అమెరికా-కెనడా మధ్య వాణిజ్య యుద్ధం: మార్కెట్లకు పెద్ద షాక్

అమెరికా అధ్యక్షుడు డొనాల్డ్ ట్రంప్ తన నిబంధనలను కఠినంగా అమలు చేయడంలో వెనుకడుగు వేయరని మరోసారి నిరూపించారు. ఆయన తీసుకున్న తాజా నిర్ణయంతో అమెరికా-కెనడా మధ్య వాణిజ్య యుద్ధం మరింత తీవ్రరూపం దాల్చింది.

కెనడాపై 25% టారిఫ్‌లను ప్రకటించిన అమెరికా
ట్రంప్ అధ్యక్ష పదవిని చేపట్టిన తర్వాతే మెక్సికో, కెనడా, చైనా నుండి దిగుమతయ్యే ఉత్పత్తులపై భారీ పన్నులను విధించారు. కెనడాపై 25% టారిఫ్‌లు విధించగా, చైనా వస్తువులపై 10% టారిఫ్ విధిస్తున్నట్లు ప్రకటించారు. చైనా వరల్డ్ ట్రేడ్ ఆర్గనైజేషన్ (WTO) వద్ద అమెరికా చర్యలను చాలెంజ్ చేస్తూ, అదే స్థాయిలో కౌంటర్ టారిఫ్‌లను విధించేందుకు సిద్ధమైంది.

అమెరికా నిర్ణయంపై కెనడా ఘాటైన ప్రతిస్పందన
ట్రంప్ నిర్ణయానికి కౌంటర్‌గా, కెనడా ప్రభుత్వం అమెరికా ఉత్పత్తులపై భారీ ప్రతిస్పందన ప్రకటించింది.
అమెరికా నుంచి దిగుమతయ్యే 20.6 బిలియన్ డాలర్ల విలువైన ఉత్పత్తులపై 25% సుంకాలను విధించనున్నట్లు కెనడా ప్రధాని జస్టిన్ ట్రూడో ప్రకటించారు. ట్రంప్ వెనక్కి తగ్గకపోతే, మూడు వారాల తర్వాత రెండో విడతలో 125 బిలియన్ కెనడియన్ డాలర్ల ఉత్పత్తులపై అదనపు సుంకాలను విధించనున్నట్లు తెలిపారు. ఈ టారిఫ్‌ల ప్రభావం కార్లు, ట్రక్కులు, ఉక్కు, అల్యూమినియం వంటి కీలక ఉత్పత్తులపై పడనుంది.
మార్కెట్లపై తీవ్ర ప్రభావం
ట్రంప్ తాజా చర్యలతో ప్రపంచ మార్కెట్లు తీవ్ర ఒడిదొడుకులకు గురయ్యాయి.
కెనడా డాలర్ విలువ క్షీణించడంతో పాటు, స్టాక్ మార్కెట్లు భారీ నష్టాన్ని చవిచూశాయి.
దీర్ఘకాలికంగా టారిఫ్ యుద్ధం కొనసాగితే, కెనడియన్ ఉత్పత్తి 3% వరకు తగ్గే అవకాశం ఉందని బ్యాంక్ ఆఫ్ కెనడా హెచ్చరించింది.
వాణిజ్య సంబంధాలపై ప్రభావం
అమెరికా-కెనడా ద్వైపాక్షిక వాణిజ్య విలువ 900 బిలియన్ డాలర్లకు చేరుకుంది.
తాజా ఆంక్షలతో ఇరు దేశాల మధ్య ఉన్న వాణిజ్య సంబంధాలు తీవ్రంగా ప్రభావితమయ్యే అవకాశముంది.
అమెరికా రైతులు, వ్యాపార వర్గాలు ఇప్పటికే ఈ సుంకాల ప్రభావాన్ని ఎదుర్కొనే పరిస్థితిలో ఉన్నారని నిపుణులు చెబుతున్నారు. ట్రంప్ విధిస్తున్న అధిక సుంకాలు ప్రపంచ వాణిజ్యానికి అంతరాయం కలిగించవచ్చని ఆర్థికవేత్తలు అంచనా వేస్తున్నారు. ద్రవ్యోల్బణం పెరిగే అవకాశముండటంతో, అమెరికా ప్రజలకు దీని ప్రభావం ప్రత్యక్షంగా పడే అవకాశం ఉంది. ఈ పరిస్థితులు ట్రంప్ ఎన్నికకు ముందు నుంచే అర్థిక నిపుణులు హెచ్చరించినవేనని విశ్లేషకులు వ్యాఖ్యానిస్తున్నారు.
ముందు ఏం జరగనుంది?
ట్రంప్ తన నిర్ణయాన్ని కొనసాగిస్తారా లేదా వెనక్కి తగ్గుతారా అనే అంశంపై ఆసక్తి నెలకొంది.
కెనడా మరింత గట్టి చర్యలు తీసుకుంటుందా? అనేదానిపై ప్రపంచ వ్యాప్తంగా వ్యాపార వర్గాలు నిగహం వహిస్తున్నాయి. ఈ వాణిజ్య యుద్ధం కొనసాగితే, అంతర్జాతీయ మార్కెట్లలో దీని ప్రభావం మరింత తీవ్రమవ్వొచ్చని విశ్లేషకులు అంచనా వేస్తున్నారు.