ప్రస్తుత టెక్నాలజీ యుగంలో ఆర్టిఫిషియల్ ఇంటెలిజెన్స్ (AI) వినియోగం పెరగడం ఎంత లాభదాయకమో, వైద్యం వంటి సున్నితమైన విషయాల్లో దానిపై గుడ్డిగా ఆధారపడటం అంత ప్రమాదకరమని ఢిల్లీలో జరిగిన ఒక ఘటన నిరూపించింది. ఒక 45 ఏళ్ల వ్యక్తి తనకు హెచ్ఐవీ సోకుతుందేమోనన్న భయంతో ఏఐ చాట్బాట్ను సంప్రదించి, అది సూచించిన హెచ్ఐవీ నిరోధక మందులను (PrEP/PEP) డాక్టర్ ప్రిస్క్రిప్షన్ లేకుండానే వాడాడు. ఏవైనా మందులు వాడే ముందు క్లినికల్ పరీక్షలు అవసరమని ఏఐ హెచ్చరించినప్పటికీ, ఆ వ్యక్తి నేరుగా మెడికల్ షాపులో మందులు కొని వాడటం ప్రారంభించాడు. వారం రోజుల వ్యవధిలోనే ఆ మందుల వికటించి, అతను ప్రాణాపాయ స్థితికి చేరుకోవడం అందరినీ దిగ్భ్రాంతికి గురిచేసింది.
Arava Sreedhar : జనసేన MLA శ్రీధర్ పై NHRCకి వీణ ఫిర్యాదు
సదరు వ్యక్తి ఈ మందులు వాడటం వల్ల స్టీవెన్స్ జాన్సన్ సిండ్రోమ్ (Stevens-Johnson Syndrome) అనే ప్రాణాంతక చర్మ వ్యాధికి గురయ్యాడు. ఇది చర్మంపై దద్దుర్లు, బొబ్బలు రావడంతో పాటు శరీర అంతర్గత అవయవాలపై తీవ్ర ప్రభావం చూపే ప్రమాదకరమైన అలర్జీ. ప్రస్తుతం అతను ఢిల్లీలోని రామ్ మనోహర్ లోహియా ఆస్పత్రిలో మృత్యువుతో పోరాడుతున్నాడు. సాధారణంగా PrEP లేదా PEP మందులను వాడే ముందు బాధితుడికి హెచ్ఐవీ ఉందా లేదా అని పరీక్షించడంతో పాటు, వారి కిడ్నీలు మరియు కాలేయం (Liver) పనితీరును డాక్టర్లు విశ్లేషించాల్సి ఉంటుంది. ఎటువంటి వైద్య పర్యవేక్షణ లేకుండా ఇలాంటి శక్తివంతమైన మందులు వాడటం వల్ల అవి శరీరంలోని రోగనిరోధక వ్యవస్థపై తిరుగుబాటు చేస్తాయని వైద్య నిపుణులు హెచ్చరిస్తున్నారు.
ఈ ఘటన సోషల్ మీడియా మరియు ఇంటర్నెట్ సమాచారాన్ని నమ్మి ‘సెల్ఫ్ మెడికేషన్’ చేసుకునే వారికి ఒక బలమైన హెచ్చరిక. ఏఐ చాట్బాట్లు కేవలం అందుబాటులో ఉన్న సమాచారాన్ని క్రోడీకరించి ఇస్తాయి తప్ప, ఒక వ్యక్తిగత రోగి యొక్క మెడికల్ హిస్టరీని లేదా వారి శారీరక స్థితిని ప్రత్యక్షంగా పరీక్షించలేవు. ఏఐ అందించే సమాచారం కేవలం ప్రాథమిక అవగాహన కోసం మాత్రమేనని, ఏదైనా అనారోగ్యం కలిగినప్పుడు అర్హత కలిగిన వైద్యులను సంప్రదించి బ్లడ్ టెస్ట్లు చేయించుకోవడం తప్పనిసరి అని వైద్యులు స్పష్టం చేస్తున్నారు. ప్రాణం పోయే వరకు తెచ్చుకునే కంటే, వైద్యుడి సలహాతో సరైన చికిత్స పొందడమే మేలని ఈ సంఘటన మనకు పాఠం నేర్పుతోంది.
Read hindi news: hindi.vaartha.com
Read Also Epaper : epaper.vaartha.com
