వాహనదారులకు భారత జాతీయ రహదారుల ప్రాధికార సంస్థ (NHAI) శుభవార్తను ప్రకటించింది. ఇకపై టోల్ ప్లాజాల వద్ద రీఛార్జ్ సమస్యలు మరిచిపోవచ్చు! కారణం – కొత్తగా ప్రవేశపెట్టనున్న ఫాస్టాగ్ వార్షిక పాస్ (FASTag Annual Pass) .స్వాతంత్ర్య దినోత్సవం సందర్భంగా, 2025 ఆగస్టు 15 నుంచి ఈ పథకం అందుబాటులోకి రానుంది. తరచూ జాతీయ రహదారులపై ప్రయాణించే ప్రైవేట్ వాహనదారులకు ఇది మంచి ఉపశమనం అవుతుంది. రీఛార్జ్ చేయాల్సిన తలనొప్పిని తగ్గించడమే ఈ పాస్ ముఖ్య ఉద్దేశం.ఈ ఫాస్టాగ్ వార్షిక పాస్ ధరను రూ. 3,000గా నిర్ణయించారు. ఈ మొత్తాన్ని చెల్లించిన వాహనదారులు, ఒక సంవత్సరం లేదా 200 ట్రిప్పుల వరకు టోల్ చెల్లించాల్సిన అవసరం లేదు.కారు, జీపు, వ్యాన్ల వంటి వాణిజ్యేతర వాహనాలకు మాత్రమే ఈ సౌకర్యం వర్తిస్తుంది. వాణిజ్య వాహనాలయితే ఈ సదుపాయం అందుబాటులో ఉండదు.
ఎలా దరఖాస్తు చేయాలి?
ఈ పాస్ను పొందాలంటే మీ వాహనానికి ఫాస్టాగ్ ఇప్పటికే యాక్టివ్ అయి ఉండాలి. పాస్ కోసం మీరు ‘రాజ్మార్గ్ యాత్ర’ యాప్ లేదా NHAI అధికారిక వెబ్సైట్ ద్వారా దరఖాస్తు చేసుకోవచ్చు.దీని ప్రక్రియ పూర్తిగా ఆన్లైన్లో జరుగుతుంది. మరింత సౌలభ్యం కోసం ఇది ఒక సులభమైన డిజిటల్ ప్రక్రియగా రూపొందించబడింది.ఈ పాస్ కేవలం NHAI మరియు కేంద్ర రవాణా మంత్రిత్వ శాఖ పరిధిలోని జాతీయ రహదారులు, ఎక్స్ప్రెస్వేలపై మాత్రమే చెల్లుబాటు అవుతుంది.అయితే, ముంబై-పుణె ఎక్స్ప్రెస్వే, సమృద్ధి మహామార్గ్, అటల్ సేతు వంటి రాష్ట్ర ప్రభుత్వాల పరిధిలోని రహదారులపై ఇది అమలులో ఉండదు. అటువంటి రహదారులపై ప్రయాణించేటప్పుడు, టోల్ రుసుములు ఫాస్టాగ్ వాలెట్ నుంచే కట్ అవుతాయి.
ఇతర ముఖ్యమైన విషయాలు
ఒక వాహనంపై తీసుకున్న పాస్ను ఇతర వాహనానికి బదిలీ చేయలేరు.
200 ట్రిప్పులు లేదా ఏడాది గడిచిన తర్వాత పాస్ ఆటోమేటిక్గా రద్దవుతుంది.
కావాలంటే వినియోగదారులు మళ్లీ కొత్తగా దరఖాస్తు చేసుకోవాల్సి ఉంటుంది.
ఈ పాస్కు ఆటో-రెన్యూవల్ సౌకర్యం లేదు.
తరచూ ప్రయాణించే వారికి ఇది ఒక గొప్ప అవకాశమే. టోల్ చెల్లింపుల బాధ లేకుండా ప్రయాణం సాగించాలనుకునే వారు, ఈ వార్షిక పాస్ను తప్పక ఉపయోగించుకోవాలి.వాహనదారులకు సమయానుకూలంగా, డిజిటల్గా సేవలందించేందుకు NHAI చేస్తున్న ఈ ప్రయత్నం, ప్రయాణ అనుభవాన్ని మరింత సౌకర్యవంతంగా మార్చనుంది.
Read Also : Brown rice: వైట్ రైస్ Vs బ్రౌన్ రైస్ ఏది ఆరోగ్యానికి మంచిది..?
