సోషల్ మీడియా పరిచయాన్ని నమ్మి బ్రిటన్కు చెందిన ఒక యువతి భారతదేశానికి వచ్చి, అక్కడ ఓ వ్యక్తి చేతిలో ఘోరంగా మోసపోయింది. దిల్లీలోని మహిపాల్పుర్ ప్రాంతంలో ఆమె హోటల్ గదిలో లైంగిక దాడికి గురయ్యిందని పోలీసులు తెలిపారు. బ్రిటన్కు చెందిన యువతి ఇన్స్టాగ్రామ్లో భారతీయుడు కైలాశ్తో పరిచయం ఏర్పడింది. కైలాశ్ దిల్లీలో ఓ ప్రైవేట్ కంపెనీలో పనిచేస్తున్నాడు. యువతి భారతదేశం పర్యటన కోసం మహారాష్ట్ర, గోవా వెళ్లింది. కైలాశ్ను అక్కడికి రావాలని కోరినా, అతడు రాలేనని చెప్పి దిల్లీ రావాలని ఒత్తిడి చేశాడు.
హోటల్ గదిలో అమానుషం
యువతి దిల్లీ చేరుకుని మహిపాల్పుర్ ప్రాంతంలో హోటల్ గదిని బుక్ చేసింది. అక్కడ కైలాశ్ ఆమెను కలవడానికి వచ్చి, అభ్యంతరకరంగా ప్రవర్తించాడు. అతడు మరో స్నేహితుడితో కలిసి అతిక్రూరంగా లైంగిక దాడికి పాల్పడ్డాడు. బాధితురాలు వారి నుండి తప్పించుకుని హోటల్ రిసెప్షన్కు చేరుకుని పోలీసులకు సమాచారం అందించింది.
పోలీసుల విచారణ – నిందితుల అరెస్ట్
బాధితురాలు ఫిర్యాదు చేయడంతో దిల్లీ పోలీసులు కేసు నమోదు చేశారు. తనపై జరిగిన దాడిలో మొదట కైలాశ్ అత్యాచారానికి పాల్పడ్డాడని, తరువాత, లిఫ్ట్లో ఉన్న సమయంలో అతని స్నేహితుడు లైంగికంగా వేధించాడని బాధితురాలు పేర్కొంది. పోలీసులు నిందితులను అరెస్ట్ చేసి, విచారణ కొనసాగిస్తున్నారు.
బ్రిటన్ యువతి ఫిర్యాదుతో ఈ ఘటన బ్రిటన్ హైకమిషన్ దృష్టికి తీసుకెళ్లారు.
భాషా అంతరాన్ని దాటి మోసగించిన నిందితుడు
బాధితురాలితో ఇంగ్లీష్ మాట్లాడేందుకు ఇబ్బంది పడ్డ కైలాశ్, గూగుల్ ట్రాన్స్లేట్ ఉపయోగించినట్లు ఆమె ఫిర్యాదులో పేర్కొంది. భాషా అంతరాన్ని దాటి నమ్మకాన్ని పొందేందుకు అతడు ఈ వ్యూహాన్ని ఉపయోగించాడని పోలీసులు అనుమానిస్తున్నారు.