అమెరికాలో ఉన్నత విద్యను అభ్యసించాలని కలలు కంటున్న భారతీయ విద్యార్థులకు పరిస్థితులు అనుకూలంగా లేవు. ఒకప్పుడు ఎంతో ఆశావహంగా కనిపించిన అమెరికా కల, ఇప్పుడు ఆందోళనలు, భయాలతో నిండిన పీడకలగా మారుతోంది. డొనాల్డ్ ట్రంప్ రెండోసారి అధ్యక్షుడిగా వచ్చాక మారిన పరిస్థితులు, కొత్త విధానాలు, కఠినమైన వీసా నిబంధనలు, పెరుగుతున్న జీవన వ్యయం, ఉద్యోగ అవకాశాలు తగ్గిపోవడం వంటి కారణాల వల్ల భారతీయ విద్యార్థులు అనేక సవాళ్లను ఎదుర్కొంటున్నారు.
సోషల్ మీడియాలో ప్రభుత్వ వ్యతిరేక పోస్టులు
కొంతమంది విద్యార్థులు అతి వేగంగా వాహనం నడిపినందుకు లేదా సోషల్ మీడియాలో ప్రభుత్వ వ్యతిరేక పోస్టులు పెట్టినందుకు వీసాలు రద్దు చేస్తున్నారని ఆవేదన వ్యక్తం చేస్తున్నారు. దీనివల్ల విద్యార్థులు చిన్న పొరపాటు జరిగినా తమ భవిష్యత్తు అంధకారమవుతుందని ఆందోళన చెందుతున్నారు.
మా భవిష్యత్తు అగమ్యగోచరంగా ఉంది
“నేను ఎప్పుడూ భయంతో బతకాల్సి వస్తోంది. ఇక్కడ ఏం జరుగుతుందో అర్థం కావడం లేదు. మా భవిష్యత్తు అగమ్యగోచరంగా ఉంది” అని ఓ విద్యార్థి ఆవేదన వ్యక్తం చేశాడు. పేరు చెప్పడానికి ఇష్టపడని ఒక విద్యార్థి మాట్లాడుతూ, “మా స్నేహితుడు ఒక చిన్న ట్రాఫిక్ ఉల్లంఘన కారణంగా తన వీసాను కోల్పోయాడు. అతను వెంటనే భారతదేశానికి తిరిగి వెళ్లాల్సి వచ్చింది.
ఇక్కడ చదువుకోవడం చాలా ఖరీదైన వ్యవహారం
అమెరికాలోని కొన్ని కళాశాలలు అంతర్జాతీయ విద్యార్థుల వీసాల రద్దుకు సంబంధించిన సంఘటనలు పెరుగుతున్నాయని ధృవీకరించాయి. ముఖ్యంగా భారతీయ విద్యార్థులు ఎక్కువగా ప్రభావితమవుతున్నారని తెలిపాయి. దీనికి తోడు, అమెరికాలో చదువుకోవడం చాలా ఖరీదైన వ్యవహారం. ట్యూషన్ ఫీజులు, వసతి ఖర్చులు, ఆహార ఖర్చులు విపరీతంగా పెరిగిపోయాయి.
వీసా నిబంధనలు కఠినంగా ఉంటున్నాయి
ఉద్యోగాల విషయంలోనూ నిరాశ ఎదురవుతోంది. చదువు పూర్తయిన తర్వాత ఉద్యోగం పొందడం అంత సులభం కాదు. వీసా నిబంధనలు కఠినంగా ఉండటం, కంపెనీలు విదేశీయులను నియమించడానికి వెనకాడటం వంటి కారణాల వల్ల ఉద్యోగ అవకాశాలు తగ్గిపోతున్నాయి.