TTD Adulterated Ghee Case : ఏడుగురు అధికారులకు నోటీసులు

TTD Adulterated Ghee : తిరుమల తిరుపతి దేవస్థానం (TTD) శ్రీవారి లడ్డూ ప్రసాదం నెయ్యి కల్తీ ఉదంతంలో ఆంధ్రప్రదేశ్ ప్రభుత్వం మరో కీలకమైన ముందడుగు వేసింది. ఈ వ్యవహారంపై సుదీర్ఘంగా విచారణ జరిపిన ప్రత్యేక విచారణ బృందం (SIT) సమర్పించిన నివేదిక ఆధారంగా రాష్ట్ర కార్మిక శాఖ తాజాగా ఏడుగురు ప్రభుత్వ అధికారులకు వేర్వేరుగా నోటీసులు జారీ చేసింది. నోటీసులు అందుకున్న వారిలో నాటి ఫ్యాక్టరీల డిప్యూటీ చీఫ్ ఇన్‌స్పెక్టర్ పరమేశ్వరరావు, సూపర్‌వైజర్ రమేష్‌బాబులతో పాటు నెయ్యి నాణ్యతను, ఫ్యాక్టరీ నిబంధనలను పర్యవేక్షించాల్సిన పలువురు బాయిలర్, ఫ్యాక్టరీ ఇన్‌స్పెక్టర్లు ఉన్నారు. తిరుమలకు సరఫరా అయ్యే నెయ్యి ప్లాంట్లలో మరియు తయారీ కేంద్రాలలో నాణ్యతా ప్రమాణాల తనిఖీల్లో ఈ అధికారులు తీవ్రమైన నిర్లక్ష్యం వహించారని, లడ్డూ నెయ్యి కల్తీకి పరోక్షంగా కారణమయ్యారని సిట్ ప్రాథమిక ఆధారాలతో నిరూపించింది.

Adulterated Ghee: ప్యారడైజ్ హోటల్‌లో కల్తీ నెయ్యి గుర్తింపు

నిరూపితమైన నిర్లక్ష్యం, అవినీతి.. 10 రోజుల్లో వివరణ ఇవ్వాలని ఆదేశం!

కల్తీ నెయ్యి సరఫరా చేస్తున్న సంస్థలకు అనుకూలంగా వ్యవహరించడంలో మరియు తనిఖీలను గాలికొదిలేయడంలో ఈ అధికారులపై వచ్చిన అవినీతి ఆరోపణలు నిజమేనని సిట్ తన దర్యాప్తులో తేల్చింది. కోట్లాది మంది హిందువుల సెంటిమెంట్‌తో ముడిపడి ఉన్న తిరుమల లడ్డూ ప్రసాదం విషయంలో ఇంతటి భారీ అవినీతి, నిర్లక్ష్యానికి పాల్పడటంపై ప్రభుత్వం అత్యంత కఠినంగా వ్యవహరిస్తోంది. ఈ నేపథ్యంలోనే సదరు ఏడుగురు అధికారులపై ఎందుకు క్రమశిక్షణా చర్యలు తీసుకోకూడదో వివరించాలని, నోటీసులు అందిన 10 రోజుల్లోగా తమకు లిఖితపూర్వక వివరణ సమర్పించాలని కార్మిక శాఖ స్పష్టం చేసింది. ఒకవేళ నిర్ణీత గడువులోగా అధికారులు సరైన వివరణ ఇవ్వకపోతే, వారిని ఉద్యోగాల నుండి తొలగించడమే కాకుండా క్రిమినల్ కేసులు నమోదు చేసేందుకు సైతం కూటమి ప్రభుత్వం సిద్ధమవుతోంది.