బాలీవుడ్ నటుడు ఆమిర్ఖాన్ ప్రధాన పాత్రలో నటిస్తున్న తాజా చిత్రం ‘సితారే జమీన్ పర్’ (Sitaare Zameen Par). ‘సబ్ కా అప్న అప్న నార్మల్’ అనేది ఉపశీర్షిక. ఆర్ఎస్ ప్రసన్న దర్శకత్వం వహిస్తున్న ఈ సినిమాలో జెనీలియా(Genelia) కథానాయికగా నటిస్తున్నారు. ఆమిర్ఖాన్ ప్రొడక్షన్స్ బ్యానర్పై ఆమిర్ఖాన్,అపర్ణ పురోహిత్ ఈ చిత్రాన్ని నిర్మిస్తున్నారు. ఈ సినిమా జూన్ 20న ప్రేక్షకుల ముందుకు రాబోతుంది. అయితే ఈ సినిమాను తాజాగా తెలుగులో కూడా విడుదల చేయబోతున్నారు మేకర్స్. ఈ సందర్భంగా తెలుగు ట్రైలర్ను విడుదల చేశారు.
ట్రైలర్
ఈ ట్రైలర్ ను బట్టి ఒక హృద్యమైన, భావోద్వేగభరితమైన స్పోర్ట్స్ డ్రామాగా సినిమా ఉండబోతోందని స్పష్టం చేస్తోంది.ట్రైలర్లో ఆమిర్ ఖాన్(Aamir Khan) గుల్షన్ అనే సమస్యలతో సతమతమయ్యే, కోపిష్టి వ్యక్తిగా కనిపిస్తారు. చట్టంతో కొన్ని చిక్కుల్లో పడటంతో, మానసిక వికలాంగులైన యువకులతో కూడిన ఒక బాస్కెట్బాల్ జట్టుకు కోచ్గా పనిచేయాల్సిన పరిస్థితి అతనికి ఎదురవుతుంది. ట్రైలర్లో చూపిన దాని ప్రకారం గుల్షన్ మొదట్లో ఆ యువకులను పాగల్ (పిచ్చివాళ్లు) అంటూ చులకనగా మాట్లాడతాడు. వారి పట్ల ఎలాంటి సానుభూతి, అవగాహన లేని వ్యక్తిగా ప్రవర్తిస్తాడు. అయితే, కథనం ముందుకు సాగే కొద్దీ గుల్షన్ ప్రవర్తనలో మార్పు వస్తుందని ట్రైలర్ సూచిస్తోంది.
మరో అవకాశం
గతంలో ఆమిర్ ఖాన్ నటించిన ‘తారే జమీన్ పర్’ వంటి సామాజిక స్పృహ ఉన్న చిత్రాల తరహాలోనే, ఈ సినిమా కూడా హాస్యం, డ్రామా, బలమైన సందేశాన్ని సున్నితత్వంతో, వాస్తవికతతో మిళితం చేసిందనిపిస్తోంది.ఈ చిత్రం స్పానిష్ సినిమా ‘ఛాంపియన్స్’ ఆధారంగా తెరకెక్కిందని ప్రచారం జరుగుతున్నప్పటికీ, భారతీయ నేపథ్యానికి తగ్గట్టుగా,మనసును హత్తుకునే భావోద్వేగాలకు ప్రాధాన్యతనిస్తూ, అందరికీ మరో అవకాశం ఇవ్వాలనే అంశాన్ని స్పృశిస్తున్నట్లు ట్రైలర్ ద్వారా తెలుస్తోంది. ఇప్పటికే విడుదలైన ట్రైలర్తో సినిమాపై ప్రేక్షకుల్లో భారీ అంచనాలు నెలకొన్నాయి. ఈ నెల 20న థియేటర్లలో విడుదల కానున్న ‘సితారే జమీన్ పర్’, ప్రేక్షకులకు ఒక మంచి సినిమాటిక్ అనుభూతిని అందిస్తుందని చిత్ర వర్గాలు ఆశిస్తున్నాయి.
Read Also: Katrina Kaif: మాల్దీవ్స్ గ్లోబల్ బ్రాండ్ అంబాసిడర్గా కత్రినా కైఫ్