పాకిస్థాన్ ఆర్మీ చీఫ్, ‘ఫీల్డ్ మార్షల్’ జనరల్ ఆసిమ్ మునీర్(Asim Munir) ప్రస్తుతం అమెరికా(America) అధికారిక పర్యటనలో ఉండగా, అక్కడ ఆయనకు ఊహించని పరిణామం ఎదురైంది. సొంత దేశానికి చెందిన ప్రజలే ఆయనకు వ్యతిరేకంగా తీవ్ర నిరసనలు తెలుపుతూ, “ఫెయిల్డ్ మార్షల్” అంటూ నినాదాలు చేయడం అంతర్జాతీయంగా చర్చనీయాంశమైంది. ఈ ఘటనకు సంబంధించిన దృశ్యాలు ప్రస్తుతం సోషల్ మీడియాలో విస్తృతంగా ప్రచారమవుతున్నాయి. ఆదివారం అమెరికా చేరుకున్న ఆసిమ్ మునీర్, వాషింగ్టన్లోని ఓ హోటల్లో బస చేశారు. ఈ విషయం తెలుసుకున్న పాకిస్థాన్కు చెందిన పలువురు వ్యక్తులు పెద్ద సంఖ్యలో హోటల్ వెలుపల గుమిగూడి ఆయనకు వ్యతిరేకంగా నినాదాలు చేశారు. మునీర్ హోటల్ భవనం నుంచి బయటకు వస్తున్న సమయంలో, నిరసనకారులు “ఆసిమ్ మునీర్, నువ్వు పిరికివాడివి, సిగ్గులేనివాడివి, సామూహిక హంతకుడివి, నియంతవి” అంటూ తీవ్ర పదజాలంతో దూషించారు. పాకిస్థాన్లో ప్రజాస్వామ్యాన్ని ఆసిమ్ మునీర్ ఖూనీ చేస్తున్నారని వారు ఆరోపించారు.
“ఫీల్డ్ మార్షల్ కాదు ఫెయిల్డ్ మార్షల్”
కొంతకాలం క్రితం ‘ఆపరేషన్ సిందూర్’ అనంతరం ఆసిమ్ మునీర్కు పాకిస్థాన్ ప్రభుత్వం ‘ఫీల్డ్ మార్షల్’గా పదోన్నతి కల్పించింది. అయితే, దేశంలోని ఒక వర్గం ప్రజలు ఆయనను “ఫీల్డ్ మార్షల్ కాదు ఫెయిల్డ్ మార్షల్” అంటూ తీవ్రంగా విమర్శిస్తున్నారు.
పీటీఐ మద్దతుదారులు నిరసన
ఈ నిరసనల వెనుక మాజీ ప్రధాని ఇమ్రాన్ ఖాన్ నేతృత్వంలోని పాకిస్తాన్ తెహ్రీక్-ఇ-ఇన్సాఫ్ (పీటీఐ) పార్టీ మద్దతుదారులు ఉన్నట్లు ప్రచారం జరుగుతోంది. ఇమ్రాన్ ఖాన్ అరెస్ట్, పీటీఐ కార్యకర్తలపై జరుగుతున్న దాడులకు ఆసిమ్ మునీరే కారణమని వారు తీవ్ర ఆరోపణలు చేస్తున్నారు. మునీర్ అమెరికా పర్యటన ప్రారంభం కావడానికి ముందే, వాషింగ్టన్లోని పాకిస్థాన్ రాయబార కార్యాలయం వెలుపల కూడా పీటీఐ మద్దతుదారులు నిరసన కార్యక్రమాలు నిర్వహించారు.
Read Also: Iran: వివాదాలకు కేంద్రంగా మారిన ఇరాన్ హార్ముజ్ జలసంధి