వాస్తవానికి ఈటీవీ ఎల్లప్పుడూ కుటుంబ సభ్యులందరూ కలిసి ఆనందించే కంటెంట్కు ప్రాధాన్యతనిస్తుంది. ఓటీటీ విషయంలోనూ అదే విధానాన్ని అనుసరిస్తోంది. ఓటీటీలో లఘు చిత్రాలతో పాటు, వివిధ భాషలకు చెందిన సినిమాలను తెలుగులో అందిస్తోంది. ఈ వారం విడుదలైన మలయాళ సినిమా ‘ఇట్టిమాని: మేడిన్ చైనా’ ఈ కోవలోకే వస్తుంది. మోహన్ లాల్ ద్విపాత్రాభినయం చేసిన ఈ సినిమా జూలై 24వ తేదీ నుంచి స్ట్రీమింగ్ అవుతోంది.
కథా సంగ్రహం
Ittymani: Made in China: ఈ సినిమా కథ ఇట్టి మాథన్ (మోహన్ లాల్) అనే వ్యక్తితో మొదలవుతుంది. ఇట్టి మాథన్ చైనాలో మార్షల్ ఆర్ట్స్ గురువుగా పని చేస్తుంటాడు. అతని భార్య దేవమ్మ గర్భవతి అయిన తరువాత, వారికి ‘ఇట్టిమాని’ (Mohan Lal) అనే కుమారుడు జన్మిస్తాడు. ఇట్టిమాని పుట్టిన తరువాత ఇట్టిమాథన్ దంపతులు (Ittimathan couple) చైనా నుంచి కేరళకు తిరిగి వస్తారు. ఇట్టి మాథన్ అక్కడ ఒక చైనీస్ హోటల్ ప్రారంభిస్తాడు. నకిలీ వస్తువులను తయారు చేసి విక్రయించడంలో అతను దిట్ట. ఆ మార్గంలోనే అతను ఎక్కువ సంపాదించాడని ప్రచారంలో ఉంటుంది.
తండ్రి మరణానంతరం ఇట్టిమాని ఆ వ్యాపారాలను కొనసాగిస్తాడు. అతను కమీషన్ లేకుండా, లాభం లేకుండా ఏ పనీ చేయడు. ఈ డబ్బు వ్యామోహం కారణంగా అతనికి 40 ఏళ్లు దాటినా పెళ్లి కాదు. జెస్సీ (హనీ రోజ్)తో అతని వివాహం రద్దు కావడానికి కూడా ఇదే కారణం. డబ్బు పట్ల అతనికున్న వ్యామోహాన్ని తల్లి ఎప్పుడూ మందలిస్తూ ఉంటుంది. సాధ్యమైనంత త్వరగా అతనికి పెళ్లి చేయాలని ప్రయత్నిస్తూ ఉంటుంది.
ఇట్టిమాని ఇంటికి దగ్గరలో ‘అణ్ణమ్మ’ (రాధిక) నివసిస్తూ ఉంటుంది. ఆమెకు ముగ్గురు కొడుకులు. వారందరికీ పెళ్ళై పిల్లలు కూడా ఉన్నారు. వారంతా వివిధ ప్రాంతాల్లో స్థిరపడతారు. భర్త మరణించిన తరువాత తన పిల్లలెవరూ తనను పట్టించుకోకపోవడం ఆమెను తీవ్రంగా బాధ పెడుతుంది. ఈ బాధతోనే ఆమెకు గుండెనొప్పి వస్తుంది. ఆమె ఆవేదనను అర్థం చేసుకున్న ఇట్టిమాని ఒక కీలక నిర్ణయం తీసుకుంటాడు. ఆ నిర్ణయం ఏమిటి? అది ఆమె పిల్లల స్వభావంలో మార్పు తెస్తుందా? అనేది ఈ సినిమా కథాంశం.
విశ్లేషణ
మలయాళ ప్రేక్షకులు కథాంశానికే అధిక ప్రాధాన్యతనిస్తారు, కాంబినేషన్ల కంటే. కథలలో హడావిడి, ఆర్భాటాలకు బదులుగా సహజత్వాన్ని కోరుకుంటారు. అందువల్లనే అక్కడి సినిమాలు తక్కువ బడ్జెట్లో నిర్మితమై ఎక్కువ ఆదరణ పొందుతాయి. ఈ సినిమా కూడా అదే కోవలో రూపొందిందని చెప్పవచ్చు. హాస్యంతో కూడిన కుటుంబ భావోద్వేగాలను ఆవిష్కరించడంలో దర్శకుడు విజయం సాధించాడు. రెక్కలు వచ్చిన పిల్లలు తమ సొంత కుటుంబాల సంతోషాలను చూసుకుంటూ, సొంత ఊళ్లోని తల్లిదండ్రులను పట్టించుకోని సమయం లేని పరిస్థితిని ఈ సినిమా చక్కగా చూపిస్తుంది. పిల్లలు పట్టించుకోక, ఆ విషయాన్ని నలుగురికి చెప్పుకోలేక సతమతమయ్యేవారు ఎందరో ఉన్నారు. అలాంటి కోణాలను ఆవిష్కరిస్తూ ఇంతకుముందు కొన్ని సినిమాలు వచ్చాయి. అయితే ఈ కథ వారికి భిన్నంగా ఒక కొత్త పాయింట్తో ముందుకు నడుస్తుంది. పిల్లలు తమ పట్ల ఎలా ప్రవర్తించినా తల్లిదండ్రులు సర్దుకుపోతుంటారు. తల్లి మనసులో ఏముందో కొంతమంది పిల్లలకు సున్నితంగా చెబితే సరిపోతుంది. కానీ మరికొంతమందికి అది అర్థం కావాలంటే కాస్త కఠినమైన మార్గంలో వెళ్లవలసిందే అని చెప్పడమే ఈ కథలోని ముఖ్య ఉద్దేశ్యం. గ్రామీణ నేపథ్యం, అక్కడి వారి స్వభావాలు, కుటుంబ భావోద్వేగాలు, సహజత్వం ఈ సినిమాకు ప్రధాన బలంగా నిలిచాయి.
సాంకేతిక పనితీరు
జిబి – జోజు దర్శకత్వం వహించిన ఈ సినిమా చాలా సరళమైన కథాంశంతో కనిపిస్తుంది. అయితే పాత్రలను తీర్చిదిద్దిన విధానం, కథను నడిపిన తీరు కుటుంబ ప్రేక్షకులను ఆకట్టుకుంటాయి. ఈ సినిమాను తెరపై కాకుండా, మన పక్కింట్లో జరుగుతున్న సన్నివేశాలను పిట్టగోడపై నుంచి చూస్తున్నట్లుగా అనిపిస్తుంది. మోహన్ లాల్, రాధిక, లలిత, సిద్ధిఖీ, అజూ వర్గీస్ నటన ఆకట్టుకుంటుంది. షాజీ కుమార్ ఫోటోగ్రఫీ, దీపక్ దేవ్ నేపథ్య సంగీతం, సూరజ్ ఎడిటింగ్ కథకు తమ వంతు మద్దతును అందించాయి.
ముగింపు
తల్లి ఎల్లప్పుడూ తన పిల్లల గురించే ఆలోచిస్తుంది. కానీ పిల్లలు తమ ప్రపంచం పెద్దదంటూ ఆ తల్లిని పట్టించుకోవడం మానేస్తారు. అలాంటి పిల్లలను ఆలోచింపజేసే కథ ఇది. ఎలాంటి హడావిడి లేకుండా సహజత్వానికి దగ్గరగా సాగిపోయే ఈ సినిమాను కుటుంబ సభ్యులందరూ కలిసి చూడవచ్చు.
ఇట్టిమని మేడ్ ఇన్ చైనా సినిమా ఎక్కడ తీశారు?
ఈ చిత్రం ప్రధాన చిత్రీకరణను 2019 ఏప్రిల్ 24న ప్రారంభించి జూలైలో ముగించారు, ప్రధానంగా కేరళలో మరియు కొన్ని సన్నివేశాలను చైనాలో చిత్రీకరించారు. ఇట్టిమాని: మేడ్ ఇన్ చైనా విమర్శకుల నుండి మిశ్రమ సమీక్షలతో ప్రపంచవ్యాప్తంగా 6 సెప్టెంబర్ 2019న థియేటర్లలో విడుదలైంది మరియు బాక్సాఫీస్ వద్ద వాణిజ్యపరంగా విజయవంతమైంది.
ఇట్టిమణి కామెడీ సినిమానా?
ఇట్టిమాని: మేడ్ ఇన్ చైనా అనేది కామెడీ, డ్రామా సినిమా .
Read hindi news: hindi.vaartha.com
Read Also: War 2: ‘వార్ 2’ ట్రైలర్ చూసారా!
