అమెరికా అధ్యక్షుడు డొనాల్డ్ ట్రంప్(Donald Trump), స్పేస్ ఎక్స్ అధినేత, ప్రపంచ కుబేరుడు ఎలాన్ మస్క్(Elon Musk) మధ్య వివాదం రోజురోజుకు ముదురుతున్నది. నిన్నమొన్నటి వరకు చెట్టాపట్టాలేసుకుని తిరిగిన ఈ ఇద్దరూ ఇప్పుడు ఒకరిపై ఒకరు కత్తులు దూసుకుంటున్నారు. ఈ క్రమంలో గురువారం బిగ్ బ్యూటీఫుల్ బిల్లుపై ట్రంప్(Trump)ను ఉద్దేశించి మస్క్ నేరుగానే విమర్శలు గుప్పించారు. ట్రంప్ను అభిశంసించి, ఆ స్థానంలో ఉపాధ్యక్షుడు జేడీ వాన్స్ను అధ్యక్షుడిగా చేయాలని డిమాండ్ చేశారు. అంతేకాకుండా సెక్స్ కుంభకోణంలో నిందితుడైన జెఫ్రీ ఎప్స్టీన్తో ట్రంప్నకు సంబంధాలున్నాయని, ఎప్స్టీన్ ఫైల్స్లో ట్రంప్ పేరుందని, అందుకే దానిని ఆయన బయటపెట్టడం లేదంటూ సంచలన ఆరోపణలు చేశారు.
ట్రంప్ ప్రకటనతో టెస్లా షేర్లు 14.3 శాతం నష్టం
‘మా బడ్జెట్లో నిధులను, బిలియన్ల కొద్దీ డాలర్లను ఆదా చేయాలంటే సులభమైన మార్గం ఎలాన్ మస్క్కు ఇచ్చిన ప్రభుత్వ సబ్సిడీలను, కాంట్రాక్టులను రద్దు చేయడమే’ అంటూ ట్రంప్ తన ట్రూత్ సోషల్లో పేర్కొన్నారు. ట్రంప్ ప్రకటనతో టెస్లా షేర్లు 14.3 శాతం నష్టపోయి, 150 బిలియన్ డాలర్ల సంపద ఆవిరైంది. ఒకే రోజు ఇంత గరిష్ట స్థాయిలో నష్టపోవడం టెస్లా చరిత్రలో ఇదే ప్రథమం. ఇది జరిగిన కొద్ది సేపటికి ట్రంప్ను అధ్యక్ష పదవి నుంచి అభిశంసించాలంటూ మస్క్ ఎక్స్లో పోస్ట్ పెట్టారు. ‘చూడండి.. ఎలాన్, నేను గొప్ప సంబంధాన్ని కలిగి ఉన్నాము. ఇక ముందు ఇలాగే ఉంటామో లేదో తెలియదు’ అని ట్రంప్ అంటుండగానే దానికి మస్క్ తీవ్రంగా లైవ్లోనే స్పందించారు. ‘నేను లేకుంటే ట్రంప్ ఎన్నికల్లో ఓడిపోయేవాడు. ట్రంప్, ఇతర రిపబ్లికన్లకు దాదాపు 300 బిలియన్ డాలర్లు ఖర్చు చేశాం. ఇదా కృతజ్ఞతా?’ అని మస్క్ ప్రశ్నించారు.
Read Also: Bangladesh Elections : వచ్చే ఏడాది బంగ్లాదేశ్ ఎన్నికలు