సహజత్వానికి మరింత దగ్గరగా – ‘అభిలాషం’ సినిమా విశ్లేషణ
ఇటీవల కాలంలో మలయాళ సినిమా ఇండస్ట్రీ దేశవ్యాప్తంగా మంచి గుర్తింపు సంపాదించుకుంది. ఈ చిత్రాల్లో ప్రతిబింబించే నిజ జీవిత భావాలు, సహజత, పాత్రల ప్రాముఖ్యత ప్రేక్షకులను ఎంతగానో ఆకర్షిస్తున్నాయి. అటు థియేటర్లలోనూ, ఇటు ఓటీటీ వేదికలపై కూడా మలయాళ సినిమాలకు విపరీతమైన ఆదరణ లభిస్తున్నది. వీటిలో అతి ముఖ్యంగా చెప్పుకోవాల్సిన సినిమా ‘అభిలాషం’. 2024 మార్చి 29వ తేదీన థియేటర్లలో విడుదలైన ఈ చిత్రం ఇటీవలే, మే 23 నుంచి అమెజాన్ ప్రైమ్లో స్ట్రీమింగ్ అవుతోంది. ఈ చిత్రం సింపుల్ ప్రేమ కథనంతో ముందుకెళ్లినా, దానిలోని భావోద్వేగాలు, ప్రదర్శించిన జీవిత స్థితిగతులు ప్రేక్షకుల మనసును తాకేలా ఉంటాయి.
ప్రేమ, తలకిందులైన కలలు, తిరిగి వచ్చే జ్ఞాపకాలు
ఈ చిత్ర కథా నేపథ్యం ఎంతో చక్కగా సాగుతుంది. కథానాయకుడు అభిలాష్ ఒక సాధారణ వ్యక్తి. చిన్న స్థాయిలో వ్యాపారం చేస్తూ జీవనం కొనసాగిస్తాడు.అతను షెరిన్ అనే యువతిని ప్రేమిస్తాడు. కానీ తన ప్రేమను వ్యక్తపరచడానికి సరైన సందర్భం దొరకదు. దీనివల్ల ఆమె వేరే వ్యక్తిని పెళ్లి చేసుకుని జీవితాన్ని ముందుకు తీసుకెళ్తుంది. ఆ తరువాత ఆమె భర్త అనూహ్యంగా మృతిచెందడంతో, తిరిగి తన పూర్వ ఊరికి వస్తుంది. ఇక్కడే కథకు మలుపులు మొదలవుతాయి. తిరిగి కలుసుకున్న అభిలాష్, షెరిన్ మధ్య జరిగే సంఘటనలు, వారి మధ్య ఉన్న అపూర్వమైన ఎమోషన్లు మనసును తాకే విదంగా చూపించబడ్డాయి.
నటీనటుల సహజ అభినయమే సినిమాకు ప్రాణం
ఈ సినిమాలో ప్రధాన పాత్రల్లో సైజూ కురుప్, తన్వీ రామ్, అర్జున్ అశోకన్ నటించారు. ఈ ముగ్గురూ మలయాళ సినీ ప్రియుల్లో మంచి పేరుగాంచినవారే. వీరి మధ్య కెమిస్ట్రీ, సహజమైన నటన, పాత్రలలో లీనమై నటించిన విధానం ప్రేక్షకులను ఆత్మీయంగా కట్టిపడేస్తుంది. ప్రతి పాత్ర సజీవంగా కనిపిస్తుంది. ముఖ్యంగా అభిలాష్ పాత్రలో సైజూ కురుప్ ప్రదర్శించిన నిగూఢమైన భావోద్వేగాలు, కళ్లతోనే చెప్పిన సందేశాలు ప్రేక్షకులను ఆలోచనలో పడేస్తాయి.
దర్శకుని అభినవ దృక్పథం
దర్శకుడు షంజూ జేబా చాలా నెమ్మదిగా, సహజ రీతిలో ఈ చిత్రాన్ని తెరకెక్కించారు. ఎలాంటి హడావుడీ లేకుండా, ప్రేక్షకుల మనసుకు దగ్గరగా ఉండే సన్నివేశాలను చిత్రీకరించారు. చిన్న చిన్న సన్నివేశాల్లోనూ గొప్ప భావాలను ఒడిసిపట్టడం ఈ సినిమా ప్రత్యేకత. వాస్తవికతకు దగ్గరగా ఉండే పాత్రలు, మనిషి జీవన ప్రయాణంలో ఎదురయ్యే నిశ్శబ్ద పోరాటాలు చిత్రంలో ప్రతిధ్వనించటం సినిమాకు విశిష్టతను తీసుకొచ్చాయి.
ఓటీటీలో చూసే సినిమాగా తప్పక చూడవలసిన చిత్రం
అభిలాషం ఒక మెలోడ్రామా కాదు, కానీ జీవితం నిజంగా ఎలా ఉంటుందో చూపించే అద్దం. ఈ చిత్రం బిగ్ స్క్రీన్కి కాకపోయినా, ఓటీటీలో చూసే వారికి మరింత బంధాన్ని కలిగించేలా ఉంటుంది. ప్రేమ, విరహం, నిశ్చలత, తిరిగి ఆశలు లాంటి అనుభూతుల సమాహారంగా ఉంటుంది. మలయాళ సినిమాల స్థాయిని మరోసారి రుజువు చేసేలా ఈ చిత్రం నిలిచింది.
Read also: Pawan Kalyan: హరిహర వీరమల్లు నుంచి ‘తారా తారా’ కొత్త పాట ఎప్పుడంటే?