సుందర్ సి మార్క్ మరోసారి – ‘గ్యాంగర్స్’ రివ్యూ
కోలీవుడ్ డైరెక్టర్, నటుడు అయిన సుందర్ సి. మరోసారి తన స్టైల్ ను చూపిస్తూ తీసిన చిత్రం ‘గ్యాంగర్స్’. ఏప్రిల్ 24న థియేటర్లలో విడుదలై, మే 15న అమెజాన్ ప్రైమ్ (Amazon Prime) లోకి వచ్చిన ఈ యాక్షన్ కామెడీ సినిమా, హారర్ కామెడీ ఫార్మూలాను తలపించేలా సాగుతుంది. సుందర్ గతంలో చేసిన సినిమాల్లానే, ఇందులో కూడా ఒక ఊర్లో జరుగుతున్న అక్రమాల నేపథ్యంలో, హీరో ఎవరో కాదు, స్కూల్ పీఈటీ ( PT)టీచర్ అవతారంలో వచ్చినాడు. కధాకథనంలో ఎప్పటికప్పుడు ట్విస్టులు జోడిస్తూ, ప్రేక్షకులను ఆకట్టుకునే ప్రయత్నం చేశారు. అయితే ఈ ప్రయత్నం ఎంతవరకూ విజయవంతమైందనే దానిపై ఇప్పుడు ఒక సవివర విశ్లేషణ.
కథలో మిస్టరీ, హాస్యంలో మిక్స్ – కథా విశ్లేషణ
ఒక మారుమూల గ్రామం – అక్కడని మల్లేశ్, కోటేశ్ అనే అన్నదమ్ములు భయపెట్టి పాలిస్తున్నారు. గ్రామాన్ని తమ అక్రమాలకు వేదికగా మార్చుకున్న ఈ ఇద్దరిని ఎవరూ ఎదిరించలేరు. అలాంటి గ్రామంలోనే రమ్య అనే టీనేజ్ అమ్మాయి కనిపించకుండా పోవడం కథకు కిక్ ఇస్తుంది. టీచర్ సుజిత పోలీసులకు ఫిర్యాదు చేస్తుంది. పోలీస్ శాఖ విచారణకై ఓ అధికారిని పంపిస్తే, అదే సమయంలో శరవణన్ అనే వ్యక్తి పీఈటీ టీచర్ గా వచ్చి చేరతాడు. అసలు శరవణన్ ఎవరన్నది కాస్త మిస్టీరియస్ గానే ఉంటుంది. స్కూల్లో జరుగుతున్న పనుల నుంచి గ్రామంలో జరుగుతున్న అక్రమాలకు, అక్కడి అసలు దుండగుడెవరో తెలుసుకునే ప్రయాణమే కథా ప్రస్థానం.
ఈ కథలో మూడు కీలక ట్విస్టులు ఉన్నాయి. ఈ ట్విస్టులు, కథను ప్రెడిక్టబుల్ గా కాకుండా, ఆసక్తికరంగా ఉంచుతాయి. కథకు ఇది పెద్ద ప్లస్. లేకపోతే ఇది మరో సాధారణ హీరో విలన్ డ్రామాగా మిగిలిపోయేది. మొదటి భాగం బాగానే నడుస్తుంది. కామెడీ, మిస్టరీ మిళితం కావడం వల్ల ఎంటర్టైన్మెంట్ ఉన్నట్టే అనిపిస్తుంది. కానీ రెండో భాగంలో కథే కాదు, కామెడీ కూడా కొంత తప్పుదోవ పడుతుంది. ముఖ్యంగా వడివేలు పాత్రపై ఎక్కువ బరువు పెట్టడం వల్ల, మెయిన్ ట్రాక్ స్లో అయిపోతుంది. ఆ టైమ్లో కథను గట్టిగా పట్టుకొని వెళ్లాల్సిన శరవణన్ పాత్ర ఓ మోస్తరు స్థాయిలో మిగిలిపోతుంది.
నటుల ప్రదర్శన, సాంకేతిక విభాగాలు ఎలా ఉన్నాయంటే?
సుందర్ సి తన శైలిలో నటిస్తూ దర్శకత్వ బాధ్యతలు నిర్వహించాడు. పాత్రలో ఆయన ఓ స్థిరత చూపించినా, మరింత బలంగా ఉండాల్సిన చోట కొంత తక్కువగా కనిపిస్తాడు. కేథరిన్ పాత్ర సీరియస్ గా ఉన్నా, స్క్రీన్ టైమ్ తక్కువ. వాణి భోజన్, హరీష్ పేరడి పాత్రలు పరిమితమే. వడివేలు పాత్రకు ఎక్కువ ప్రాధాన్యం ఇచ్చినప్పటికీ, ఆయన కామెడీ రొటీన్ గా, కొన్ని చోట్ల ఓవర్గా అనిపించవచ్చు. సాంకేతికంగా చూస్తే, కెమెరామెన్ కృష్ణస్వామి పనితనం చక్కగా ఉంది. సత్య అందించిన నేపథ్య సంగీతం కథకు సహాయపడింది. ప్రవీణ్ ఆంటోనీ ఎడిటింగ్ గట్టిగానే ఉంది, కానీ రెండో భాగంలో కాస్త తడబడినట్టు అనిపిస్తుంది.
ఫైనల్ వెర్డిక్ట్ – ట్విస్టులు బాగున్నాయి కానీ..
‘గ్యాంగర్స్’ సినిమా కథలో ఉన్న ట్విస్టులు, సుందర్ సి. యొక్క రచనా నైపుణ్యాన్ని మరోసారి నిరూపించాయి. అయితే కథలో మధ్యలో ఉన్న సిల్లీ కామెడీ, ముఖ్యంగా వడివేలు ట్రాక్ కొంత విసుగు తెప్పించవచ్చు. చివర్లో 100 కోట్ల విలువైన ప్లాన్ కు వెళ్లే కథ ఒక దశలో గందరగోళంగా మారుతుంది. అక్కడ కథను పట్టు వదలకుండా ముందుకు తీసుకెళ్లుంటే, సినిమా మరింత బలంగా ఉండేదని చెప్పవచ్చు. అయినా మొత్తంగా ఇది ఒక డీసెంట్ టైమ్ పాస్ సినిమా. సుందర్ సి అభిమానుల్ని అంతగా నిరాశ పరచదు, కానీ కొత్తదనం కోరుకునే వారికి పరిపూర్ణ తృప్తి కలిగించదు.
read also: Marana Mass Movie: మరణ మాస్ (సోనీ లివ్) మూవీ రివ్యూ
