Electric Scooter Blast : ఎలక్ట్రిక్ స్కూటర్ పేలి ..ఇద్దరు మృతి

Electric Scooter Blast : ఉత్తరప్రదేశ్‌లోని నోయిడాలో అత్యంత విషాదకరమైన సంఘటన చోటుచేసుకుంది. మమురా ప్రాంతంలోని ఒక బహుళ అంతస్తుల భవనంలో ఛార్జింగ్ పెట్టిన ఎలక్ట్రిక్ స్కూటర్‌లో షార్ట్ సర్క్యూట్ సంభవించడంతో ఒక్కసారిగా బ్యాటరీ పేలిపోయింది. ఈ ప్రమాదంలో బ్యాటరీ పేలిన తీవ్రతకు భవనంలో భారీగా మంటలు చెలరేగి, దట్టమైన పొగ కమ్ముకుంది. దురదృష్టవశాత్తూ ఈ అగ్నిప్రమాదంలో చిక్కుకుని ఇద్దరు వ్యక్తులు ప్రాణాలు కోల్పోయారు. ఈ భీకర ప్రమాదం కారణంగా ఆ సమయంలో బిల్డింగ్‌లో ఉన్న మిగిలిన నివాసితులు తీవ్ర భయాందోళనలకు గురయ్యారు. ప్రాణాలు కాపాడుకోవడానికి వారంతా పై అంతస్తుల వైపు పరుగులు తీశారు.

కలచివేసిన దృశ్యాలు: కట్టెల వంతెనతో 100 మంది ప్రాణాలు కాపాడిన స్థానికులు!

మంటలు వేగంగా వ్యాపించడంతో దాదాపు 100 మందికి పైగా నివాసితులు ఆ భవనంలోనే చిక్కుకుపోయారు. ఈ క్రమంలో స్థానికులు చూపిన సమయస్ఫూర్తి పెను ప్రమాదాన్ని తప్పించింది. పక్కనే ఉన్న మరో భవనానికి, మంటలు అంటుకున్న భవనానికి మధ్య కట్టెలు, నిచ్చెనల సహాయంతో ఒక తాత్కాలిక చిన్న వంతెనను నిర్మించారు. అత్యంత ప్రమాదకరమైన స్థితిలో మహిళలు, పిల్లలు ఆ కట్టెల వంతెనపై నుంచి నడుస్తూ పక్క బిల్డింగ్‌లోకి ప్రాణాలతో దాటుతున్న దృశ్యాలు సామాజిక మాధ్యమాలలో (Social Media) వైరల్‌గా మారాయి. సమాచారం అందుకున్న వెంటనే అగ్నిమాపక సిబ్బంది ఘటనా స్థలానికి చేరుకుని మంటలను అదుపులోకి తెచ్చారు. ఎలక్ట్రిక్ వాహనాలు ఛార్జింగ్ చేసేటప్పుడు సరైన రక్షణ చర్యలు తీసుకోకపోతే ఎంతటి ప్రమాదాలు జరుగుతాయో అనడానికి ఈ ఘటనే ప్రత్యక్ష ఉదాహరణగా నిలిచింది.