ఆధునిక ప్రపంచంలో ప్రచన్నయుద్ధాల నుంచి నేరుగా యుద్ధాలు కూడా ప్రపంచ వ్యాప్తంగా కొనసాగుతూనే ఉన్నాయి. ఇందులో కొన్ని దేశాల దురుద్దేశాలు ఉండటమే ప్రపంచాన్ని అతలాకుతలం చేస్తున్నాయి. ఈ క్రమంలో అమెరికా కొత్త అధ్యక్షుడు ఎవ్వరూ ఊహించని షాకింగ్ కామెంట్స్ చేయటం ఇప్పుడు పెద్ద చర్చకు దారితీస్తోంది. యూఎస్ ప్రెసిడెంట్ ట్రంప్ తాజాగా మయామీలో మాట్లాడుతూ మూడో ప్రపంచ యుద్ధం గురించి కీలక కామెంట్స్ చేశారు. థర్డ్ వరల్డ్ వార్ రావటానికి ఎంతో దూరం లేదని అయితే తాను అధ్యక్షుడిగా ఉండగా దానిని సమర్థవంతంగా నివారిస్తానంటూ చేసిన కామెంట్స్ ప్రపంచ దేశాల నాయకులను ఆశ్చర్యానికి గురిచేసింది. మయామిలో జరిగిన ఫ్యూచర్ ఇన్వెస్ట్మెంట్ ఇనిషియేటివ్ సమ్మిట్లో ట్రంప్ చేసిన ఈ కామెంట్స్ ఒక విధంగా వాస్తవానికి కొంత దూరంగానే ఉన్నాయనే వాదన ఉన్నప్పటికీ ప్రపంచంలో అనేక దేశాల మధ్య జరుగుతున్న పోరును చూస్తుంటే ఇలాంటి పరిస్థితులు వచ్చే అవకాశాలు కూడా పూర్తిగా కొట్టివేయలేనిదిగా చాలా మంది చెబుతున్నారు.
విపత్తును నివారిస్తా
తన నాయకత్వంలో ఇలాంటి విపత్తును నివారిస్తానని అమెరికా అధ్యక్షుడు ప్రపంచానికి హామీ ఇచ్చారు. రష్యా ఉక్రెయిన్, ఇరాన్ ఇరాక్ సహా ప్రపంచ వ్యాప్తంగా మరికొన్ని దేశాల్లో ఉన్న పరిస్థితుల గురించి మాట్లాడుతున్న సందర్భంలో ట్రంప్ ఈ కామెంట్స్ చేశారు. ప్రస్తుతం తాను ఈ యుద్ధాలను ముగించి శాంతిని స్థాపించటం తన కర్తవ్యమని ట్రంప్ అన్నారు. అందరూ చంపబడటం చూసి తాను తట్టుకోలేకపోతున్నానని ఈ సందర్భంగా ట్రంప్ పేర్కొన్నారు. ఈ యుద్ధాలను అంతం చేయడానికి తాను అత్యవసర చర్యలు తీసుకుంటున్నానన్నారు. బైడెన్ అధ్యక్షుడిగా మరో ఏడాది ఉండిఉంటే ఖచ్చితంగా మూడో ప్రపంచ యుద్ధం వచ్చేదంటూ ట్రంప్ అన్నారు. కానీ ఇప్పుడు అలాంటి పరిస్థితులు లేవను ప్రపంచం ప్రశాంతంగా ఉండటానికి తాను కృషి చేస్తున్నట్లు ట్రంప్ వెల్లడించారు.
ఉక్రెయిన్ జెలెన్స్కీ నాశనం చేస్తున్నారు
ఇప్పటికై రష్యా-ఉక్రెయిన్ మధ్య కొనసాగుతున్న యుద్ధాన్ని నివారించటానికి అమెరికా చర్చలు జరుపుతోందని త్వరలోనే దీనికి పరిష్కారం వస్తుందని ఆశాభావం వ్యక్తం చేశారు. ఇందుకు సౌదీ అరేబియా చేస్తున్న ప్రయత్నాలను ట్రంప్ ప్రశంసించారు. తనకు ఇష్టమైన ఉక్రెయిన్ దేశాన్ని జెలెన్స్కీ అనే చెడ్డ నాయకుడు నాశనం చేశాడని కామెంట్ చేశారు. ఈ క్రమంలో జెలెన్స్కీ అనవసరంగా లక్షలాది మంది మరణాలకు కారణమయ్యాడని ట్రంప్ పేర్కొన్నారు.