ఇజ్రాయెల్ మిలిటరీ ప్రకారం, హమాస్ అప్పగించిన నాలుగు మృతదేహాల్లో ఇద్దరు పిల్లలవి అని ఫోరెన్సిక్ పరిశీలన ద్వారా నిర్ధారణ జరిగింది. ఏరియెల్, ఖీర్ బిబాస్ల మృతదేహాలు గుర్తించి, వారి కుటుంబాలకు సమాచారం అందించామని మిలిటరీ తెలిపింది.
హమాస్ ఇచ్చిన మృతదేహం తల్లి కాదని నిర్ధారణ
హమాస్ విడుదల చేసిన మరో మృతదేహాన్ని బిడ్డల తల్లి షిరీ బిబాస్దిగా భావించినా, DNA పరీక్షలు నిర్వహించిన తర్వాత అది ఆమెది కాదని ఇజ్రాయెల్ స్పష్టం చేసింది.
హమాస్పై ఇజ్రాయెల్ తీవ్ర విమర్శలు
హమాస్ నలుగురు మరణించిన బందీలను అప్పగించాలని ఒప్పందం కుదుర్చుకున్నప్పటికీ, తల్లి మృతదేహం కోసం ఇంకా స్పష్టత లేదు. “ఇది హమాస్ తీవ్ర ఉల్లంఘన” అని ఇజ్రాయెల్ డిఫెన్స్ ఫోర్స్ పేర్కొంది. “మా బందీలందరినీ తిరిగి ఇచ్చేయాలని, ముఖ్యంగా షిరీ బిబాస్ మృతదేహాన్ని కూడా అప్పగించాలని హమాస్ను డిమాండ్ చేస్తున్నాము” అని మిలిటరీ స్పష్టం చేసింది.
కాల్పుల విరమణ మధ్య ఉద్రిక్తతలు
జనవరి 19న ఇజ్రాయెల్ & హమాస్ మధ్య కాల్పుల విరమణ ప్రారంభమైనప్పటికీ, ఉద్రిక్తతలు తగ్గుముఖం పట్టలేదు. సెంట్రల్ ఇజ్రాయెల్లో బస్సులపై వరుస పేలుళ్ల అనంతరం, ఇజ్రాయెల్ భద్రతా పరమైన ఆంక్షలను మరింత కఠినతరం చేసింది. వెస్ట్ బ్యాంక్లో ఇజ్రాయెల్ మిలిటరీ ఉగ్రవాద కేంద్రాలపై భారీ ఆపరేషన్ నిర్వహిస్తుందని ప్రధానమంత్రి బెంజమిన్ నెతన్యాహు కార్యాలయం ప్రకటించింది.
జాతీయ శోకసంద్రం
హమాస్ విడుదల చేసిన మృతదేహాలను నివాళులర్పించేందుకు ఇజ్రాయెల్లో ప్రజలు రోడ్లపై బారులు తీరారు. టెల్ అవీవ్ స్క్వేర్లో వేలాది మంది భావోద్వేగ రాత్రి జాగరణ నిర్వహించి తమ దుఃఖాన్ని వ్యక్తం చేశారు. ఈ పరిణామాలు ఇజ్రాయెల్-హమాస్ యుద్ధంలో మానవీయ సంక్షోభాన్ని మరింత పెంచే అవకాశం ఉందని విశ్లేషకులు చెబుతున్నారు.