Rajnath Singh: విద్యార్థులను పొలిటికల్ టూల్‌గా వాడుకుంటున్నారు.. ఢిల్లీ రచ్చపై రాజ్‌నాథ్ సింగ్ ఫైర్!

Rajnath Singh: దేశ రాజధాని న్యూఢిల్లీలో తీవ్రరూపం దాల్చిన విద్యార్థి నిరసనలపై కేంద్ర రక్షణ శాఖ మంత్రి రాజ్‌నాథ్ సింగ్ (Rajnath Singh) సంచలన వ్యాఖ్యలు చేశారు. ఢిల్లీ వీధుల్లో జరుగుతున్న ఈ ఆందోళనలు తీవ్ర ఆందోళన కలిగిస్తున్నాయని, ప్రతిపక్ష నేతలు తమ స్వార్థ రాజకీయ ప్రయోజనాల కోసం దేశ యువతను, విద్యార్థులను ఒక రాజకీయ సాధనంగా (Political Tool) వాడుకోవడానికి ప్రయత్నించడం అత్యంత దురదృష్టకరమని ఆయన మండిపడ్డారు. ప్రధాని నరేంద్ర మోదీ నాయకత్వంలోని కేంద్ర ప్రభుత్వం విద్యార్థులు, యువత సంక్షేమానికి, వారి ఆకాంక్షలను నెరవేర్చడానికి పూర్తిగా కట్టుబడి ఉందని స్పష్టం చేశారు.

విద్యార్థులకు అన్యాయం జరగనివ్వం – ప్రతిపక్షాలది విఫల యత్నం

విద్యార్థుల ప్రతి ఆందోళనను ఆలకించి, వారికి స్పష్టమైన పరిష్కారం చూపడం తమ బాధ్యత అని కేంద్ర మంత్రి రాజ్‌నాథ్ సింగ్ వ్యాఖ్యానించారు. “భారతదేశంలోని చైతన్యవంతమైన, వివేకవంతులైన యువత ప్రతిపక్షాల భ్రమ కలిగించే ప్రయత్నాలను చక్కగా అర్థం చేసుకుంటారనే నమ్మకం నాకుంది. వారు ఎప్పటికీ అభివృద్ధి, దేశ నిర్మాణ మార్గాన్నే ఎంచుకుంటారు.” ఎవరికీ, ముఖ్యంగా మన పిల్లలకు, యువతకు ఎలాంటి అన్యాయం జరగకుండా చూస్తామని.. కొందరు ప్రతిపక్ష నాయకులు ప్రజల్లో సృష్టిస్తున్న ఈ ఆగ్రహపూరిత భావన, యువతను తప్పుదోవ పట్టించడానికి చేస్తున్న ఒక విఫలయత్నం మాత్రమేనని కొట్టిపారేశారు.

Rajnath Singh: వీధుల్లో కాదు.. పార్లమెంట్‌లో చర్చించండి

ప్రస్తుతం పార్లమెంట్ వర్షాకాల సమావేశాలు (Monsoon Session) జరుగుతున్న తరుణంలో, సమస్యలను వీధుల్లో కాకుండా సభలోనే పరిష్కరించుకోవాలని ప్రతిపక్షాలకు రాజ్‌నాథ్ హితవు పలికారు. “ప్రజాస్వామ్యంలో ఏ సమస్యనైనా చర్చించేందుకు పార్లమెంట్ కంటే గొప్ప వేదిక ఉండదు. అక్కడ ప్రతిపక్షానికి మాట్లాడే పూర్తి స్వేచ్ఛ ఉంటుంది. ప్రభుత్వం కూడా ప్రతి అంశంపై చర్చించేందుకు సిద్ధంగా ఉందని ఇప్పటికే స్పష్టం చేసింది.” ప్రతిపక్షాలకు నిజంగా చిత్తశుద్ధి ఉంటే, సమావేశాలకు ఆటంకం కలిగించకుండా వీధుల నుంచి దేశ దృష్టిని పార్లమెంట్ వైపు మళ్లించి, సభా నిబంధనల ప్రకారం చర్చల్లో పాల్గొనాలని డిమాండ్ చేశారు.