టాలీవుడ్ హీరో న్యాచురల్ స్టార్ గా శైలేష్ కొలను తెరకెక్కించిన యాక్షన్ ఎంటర్టైనర్ హిట్ 3. ఈ సినిమాపై అంచనాలు భారీగా ఉన్నాయి. పైగా హిట్ ఫ్రాంచైజీ నుంచి వస్తున్న సినిమా కావడంతో ఆసక్తి పెరిగిపోయింది. మరి హిట్ 3 ఆడియన్స్ పెట్టుకున్న నమ్మకాన్ని నిలబెట్టుకుందా ? నాని మరోసారి నిర్మాతగా సక్సెస్ అయ్యాడా? లేదన్నది రివ్యూ లో చూద్దాం.
కథ
విధి నిర్వహణ విషయంలో ఎంతకన్నా తెగించే పోలీస్ ఆఫీసర్ అర్జున్ సర్కార్ ఐపీఎస్(నాని). క్రిమినల్ అనేవాడు నేలలో ఆరడుగుల హోల్లో నైనా ఉండాలి. లేకపోతే పోలీస్ సెల్లోనైనా ఉండాలనే తత్వం అతనిది. ఒక క్రిమినల్ని చంపే క్రమంలో వందమంది అమాయకులు చచ్చినా తను కేర్ చేయడు. చేతికి దొరికిన క్రిమినల్స్కి నరకం చూపించి మరీ చంపుతాడు. ఇదిలావుంటే ఓ సైకో కిల్లర్ వరుసగా హత్యలు చేస్తూ పోలీసులకు తలనొప్పిగా మారతాడు. తాను చంపడమే కాక, ఓ వెబ్సైట్ని ఏర్పాటు చేసి, ఆ వెబ్సైట్ ద్వారా ఓ సైకో సామ్రాజ్యాన్నే క్రియేట్ చేస్తాడు. అమాయకుల్ని పాశవికంగా చంపుతూ వీడియోలు తీసి ఆ వెబ్సైట్లో అప్లోడ్ చేస్తుంటారు. దేశంలో ఉన్న సైకోలంతా ఈ వెబ్సైట్ మెంబర్లే. అలాంటి ఓ సైకో సామ్రాజ్యాన్ని నిర్వీర్యం చేసే బాధ్యతను అర్జున్ సర్కార్ తీసుకుంటాడు. మరి ఆ సైకో సామ్రాజ్యంలోకి అర్జున్ ఎలా ప్రవేశించాడు? ఏ విధంగా అక్కడ దుష్టసంహారం చేశాడు? అనేది మిగతా కథ.
కథనం
కమర్షియల్ సినిమాల విషయంలో కొత్త కథలను కోరుకోవడం ప్రేక్షకులకు ఇప్పుడున్న పరిస్థితుల్లో అత్యాశే అవుతుంది. కథ పాతదైనా దాన్ని కొత్తగా ఎలా ప్రజెంట్ చేశాడు. అనేది మాత్రమే ఇప్పుడు ముఖ్యం. ఈ విషయంలో దర్శకుడు శైలేష్ కొలను సక్సెస్ అయ్యాడనే చెప్పాలి. ఈ సినిమాకు కథనం హైలైట్. నాని పోషించిన అర్జున్ సర్కార్ పాత్ర అరెస్ట్ అవ్వడంతో ఈ సినిమా కథ మొదలైంది. అలా ఓ ప్రశ్నతో కథను మొదలుపెట్టి దానికి ఆసక్తికరమైన సమాధానం ఇచ్చాడు దర్శకుడు. ప్రథమార్ధం అంతా స్క్రీన్ప్లే బేస్డ్గా సినిమా సాగింది. స్ట్రయిట్ నేరేషన్లో కాకుండా, హాఫ్వేలో సినిమా మొదలుపెట్టి ప్రేక్షకుల మనసుల్లో ఏర్పడిన చిక్కుముళ్లను ఒక్కొక్కటి విప్పుతూ సెకండాఫ్ దాకా ఇంట్రస్టింగ్గా సినిమా నడిపించాడు. ఇక సెకండాఫ్ మొత్తం సినిమా స్ట్రయిట్ నేరేషన్. ఓ విధంగా 80లో చిరంజీవి నటించిన ‘కిరాతకుడు’ సినిమాను గుర్తు చేస్తుంది. విలన్ సామ్రాజ్యంలోకి హీరో ఒక్కడే అడుగుపెట్టడం అక్కడున్న రహస్యాలన్నింటినీ తెలుసుకునే క్రమంలో హీరో పలు ప్రమాదాల్లో ఇరుక్కోవడం అందులోంచి బయటపడేందుకు చేసే ప్రయత్నాలు ఇవన్నీ నిజంగా మాస్ ప్రేక్షకులకు విజువల్ ఫీస్టే. అసలు అర్జున్ సర్కార్ క్యారక్టర్ ఇంట్రో నుంచే ఆ పాత్రపై ఆసక్తిని రేకెత్తించాడు దర్శకుడు శైలేష్ కొలను. క్రిమినల్స్తో తను గడిపే సన్నివేశాలు.క్రిమినల్స్ని తను చంపే సన్నివేశాలు నిజంగా ఆడియన్స్కి వణుకు పట్టిస్తాయి. ఓ వైపు శత్రు సంహారం భయంకరంగా జరుగుతుంటే మరోవైపు చాగంటిగారి ప్రవచనాలు వినిపించడం విభిన్నంగా ఉంది. మొత్తంగా శైలేష్ ‘హిట్’ మూడో భాగాన్ని కూడా జనం మెచ్చేలాగే తీశాడు. కానీ సినిమాలో హింస మరీ ఎక్కువైంది. ముఖ్యంగా సెకండాఫ్లో అయితే తెర మొత్తం రక్తసిక్తమే. కానీ హీరో అలా స్పందిచడానికి బలమైన కారణం ఉండటం వల్ల ఆ హింస కూడా జనరంజకంగానే ఉందని చెప్పాలి. చివర్లో అడవి శేషు సడన్ ఎంట్రీకి మంచి స్పందన వచ్చింది. ఇక ‘హిట్ 4’ అంటూ కార్తీ ఎంటర్ అవ్వగానే థియేటర్ దద్దరిల్లిపోయింది.
