ఉత్తర్ప్రదేశ్లో జరిగిన ఓ ఘటన అందరినీ ఆశ్చర్యానికి గురిచేసింది. పెళ్లి కోసం ఎదురు చూస్తున్న వధువు కుటుంబం ఊహించని షాక్కు గురైంది. పెళ్లి చూపులకు వచ్చిన యువకుడి స్థానంలో పెళ్లి రోజున మరొకరు వచ్చారు. ఉత్తర్ప్రదేశ్లోని రాయ్బరేలీ జిల్లాలో జరిగిన ఈ ఘటన సినిమాను తలపించేలా ఉంది. థానే మిల్ ప్రాంతంలోని ఓ గ్రామానికి చెందిన యువతికి, హరియాణాలోని పానీపట్కు చెందిన యువకుడితో వివాహం నిశ్చయమైంది. పెళ్లిచూపుల్లో చూపించిన యువకుడి ఫొటో చూసి వధువు కుటుంబం ఒకే చెప్పింది.
కానీ, పెళ్లి రోజున మొదట చూపించిన యువకుడు కాకుండా మరో వ్యక్తి వరుడిగా వచ్చాడు!
ఊరేగింపుగా వచ్చి పెళ్లి మండపానికి అడుగు పెట్టే వరకూ ఎవరికీ ఈ విషయం అర్థం కాలేదు.
వధువు కుటుంబానికి అర్థమైన మోసం
వధువు కుటుంబం, బంధువులు అసలు వరుడు కాకుండా ఇంకొకరు వచ్చిన విషయం తెలుసుకుని ఒక్కసారిగా షాక్కు గురయ్యారు. మధ్యవర్తి రిసు మోసం చేసిందని వారు గ్రహించారు.
వెంటనే ఆమెను నిలదీశారు.
విషయం గ్రామ సర్పంచ్ వరకు వెళ్లింది.
చివరికి పోలీసులకు సమాచారం అందించడంతో అరెస్టులు జరిగాయి. పోలీసులు విచారణలో బయటపెట్టిన నిజాలు. థానే మిల్ ఏరియా పోలీస్ స్టేషన్ ఇంఛార్జి రాజీవ్ సింగ్ మాట్లాడుతూ, ఇది నకిలీ మ్యారేజ్ బ్రోకర్ల మోసం కావొచ్చని చెప్పారు. సంబంధం కుదిరినట్లు నటించి, అమ్మాయి కుటుంబం నుంచి డబ్బు, బంగారం తీసుకుని పారిపోతున్నట్లు గుర్తించారు. ఇందులో పవన్ కుమార్ (నకిలీ వరుడు), మధ్యవర్తి రిసు, ఆమె భర్త అజయ్, మరో నలుగురిని పోలీసులు అరెస్ట్ చేశారు.
మోసపోయే కుటుంబాలకు పోలీసుల సూచనలు
పోలీసులు ఇలాంటి మోసాల గురించి ప్రజలకు హెచ్చరికలు జారీ చేశారు. వరుడు, అతడి కుటుంబం, నేపథ్యం గురించి పూర్తిగా సమాచారం సేకరించాలి. అధికారిక ధ్రువపత్రాలు, గుర్తింపు కార్డులు చెక్ చేయడం చాలా ముఖ్యం. వివాహ సంబంధాల పేరుతో డబ్బు ఇవ్వడం, విలువైన వస్తువులు అప్పగించడం ప్రమాదకరం. ఈ ఘటనతో నకిలీ మ్యారేజ్ బ్రోకర్ల మోసాలు మరోసారి వెలుగులోకి వచ్చాయి. కుటుంబాలు ఇటువంటి మోసాలను నివారించేందుకు అప్రమత్తంగా ఉండాలి. ఇలాంటి సంఘటనలు పునరావృతం కాకుండా ఉండేందుకు పోలీసుల సహాయం తీసుకోవడం మంచిది.