కొలంబియా విశ్వవిద్యాలయానికి చెందిన యున్సియో చుంగ్, విద్యార్థి నిరసనలలో పాల్గొన్నందుకు బహిష్కరణకు గురయ్యే ప్రమాదంలో ఉన్నారు. ఆమె 7 సంవత్సరాల వయసులో తల్లిదండ్రులతో కలిసి దక్షిణ కొరియా నుండి USకు వలస వచ్చారు. ప్రస్తుతం ఆమె ట్రంప్ పరిపాలన తీసుకున్న నిర్ణయాలను చట్టపరంగా సవాలు చేస్తున్నారు.
విద్యార్థి అరెస్ట్ – ICE బహిష్కరణ చర్యలు
మార్చి 5న, చుంగ్ కొలంబియా విశ్వవిద్యాలయం దగ్గర నిరసనలో పాల్గొనగా NYPD ఆమెను అరెస్ట్ చేసింది.
అరెస్ట్ అయిన కొన్ని రోజుల్లోనే, ICE అధికారులు ఆమెను బహిష్కరించేందుకు అడ్మినిస్ట్రేటివ్ అరెస్ట్ వారెంట్ పై సంతకం చేశారు. మార్చి 10న, ఫెడరల్ అధికారుల ప్రకారం, ఆమె శాశ్వత నివాస హోదాను రద్దు చేస్తున్నట్లు ప్రకటించారు. ICE అధికారులు ఆమె తల్లిదండ్రుల నివాసాన్ని తనిఖీ చేసి, ఇమ్మిగ్రేషన్ పత్రాలు ప్రయాణ రికార్డులను పరిశీలించారు.
పాలస్తీనా అనుకూల నిరసనకారులపై చర్యలు
పాలస్తీనా అనుకూల నిరసనలలో పాల్గొన్నవారిని లక్ష్యంగా చేసుకుని ICE చర్యలు చేపడుతోందని ఆరోపణలు ఉన్నాయి. గాజాలో ఇజ్రాయెల్ చర్యలపై నిరసన తెలిపిన విదేశీ విద్యార్థులను ప్రత్యేకంగా గమనిస్తూ, వారిపై బహిష్కరణ చర్యలు తీసుకుంటున్నట్లు ఆరోపిస్తున్నారు. చుంగ్ తన బహిష్కరణను నిలిపివేయాలని కోరుతూ ఫెడరల్ కోర్టులో కేసు దాఖలు చేశారు. తనపై జరుగుతున్న చర్యలు రాజ్యాంగ విరుద్ధమని, మౌలిక హక్కులను ఉల్లంఘిస్తున్నాయని ఆమె అభిప్రాయపడుతున్నారు.
ఇతర విద్యార్థుల పరిస్థితి
కార్నెల్ విశ్వవిద్యాలయ విద్యార్థి మహమూద్ ఖలీల్, మోమోడౌ తాల్లను కూడా ICE బహిష్కరించాలని చూస్తోంది. తాల్ 31 ఏళ్ల పిహెచ్డి విద్యార్థి, UK, గాంబియా పౌరుడు. యూదు విద్యార్థులకు ప్రతికూల వాతావరణం సృష్టించినట్లు ఆరోపణలతో అతని విద్యార్థి వీసా రద్దు చేశారు. ICE అధికారులు విద్యార్థుల నిరసనలకు అడ్డుపడేలా వ్యూహాలు రచిస్తున్నారని విమర్శలు ఉన్నాయి. హోమ్ల్యాండ్ సెక్యూరిటీ అధికారుల ప్రకారం, చుంగ్ తన ఇమ్మిగ్రేషన్ న్యాయమూర్తి ముందు కేసును సమర్పించే అవకాశం ఉంది.