న్యూజిలాండ్(New zealand)లో భారత సంతతికి చెందిన నేహా శర్మ(Neha Sharma), అమన్దీప్ శర్మ(Anudeep Sharma) అనే దంపతులు అక్కడి ప్రభుత్వ శిశు సంక్షేమ సంస్థ(Govt Child Welfare) ‘ఒరంగ తమరికీ’కి భారీగా కుచ్చుటోపీ పెట్టారు. సుమారు 2 మిలియన్ న్యూజిలాండ్ డాలర్లు (భారత కరెన్సీలో రూ.10 కోట్లకు పైగా) మోసం చేసినట్లు వీరిపై ఆరోపణలు రుజువయ్యాయి. ఈ కేసులో ప్రధాన నిందితురాలైన నేహా శర్మకు మూడేళ్ల జైలు శిక్ష విధిస్తూ న్యాయస్థానం తీర్పు వెలువరించింది. మోసం ద్వారా ఆర్థిక లబ్ధి పొందడం, మనీలాండరింగ్, నకిలీ పత్రాల వినియోగం వంటి పలు అభియోగాలను ఆమె అంగీకరించారు. ఆమె భర్త అమన్దీప్ శర్మ కూడా మోసం, మనీలాండరింగ్ ఆరోపణలను అంగీకరించినట్లు సమాచారం.
నకిలీ ఉద్యోగ ధృవపత్రాలను సమర్పించి ఉద్యోగం
వివరాల్లోకి వెళితే, నేహా శర్మ ‘ఒరంగ తమరికీ’ సంస్థలో ప్రాపర్టీ అండ్ ఫెసిలిటీస్ మేనేజర్గా పనిచేసేవారు. ఆమె భర్త అమన్దీప్ ‘డివైన్ కనెక్షన్’ పేరుతో ఓ నిర్మాణ సంస్థను నడిపేవారు. నేహా శర్మ నకిలీ ఉద్యోగ ధృవపత్రాలను సమర్పించి 2021లో ఈ సంస్థలో చేరారు. తన అధికారిక హోదాను అడ్డుపెట్టుకుని, భర్త కంపెనీకి అక్రమంగా కాంట్రాక్టులు కట్టబెట్టారు. 2021 జూలై నుంచి 2022 అక్టోబరు మధ్య కాలంలో, సుమారు 200కు పైగా నిర్వహణ పనులను, 326 పెంచిన ధరలతో కూడిన ఇన్వాయిస్లను భర్త కంపెనీకి మళ్లించారు. తామిద్దరూ భార్యాభర్తలమన్న విషయాన్ని సంస్థ యాజమాన్యం దృష్టికి తీసుకురాకుండా ప్రయోజనాల వైరుధ్యం నిబంధనలను ఉల్లంఘించారు.
బ్యాంకు ఖాతాల్లో భారీగా నగదు
2022 అక్టోబరులో ఒకే కాంట్రాక్టర్కు పదేపదే పనులు అప్పగించడంపై అనుమానం రావడంతో ఈ కుంభకోణం వెలుగులోకి వచ్చింది. విచారణకు హాజరు కావాల్సి ఉండగా, దంపతులిద్దరూ వ్యాపార తరగతి విమానంలో చెన్నైకి పారిపోయారు. అయితే, కొద్దికాలంలోనే వారిని పట్టుకుని న్యూజిలాండ్కు రప్పించారు. వారి వద్ద మూడు ఆస్తులు, మూడు కార్లు, బ్యాంకు ఖాతాల్లో భారీగా నగదు ఉన్నట్లు గుర్తించారు. భవిష్యత్తులో ఇలాంటి మోసాలు పునరావృతం కాకుండా కఠిన చర్యలు తీసుకుంటున్నామని ‘ఒరంగ తమరికీ’ సంస్థ ప్రకటించింది.
Read Also: Gaza: గాజాలో 14 వేల శిశువుల ప్రాణాలకు ముప్పు: ఐరాస