Charlie Kirk and Trump : డొనాల్డ్ ట్రంప్కు మద్దతుదారుడిగా, “మేక్ అమెరికా గ్రేట్ అగేన్” ఉద్యమానికి చిహ్నంగా నిలిచిన కన్సర్వేటివ్ నాయకుడు చార్లీ కిర్క్ (31) బుధవారం యుటా వ్యాలీ యూనివర్సిటీలో జరిగిన సభలో కాల్చిచంపబడ్డాడు. (Charlie Kirk and Trump) వేలాది మందికి ప్రసంగిస్తుండగా జరిగిన ఈ ఘటనను ప్రత్యక్షంగా కెమెరాలు రికార్డ్ చేశాయి.
కిర్క్ గన్ హింసపై ఒక ప్రశ్నకు సమాధానం ఇస్తుండగా ఒక్కసారిగా తూటా శబ్ధం వినిపించింది. అతని మెడ నుంచి రక్తం కారడం మొదలైంది. కొద్దిసేపు మైక్ పట్టుకుని నిలబడ్డ అతను వెంటనే కూలిపోయాడు. ప్రేక్షకులు భయంతో అరుస్తూ, పరుగులు తీస్తూ ప్రాంగణాన్ని విడిచిపెట్టారు.
యుటా పబ్లిక్ సేఫ్టీ కమిషనర్ బో మేసన్ ప్రకారం, ఇది పూర్తిగా ఒకే వ్యక్తిని లక్ష్యంగా చేసుకున్న హత్య అని అనుమానిస్తున్నారు. తూటా విశ్వవిద్యాలయ భవనం పైకప్పు నుంచి కాల్చినట్టుగా కనిపించిందని తెలిపారు. మొదట అనుమానితులుగా పట్టుబడిన ఇద్దరిని పోలీసులు విచారణ తర్వాత విడుదల చేశారు. దుండగుడు కోసం డోర్ టు డోర్ మాన్హంట్ కొనసాగుతోంది.
ఈ హత్యకు సంబంధించిన వీడియోలు క్షణాల్లోనే సోషల్ మీడియాలో వైరల్ అయ్యాయి. ముఖ్యంగా కిర్క్ గాయపడి రక్తం కారుతున్న వీడియో 11 మిలియన్లకుపైగా వ్యూస్ సాధించింది. తరువాత అవి యూట్యూబ్, టెలిగ్రామ్, థ్రెడ్స్ వంటి వేదికల్లో విస్తరించాయి.
డొనాల్డ్ ట్రంప్ ఈ హత్యను “అమెరికాకు చీకటి క్షణం”గా పేర్కొన్నారు. “చార్లీ మా ఉద్యమానికి, మా దేశ భవిష్యత్తుకు యోధుడు. అతని స్వరం మరింత బలంగా వినిపిస్తూనే ఉంటుంది” అని తెలిపారు. రాజకీయ హింసను అరికట్టేందుకు కఠిన చర్యలు తీసుకుంటామని హామీ ఇచ్చారు.
చార్లీ కిర్క్ ఒక ప్రముఖ కన్సర్వేటివ్ పోడ్కాస్టర్. టర్నింగ్ పాయింట్ యూఎస్ఏ అనే యువజన సంస్థ స్థాపకుడు. ఆయన గన్ హక్కుల పట్ల బలమైన మద్దతు ప్రకటించేవారు. గతంలో కూడా “ప్రతి సంవత్సరం కొంతమంది గన్ హింసలో చనిపోవడమే అయినా, మిగతా హక్కులను కాపాడటానికి సెకండ్ అమెండ్మెంట్ అవసరం” అని వ్యాఖ్యానించారు.
ఈ కార్యక్రమానికి ముందే వ్యతిరేకత చెలరేగింది. వేలాది మంది విద్యార్థులు, పౌరులు పిటిషన్ వేసి సభను రద్దు చేయాలని కోరారు.
FBI ప్రకటన
ఎఫ్బీఐ డైరెక్టర్ కశ్ పటేల్ ప్రకారం, హత్య కేసులో కస్టడీలో ఉన్న ఒకరిని ప్రశ్నల తర్వాత విడుదల చేశారు. “మా దర్యాప్తు కొనసాగుతోంది. పారదర్శకత కోసం మరిన్ని వివరాలు సమయానుకూలంగా వెల్లడిస్తాము” అని చెప్పారు.
యుటా వ్యాలీ యూనివర్సిటీ నేపథ్యం
యుటా వ్యాలీ యూనివర్సిటీ రాష్ట్రంలోనే అతిపెద్ద పబ్లిక్ యూనివర్సిటీ. 1941లో వృత్తి శిక్షణా పాఠశాలగా ప్రారంభమైన ఇది 1990లలో డిగ్రీలు ఇవ్వడం మొదలు పెట్టింది. ప్రస్తుతం దాదాపు 47,000 మంది విద్యార్థులు ఇక్కడ చదువుతున్నారు. బిజినెస్, సైకాలజీ ప్రధాన కోర్సులుగా ఉన్నాయి.
విశ్వవిద్యాలయం సాల్ట్ లేక్ సిటీకి 40 మైళ్ళ దూరంలో ఉంది. అదే ప్రాంతంలో బ్రిగామ్ యంగ్ యూనివర్సిటీ కూడా ఉంది. యుటా రాష్ట్రం పబ్లిక్ క్యాంపస్లలో గన్స్ క్యారీకి అనుమతించే 14 రాష్ట్రాల్లో ఒకటి.
యూనివర్సిటీకి “వుల్వెరిన్స్” అనే బాస్కెట్బాల్ జట్లు ఉన్నాయి, ఇవి వెస్ట్రన్ అథ్లెటిక్స్ కాన్ఫరెన్స్లో పోటీపడుతాయి.
Read also :
