దేశ భద్రతపై కీలక సమావేశం: రాజ్నాథ్ సింగ్తో త్రివిధ దళాధిపతుల భేటీ
భారతదేశానికి ఎదురవుతున్న భద్రతా సవాళ్ల నేపథ్యంలో ఈరోజు ఉదయం న్యూఢిల్లీలో కేంద్ర రక్షణమంత్రి రాజ్నాథ్ సింగ్ కీలక సమావేశం నిర్వహించారు. ఈ భేటీలో త్రివిధ దళాధిపతులు (ఆర్మీ, నేవీ, ఎయిర్ఫోర్స్ చీఫ్స్), చీఫ్ ఆఫ్ డిఫెన్స్ స్టాఫ్ (CDS) అనిల్ చౌహాన్ పాల్గొన్నారు. గురువారం రాత్రి పాక్ దాడులను భారత బలగాలు సమర్థంగా తిప్పికొట్టిన అనంతరం ఈ సమావేశం జరగడం గమనార్హం. పాక్ నిరంతర దుశ్చర్యలపై సమగ్ర సమీక్షకు ఈ భేటీ వేదికైంది.
పాకిస్థాన్ దూకుడు.. భారత బలగాల ప్రతీకారం
గురువారం రాత్రి నుంచి పాకిస్థాన్ విపరీత దూకుడు ప్రదర్శించింది. రాజస్థాన్, గుజరాత్ సరిహద్దుల్లోకి డ్రోన్లు, మిస్సైళ్లు పంపించి దాడులకు తెగబడింది. పఠాన్కోట్, ఉధంపూర్, జమ్మూ ప్రాంతాల్లోని భారత సైనిక స్థావరాలపై పాక్ దళాలు ప్రణాళికబద్ధంగా దాడికి యత్నించాయి. కానీ, భారత బలగాలు అప్రమత్తంగా స్పందించి ఈ దాడులను సమర్థంగా తిప్పికొట్టాయి. దీంతో పాటు ఎల్ఓసీ వెంబడి ఉన్న పాక్ ఆర్మీ పోస్టులను ధ్వంసం చేస్తూ, పాక్కు గట్టి హెచ్చరిక పంపించింది.
ఆపరేషన్ సిందూర్తో భారత సైన్యం సర్జికల్ దాడులు
పహల్గామ్లో జరిగిన ఉగ్రదాడికి ప్రతీకారంగా భారత సైన్యం చేపట్టిన “ఆపరేషన్ సిందూర్”. పాక్ ఆక్రమిత కశ్మీర్ (POK) సహా పాక్ భూభాగంలోని తొమ్మిది కీలక ఉగ్ర స్థావరాలపై ఈ దాడులు కొనసాగాయి. ఎయిర్ స్ట్రైక్స్, లాంగ్ రేంజ్ మిస్సైల్లు వాడుతూ ఉగ్ర ముఠాలను అణచివేసింది. ఈ దాడుల్లో సుమారు 100 మంది ఉగ్రవాదులు మృతిచెందినట్లు రక్షణ శాఖ వర్గాలు వెల్లడించాయి. ఇంకా ఆపరేషన్ కొనసాగుతోందని, అవసరమైతే మరిన్ని దాడులు జరిపేందుకు సిద్ధంగా ఉన్నామని రక్షణమంత్రి అఖిలపక్ష సమావేశంలో స్పష్టం చేశారు.
పాక్కు భారత్ స్పష్టం: దాడులకు ప్రతిదాడే ప్రత్యుత్తరం
వక్రబుద్ధితో పాక్ కొనసాగిస్తున్న దాడులకు భారత్ బలంగా స్పందిస్తోంది. ఇటీవలి సంఘటనలు ఈ విషయాన్ని స్పష్టంగా రుజువు చేస్తున్నాయి. ఇప్పటికే పాక్ ఆర్మీని సరిహద్దుల్లో నిష్క్రియంగా మారుస్తూ, దేశ భద్రతను పటిష్టంగా కాపాడుతున్న భారత బలగాలకు దేశం హర్షం వ్యక్తం చేస్తోంది. కేంద్ర ప్రభుత్వం, రక్షణ శాఖ సమన్వయంతో జరుగుతున్న ప్రతిస్పందనలు పాక్కు గట్టి సందేశాన్ని ఇచ్చాయి.
మోదీ సర్కార్ ధీమా: దేశాన్ని రక్షించేందుకు అన్ని స్థాయిలలో స్పందన
దేశ భద్రతా వ్యవస్థ మొత్తం ఇప్పుడు అలెర్ట్ మోడ్లో ఉంది. మోదీ సర్కార్ నేతృత్వంలో అన్ని మిలిటరీ, ఇంటెలిజెన్స్, డిప్లొమాటిక్ విభాగాలు సమన్వయంతో పనిచేస్తున్నాయి. శత్రుదేశం కుట్రలకు ఇక దేశం తలొగ్గబోదని, అవసరమైతే మరింత కఠిన చర్యలు తీసుకుంటామని అధికార వర్గాలు స్పష్టం చేశాయి.
Read also: Union Minister: కేంద్రమంత్రి రామ్మోహన్ నాయుడికి భద్రత పెంపు ఎందుకంటే?