E-KYC : రేషన్ కార్డుదారులకు హెచ్చరిక.. ఈ-కేవైసీ పూర్తి కాకుంటే రేషన్ బంద్!

E-KYC : తెలంగాణలో రేషన్ కార్డుదారులకు పౌరసరఫరాల శాఖ తీవ్ర హెచ్చరికలు జారీ చేసింది. రాష్ట్రవ్యాప్తంగా లబ్ధిదారుల్లో ఇప్పటివరకు 76 శాతం మంది మాత్రమే e-KYC (ఈ-కేవైసీ) ప్రక్రియను పూర్తి చేసుకోగా, మిగిలిన 24 శాతం మంది ఇంకా ఈ ప్రక్రియ పూర్తి చేయాల్సి ఉందని స్పష్టం చేసింది. నాన్-కేవైసీ సభ్యుల జాబితాను ఇప్పటికే జిల్లాల వారీగా ఉన్న రేషన్ డీలర్లకు అధికారులు పంపించారు. జులై 31వ తేదీని ఆఖరి గడువుగా నిర్ణయించిన అధికారులు, ఈ లోగా తమ పరిధిలోని రేషన్ కార్డుదారులందరితో వేలిముద్రలు సేకరించి ఈ-కేవైసీని పూర్తి చేయించాలని డీలర్లను ఆదేశించారు. నిర్ణీత గడువు దాటిన తర్వాత ఈ-కేవైసీ పూర్తికాని కార్డులకు సంబంధించి ఆగస్టు నెల నుంచి రేషన్ సరుకుల పంపిణీని పూర్తిగా నిలిపివేస్తామని అధికార యంత్రాంగం తెగేసి చెప్పింది.

ఒకేసారి 3 నెలల ఉచిత రేషన్: ఈ-కేవైసీ చేయకుంటే దక్కని బియ్యం!

ఎల్నినో (El Niño) వాతావరణ పరిస్థితులు, తదనంతర నీటి కొరత నేపథ్యంలో ప్రభుత్వం రేషన్ లబ్ధిదారులను ఆదుకోవడానికి ఒక కీలక నిర్ణయం తీసుకున్న సంగతి తెలిసిందే. రాబోయే 3 నెలలకు సంబంధించిన ఉచిత రేషన్ బియ్యాన్ని ఒకేసారి పంపిణీ చేయాలని సర్కార్ ప్రణాళికలు సిద్ధం చేసింది. అయితే, ఈ బియ్యం పొందాలంటే లబ్ధిదారులందరికీ ఈ-కేవైసీ తప్పనిసరి. కేవైసీ పూర్తికాకపోతే ఉచిత బియ్యం కోటా పొందే అవకాశం కోల్పోతారు. కాబట్టి రేషన్ కార్డులలో పేరు ఉన్న ప్రతి ఒక్క సభ్యుడు (పిల్లల నుంచి పెద్దల వరకు) వెంటనే సమీపంలోని రేషన్ దుకాణానికి (e-PoS యంత్రాల వద్ద) వెళ్లి ఈ-కేవైసీ నమోదు చేసుకోవాలని అధికారులు సూచిస్తున్నారు.