసీఐ
బెంగళూరులో విజయోత్సవాల సందర్భంగా జరిగిన దురదృష్టకర సంఘటన దృష్ట్యా భవిష్యత్తులో ఇలాంటివి జరగకుండా నిరోధించడానికి సమగ్ర మార్గదర్శకాలను రూపొందించడానికి ఒక కమిటీని ఏర్పాటు చేయాలని అపెక్స్ కౌన్సిల్ (Apex Council) నిర్ణయించింది” అని బీసీసీఐ ఒక ప్రకటనలో వెల్లడించింది.జూన్ 4న బెంగళూరులోని చిన్నస్వామి స్టేడియం వెలుపల ఈ విషాద ఘటన చోటుచేసుకుంది. ఆర్సీబీ జట్టు తొలిసారి ఐపీఎల్ టైటిల్ గెలుచుకోవడంతో ఆ విజయాన్ని వేడుకగా జరుపుకునేందుకు భారీ సంఖ్యలో అభిమానులు తరలివచ్చారు. ఐపీఎల్ ఫైనల్ జరిగిన మరుసటి రోజే హడావుడిగా ఈ వేడుకలను ఏర్పాటు చేశారు. స్టేడియం సామర్థ్యం పరిమితంగా ఉన్నప్పటికీ, అంచనాలకు మించి సుమారు రెండు లక్షల మంది అభిమానులు ఒక్కసారిగా రావడంతో తీవ్ర గందరగోళం నెలకొంది.
అనుమతులు లేకుండా
తొలుత విధాన సౌధ నుంచి కవాతు నిర్వహించాలని భావించినప్పటికీ, అది చివరి నిమిషంలో రద్దయింది. అయినప్పటికీ, అప్పటికే అభిమానులు పెద్ద ఎత్తున ఆ ప్రాంతానికి చేరుకున్నారు.ట్రాఫిక్ పోలీసుల హెచ్చరికలను బేఖాతరు చేయడం, ఎటువంటి అధికారిక అనుమతులు లేకుండా ఈ కార్యక్రమాన్ని నిర్వహించడం తీవ్ర విమర్శలకు దారి తీసింది.ఈ ఘటనకు ఆర్సీబీ యాజమాన్యం, వారి ఈవెంట్ భాగస్వాములు, కర్ణాటక రాష్ట్ర క్రికెట్ అసోసియేషన్ (కేఎస్సీఏ) నిర్లక్ష్యమే కారణమని పలువురు ఆరోపించారు. ఈ దుర్ఘటన అనంతరం, ఆర్సీబీ మార్కెటింగ్ హెడ్, డీఎన్ఏ ఎంటర్టైన్మెంట్ సంస్థ (DNA Entertainment Company) కు చెందిన ఇద్దరు అధికారులను అరెస్ట్ చేశారు. కేఎస్సీఏ కార్యదర్శి, కోశాధికారి నైతిక బాధ్యత వహిస్తూ తమ పదవులకు రాజీనామా చేశారు. ప్రణాళిక లోపం, జన నియంత్రణలో వైఫల్యం కారణంగానే ఈ దుర్ఘటన జరిగిందని రాష్ట్ర ప్రభుత్వం ఆర్సీబీ యాజమాన్యాన్ని, బీసీసీఐని బాధ్యులను చేసింది.