దివంగత సినీ తార, అతిలోక సుందరి శ్రీదేవి(Sridevi)కి చెందిన చెన్నై(Chennai) ఆస్తి ఇప్పుడు వివాదంలో చిక్కుకుంది. ఆ ఆస్తిపై ముగ్గురు వ్యక్తులు అక్రమంగా యాజమాన్య హక్కులు కోరుతున్నారంటూ, వారి వాదనను సవాలు చేస్తూ శ్రీదేవి భర్త, ప్రముఖ నిర్మాత బోనీ కపూర్(Boney Kapoor) మద్రాస్ హైకోర్టు మెట్లెక్కారు. ఆ ముగ్గురి దావా చట్టవిరుద్ధమని, స్పష్టంగా మోసపూరితమైనదని ఆయన తన పిటిషన్లో తీవ్ర ఆరోపణలు చేశారు. చెన్నై ఈస్ట్ కోస్ట్ రోడ్ (ఈసీఆర్)లో ఉన్న ఈ ఆస్తిని కపూర్ కుటుంబం తమ ఫామ్హౌస్గా ఉపయోగిస్తోంది.
హైకోర్టుకు సమర్పించిన వివరాల ప్రకారం
బోనీ కపూర్ హైకోర్టుకు సమర్పించిన వివరాల ప్రకారం, శ్రీదేవి ఈ ఆస్తిని 1988 ఏప్రిల్ 19న ఎం.సి. సంబంధ మొదలియార్ అనే వ్యక్తి నుంచి చట్టబద్ధంగా కొనుగోలు చేశారు. అయితే, ఇటీవల ముగ్గురు వ్యక్తులు తెరపైకి వచ్చి తామే ఆ ఆస్తికి అసలైన వారసులమని వాదించడం మొదలుపెట్టారు. వారిలో ఒక మహిళ, తాను మొదలియార్ కుమారుడి రెండో భార్యనని, మిగిలిన ఇద్దరు తన కుమారులని చెబుతున్నారు. అయితే, ఈ వాదనను బోనీ కపూర్ తీవ్రంగా వ్యతిరేకించారు. మొదలియార్ కుమారుడి మొదటి భార్య 1999 జూన్ 24న మరణించారని, కానీ ఈ మహిళతో ఆయనకు 1975 ఫిబ్రవరి 5నే వివాహం జరిగిందని వారు క్లెయిమ్ చేస్తున్నారని బోనీ కపూర్ వివరించారు. మొదటి భార్య జీవించి ఉండగా చేసుకున్న రెండో వివాహం చట్టప్రకారం చెల్లదని, కాబట్టి వారికి వారసత్వ హక్కులు వర్తించవని ఆయన స్పష్టం చేశారు.
సర్టిఫికెట్ను జారీ చేసే అధికారం అధికారికి లేదు
ఈ వివాదంలో మరో కీలకమైన అంశం లీగల్ హీర్షిప్ సర్టిఫికెట్ (చట్టబద్ధ వారసత్వం). ఆ ముగ్గురు వ్యక్తులకు రెవెన్యూ అధికారి జారీ చేసిన వారసత్వ ధృవీకరణ పత్రాన్ని కూడా బోనీ కపూర్ సవాలు చేశారు. ఆ సర్టిఫికెట్ను జారీ చేసే అధికారం సంబంధిత అధికారికి లేదని, దానిని తక్షణమే రద్దు చేయాలని ఆయన కోర్టును కోరారు. 1960 ఫిబ్రవరిలోనే మొదలియార్ కుటుంబంలో ఆస్తి పంపకాల ఒప్పందం జరిగిందని, దాని ఆధారంగానే శ్రీదేవి ఆస్తిని కొనుగోలు చేశారని, కాబట్టి ప్రస్తుత దావాలకు చట్టబద్ధత లేదని ఆయన వాదించారు.
తహసీల్దార్కు హైకోర్టు కీలక ఆదేశాలు
బోనీ కపూర్ దాఖలు చేసిన పిటిషన్పై విచారణ జరిపిన న్యాయమూర్తి జస్టిస్ ఎన్.ఆనంద్ వెంకటేశ్, ఈ వ్యవహారంపై సమగ్రంగా విచారణ జరిపి నాలుగు వారాల్లోగా ఒక నిర్ణయం తీసుకోవాలని తాంబరం తాలూకా తహసీల్దార్ను ఆదేశించారు. 1996లో శ్రీదేవిని వివాహం చేసుకున్న బోనీ కపూర్, ఆమె 2018లో మరణించిన తర్వాత కూడా ఆమె జ్ఞాపకాలను, ఆస్తులను కాపాడుకుంటున్నారు. వారి కుమార్తెలు జాన్వీ కపూర్, ఖుషీ కపూర్ ప్రస్తుతం సినీ రంగంలో రాణిస్తున్న విషయం తెలిసిందే. ఈ నేపథ్యంలో శ్రీదేవి ఆస్తిని కాపాడుకోవడానికి బోనీ కపూర్ చేస్తున్న న్యాయపోరాటం ప్రాధాన్యత సంతరించుకుంది.
శ్రీదేవి తెలుగునా లేక తమిళుడా?
శ్రీదేవి 1963 ఆగస్టు 13న భారతదేశంలోని తమిళనాడులోని శివకాశి సమీపంలోని మీనంపాటి గ్రామంలో అయ్యప్పన్ మరియు రాజేశ్వరి దంపతులకు శ్రీ అమ్మ యంగేర్ అయ్యప్పన్గా జన్మించారు. ఆమె తండ్రి శివకాశికి చెందిన న్యాయవాది కాగా, తల్లి ఆంధ్రప్రదేశ్లోని తిరుపతికి చెందినవారు. శ్రీదేవి మాతృభాష తెలుగు, ఆమె తమిళంలో నిష్ణాతులు.
READ HINDI NEWS : hindi.vaartha.com
READ ALSO :
