ఉగ్రవాదంపై భారత్ గట్టి సంకల్పం: జాతీయ వేదికపై ‘జీరో టాలరెన్స్’ సందేశాన్ని బలంగా వినిపించేందుకు కేంద్రం తహతహ
ఉగ్రవాదంపై భారత్ తీసుకుంటున్న గట్టి వైఖరిని ప్రపంచదేశాలకు స్పష్టంగా తెలియజేయాలనే ఉద్దేశంతో కేంద్ర ప్రభుత్వం మరో కీలక నిర్ణయం తీసుకుంది. దేశ వ్యాప్తంగా రాజకీయ విభేదాలను పక్కనపెట్టి, అఖిలపక్ష ప్రతినిధి బృందాలను వివిధ దేశ రాజధానులకు, ఐక్యరాజ్యసమితికి పంపేందుకు ఏర్పాట్లు వేగంగా జరుగుతున్నాయి. ఉగ్రవాదంపై ‘జీరో టాలరెన్స్’ విధానాన్ని అంతర్జాతీయంగా సమర్థించాలని కేంద్రం భావిస్తోంది. ఈ ప్రతినిధి బృందాల్లో ఒక్కొక్కరిదీ కీలక పాత్ర. సీనియర్ కాంగ్రెస్ నేత శశి థరూర్కు కూడా ఓ బృందానికి నాయకత్వం వహించాల్సిందిగా ఆహ్వానం లభించినప్పటికీ, కాంగ్రెస్ అధికారిక జాబితాలో ఆయన పేరు లేకపోవడం ఇప్పుడు పెద్ద చర్చకు దారితీసింది.
శశి థరూర్ స్పందన: దేశ ప్రయోజనాలే ముఖ్యం, సేవల కోసం ఎప్పుడూ సిద్ధమే
ఈ ఘటనపై స్వయంగా శశి థరూర్ స్పందిస్తూ, తనకు ప్రభుత్వం ఇచ్చిన ఆహ్వానం పట్ల గౌరవంగా భావిస్తున్నట్లు తెలిపారు. “జాతీయ ప్రయోజనాల విషయంలో నా సేవలు అవసరమైతే నేను ఎప్పుడూ వెనుకడను. భారతదేశానికి వాణి కావడం గౌరవం. ఐదు కీలక దేశ రాజధానులలో మన దృక్పథాన్ని వివరించే ఈ అవకాశాన్ని స్వీకరిస్తున్నాను. జై హింద్!” అంటూ ఆయన తన సోషల్ మీడియా వేదిక ‘ఎక్స్’లో పేర్కొన్నారు. కేంద్ర ప్రభుత్వం ప్రకటించిన బృందాల్లో మొత్తం ఏడుగురు ఎంపీలు ఉన్నారు. వారిలో ముగ్గురు ప్రతిపక్ష పార్టీలకు చెందినవారు కావడం గమనార్హం.
కాంగ్రెస్ క్లారిటీ: జాబితాలో థరూర్ లేరు!
కేంద్రం ఈ ప్రకటన చేసిన గంటలోపే, కాంగ్రెస్ పార్టీ అధికారికంగా స్పందించింది. పార్టీ తరపున ఎంపిక చేసిన నలుగురు ఎంపీల జాబితాలో శశి థరూర్ పేరు లేదని పార్టీ ప్రధాన కార్యదర్శి జైరాం రమేష్ స్పష్టం చేశారు. అందులో ఆనంద్ శర్మ, గౌరవ్ గొగోయ్, డాక్టర్ నసీర్ హుస్సేన్, రాజా బ్రార్ల పేర్లే ఉన్నాయని ఆయన వెల్లడించారు. “కేంద్ర మంత్రి కిరణ్ రిజిజు స్వయంగా రాహుల్ గాంధీతో మాట్లాడి ఎంపీల పేర్లను కోరారు. దానికి అనుగుణంగా నలుగురు పేర్లను మేం ఇచ్చాం” అని జైరాం రమేష్ వివరించారు. ఈ వ్యాఖ్యలు నేపథ్యంలో, థరూర్కు వ్యక్తిగతంగా ఆహ్వానం పంపాయా? లేక కేంద్రం దృష్టిలో ఆయనకు ప్రత్యేక స్థానం ఉందా? అనే చర్చలు ముమ్మరంగా మారాయి.
అన్ని పార్టీల ప్రతినిధులు.. ఐక్యంగా భారత్ వాణి
ఈ ప్రతినిధి బృందాల్లో బీజేపీ తరపున రవిశంకర్ ప్రసాద్, బైజయంత్ పండా ఉన్నారు. జేడీయూ నుంచి సంజయ్ కుమార్ ఝా, శివసేన నుంచి శ్రీకాంత్ షిండే, డీఎంకే (DMK) నుంచి కనిమొళి, ఎంఐఎం (MIM) నుంచి అసదుద్దీన్ ఒవైసీ, ఎన్సీపీ (ఎస్పీ) నుంచి సుప్రియా సూలే వంటి ప్రముఖులు ఉన్నారు. ప్రతిపక్ష పార్టీలకు చెందిన నేతలు కూడా ఈ వేదిక ద్వారా దేశ ప్రయోజనాల్ని ప్రాచుర్యం చేసే లక్ష్యంతో ముందుకు వస్తుండటం గమనార్హం.
“ఒకే గళంగా భారత్”: సుప్రియా సూలే స్పందన
ఈ ప్రతినిధి బృందంలో చోటు దక్కిన ఎన్సీపీ (ఎస్పీ) నేత సుప్రియా సూలే కూడా తన ఆనందాన్ని వ్యక్తపరిచారు. “ప్రధానమంత్రి మోదీ, మంత్రి రిజిజు, విదేశాంగ శాఖకు నా ధన్యవాదాలు. ఉగ్రవాదంపై భారత్ గట్టి పంచ్ ఇవ్వాలనే ఈ ప్రయత్నంలో భాగస్వామిగా ఉండటం గౌరవంగా భావిస్తున్నాను. దేశం కోసం ఐక్యంగా నిలబడటం ఇదే సమయం” అంటూ ఆమె ‘ఎక్స్’లో రాశారు. బారామతి ప్రజల మద్దతుకి ఆమె ప్రత్యేకంగా కృతజ్ఞతలు తెలిపారు.
ఈ దౌత్య చర్యలన్నింటి వెనుక ఉద్దేశం ఒక్కటే – ప్రపంచానికి భారత్ తలదించకుండా, శక్తిగా నిలుస్తుందని, ఉగ్రవాదానికి ఆశ్రయం లభించదనే స్పష్టమైన సందేశాన్ని ఇవ్వడం. ఈ తరహా అఖిలపక్ష కలయికలు భారత్ ఆంతర్జాతీయ రాజకీయాల్లో స్థిరమైన శక్తిగా ఎదుగుతోందని మరోసారి నిరూపిస్తున్నాయి.
Read also: Ukraine: టర్కీ చర్చలు – రాజకీయ రంగస్థలంగా మారిన ఇస్తాంబుల్
