కమల్ హాసన్ ‘కన్నడ’ వ్యాఖ్యల వివాదంపై సుప్రీం కోర్టు కీలక తీర్పు: ‘థగ్ లైఫ్’ రిలీజ్కు అనుమతి!
సినీ నటుడు, మక్కల్ నీది మయ్యమ్ అధినేత కమల్ హాసన్(Kamal) ఇటీవల తన తాజా చిత్రం ‘థగ్ లైఫ్’ (Thug Life) ప్రమోషన్స్లో భాగంగా చేసిన ‘కన్నడ’ భాష వ్యాఖ్యలు తీవ్ర వివాదానికి దారి తీసిన సంగతి తెలిసిందే. కన్నడ భాష తమిళం నుంచి వచ్చిందని ఆయన చేసిన వ్యాఖ్యలు కర్ణాటకలో పెను దుమారం రేపాయి. కన్నడ ప్రజలు, సంఘాలు, సినీ ప్రముఖులు కమల్ హాసన్ (Kamal) వ్యాఖ్యలను తీవ్రంగా వ్యతిరేకించారు. ఈ వివాదం క్రమంగా ఉద్రిక్తతలకు దారితీసి, కర్ణాటక హైకోర్టు కూడా కమల్ హాసన్పై ఆగ్రహం వ్యక్తం చేసింది. వెంటనే క్షమాపణలు చెప్పాలని ఆదేశించింది. అయితే, కమల్ హాసన్ మాత్రం క్షమాపణలు చెప్పడానికి నిరాకరించారు. తాను తప్పుగా మాట్లాడలేదని, తన వ్యాఖ్యలను తప్పుగా అర్థం చేసుకున్నారని ఆయన వాదించారు. ఈ వివాదం చినికి చినికి గాలివానగా మారి, కర్ణాటకలో ‘థగ్ లైఫ్’ (Thug Life) సినిమాను నిషేధించే వరకు వెళ్లింది. ఈ పరిణామాలతో కమల్ హాసన్ దేశ అత్యున్నత న్యాయస్థానమైన సుప్రీం కోర్టును ఆశ్రయించారు. తాజాగా, ఈ వివాదంపై సుప్రీం కోర్టు తన కీలక తీర్పును వెల్లడించింది.
సుప్రీం కోర్టు తీర్పు: హైకోర్టుకు సూచన, కర్ణాటక ప్రభుత్వానికి ఆదేశం
కన్నడ భాషపై కమల్ హాసన్ చేసిన వ్యాఖ్యలకు క్షమాపణ చెప్పమని అడగొద్దని కర్ణాటక హైకోర్టుకు (High Court) సుప్రీం కోర్టు (Supreme Court) స్పష్టం చేసింది. ప్రజల అభిప్రాయాలను అణచివేయడం సరికాదని సుప్రీం కోర్టు పేర్కొంది. ‘ఒక సినిమాను ఇలా నిషేధించకూడదు. ప్రజల తల మీద గన్ పెట్టినట్టుగా సినిమాలను బ్యాన్ చేసి, వారిని దూరం చేయొద్దు’ అని సుప్రీం కోర్టు వ్యాఖ్యానించింది. ఒకవేళ కమల్ హాసన్ మాట్లాడింది నచ్చకపోయినా, అది తప్పు అనిపించినా, దానిపై చర్చలు పెట్టాలని, అది తప్పు అని చెప్పాలని సుప్రీం కోర్టు సూచించింది. ‘థగ్ లైఫ్’ సినిమా విడుదలకు అనుమతి ఇవ్వాలని కర్ణాటక ప్రభుత్వానికి సుప్రీం కోర్టు ఒక్క రోజు గడువు ఇచ్చింది. ఈ తీర్పు కమల్ హాసన్కు, ‘థగ్ లైఫ్’ చిత్ర బృందానికి పెద్ద ఊరటనిచ్చింది. భావ ప్రకటనా స్వేచ్ఛకు మద్దతుగా సుప్రీం కోర్టు ఇచ్చిన ఈ తీర్పుపై సినీ వర్గాల్లో హర్షం వ్యక్తమవుతోంది.
‘థగ్ లైఫ్’ వసూళ్లు, భవిష్యత్తుపై ప్రశ్నార్థకం
అయితే, ఈ వివాదాలన్నిటి మధ్య ‘థగ్ లైఫ్’ సినిమా ఇప్పటికే భారీ డిజాస్టర్గా నిలిచిన సంగతి తెలిసిందే. కోలీవుడ్, టాలీవుడ్ సహా అన్ని చోట్లా సినిమాకు పెద్ద దెబ్బ పడింది. ఓవర్సీస్, నార్త్లో కనీస వసూళ్లను కూడా సాధించలేకపోయింది. ఈ సినిమాతో కమల్ హాసన్, మణిరత్నం మరోసారి ట్రోలింగ్ను ఎదుర్కొన్నారు. ‘ఇండియన్ 2’ కంటే వరస్ట్ మూవీ రాదని అనుకున్నాం, కానీ ‘థగ్ లైఫ్’తో మళ్లీ నిరాశపరిచారు అని అభిమానులు, నెటిజన్లు నెట్టింట్లో కామెంట్లు చేశారు. ‘విక్రమ్’ తర్వాత మళ్లీ ఆ రేంజ్ విజయాన్ని అందుకోవడానికి కమల్ హాసన్ కష్టపడుతున్నా ఫలితం మాత్రం రావడం లేదనిపిస్తోంది. ఇప్పుడు సుప్రీం కోర్టు ఆదేశాలతో ‘థగ్ లైఫ్’ కన్నడలో విడుదలైనప్పటికీ, ఇంత వివాదం జరిగిన తరువాత అక్కడి ప్రజలు ఈ సినిమాపై ఆసక్తి చూపిస్తారా? కనీస వసూళ్లను అయినా సాధిస్తుందా? అన్నది చూడాలి. సుప్రీం కోర్టు తీర్పుతో సినిమా విడుదలకు మార్గం సుగమం అయినా, సినిమా బాక్సాఫీస్ వద్ద నిలబడుతుందా లేదా అనేది వేచి చూడాలి.
Read also: Thug Life: కర్ణాటకలో థగ్ లైఫ్ సినిమా విడుదలకు సుప్రీంకోర్టు గ్రీన్ సిగ్నల్