ఆంధ్రప్రదేశ్కు రూఫ్టాప్ సోలార్ యూనిట్ల కేటాయింపుకు కేంద్రాన్ని కోరిన సీఎం చంద్రబాబు
ఆంధ్రప్రదేశ్ రాష్ట్రాన్ని పునరుత్పాదక ఇంధన రంగంలో ముందుకు నడిపించేందుకు ముఖ్యమంత్రి నారా చంద్రబాబు నాయుడు కీలక అడుగులు వేస్తున్నారు. కేంద్ర ప్రభుత్వం చేపట్టిన ప్రధానమంత్రి సూర్య ఘర్ ఉచిత విద్యుత్ యోజన (Surya Ghar Free Electricity Scheme) కింద రాష్ట్రానికి రూఫ్టాప్ సోలార్ విద్యుత్ యూనిట్ల కేటాయింపునకు విజ్ఞప్తి చేస్తూ, కేంద్ర నూతన మరియు పునరుత్పాదక ఇంధన వనరుల శాఖ మంత్రి ప్రహ్లాద్ జోషిని కలిశారు. ఈ విషయాన్ని స్వయంగా ముఖ్యమంత్రి ట్విట్టర్ వేదికగా వెల్లడించారు. కేంద్ర మంత్రి ఈ భేటీ ఫలప్రదమైందని ఆయన పేర్కొన్నారు.
20 లక్షల ఎస్సీ, ఎస్టీ కుటుంబాలకు సౌర విద్యుత్ను అందించాలనే లక్ష్యం
ఈ సమావేశంలో ముఖ్యమంత్రి చంద్రబాబు ఒక స్పష్టమైన లక్ష్యాన్ని కేంద్రానికి వివరించారు. రాష్ట్రంలో నివసిస్తున్న 20 లక్షల ఎస్సీ మరియు ఎస్టీ కుటుంబాల గృహాలలో రూఫ్టాప్ సోలార్ యూనిట్లను ఏర్పాటు చేయాలని తమ ప్రభుత్వ సంకల్పమని తెలిపారు. ఇది కేవలం విద్యుత్ ఉత్పత్తినే కాకుండా, సామాజిక న్యాయాన్ని సాకారం చేసే దిశగా కూడా కీలకంగా మారుతుందన్నారు. పునరుత్పాదక ఇంధన వనరుల వినియోగాన్ని ప్రోత్సహించడం ద్వారా పర్యావరణ పరిరక్షణకు కూడా తోడ్పడతామని చెప్పారు.
ఒక్కో నియోజకవర్గానికి 10 వేల యూనిట్ల ప్రతిపాదన
ఈ కార్యక్రమాన్ని సమర్థవంతంగా అమలు చేయడం కోసం ప్రభుత్వం ముందస్తుగా ఓ వ్యూహాన్ని రూపొందించింది. రాష్ట్రంలోని ప్రతి నియోజకవర్గంలో కనీసం 10,000 రూఫ్టాప్ సోలార్ (Rooftop Solar) యూనిట్లను ఏర్పాటు చేయాలని ప్రతిపాదనలు కేంద్రానికి అందించినట్లు ముఖ్యమంత్రి వెల్లడించారు. దీని వల్ల ప్రజలపై పడే విద్యుత్ బరువు తక్కువ కావడం, మరియు దైనందిన జీవితంలో విద్యుత్ వినియోగం మెరుగవడం వంటి ప్రయోజనాలు లభిస్తాయని చెప్పారు.
బీసీ వినియోగదారులకు సబ్సిడీతో సోలార్ యూనిట్లు
కేవలం ఎస్సీ, ఎస్టీలకే కాకుండా, సామాజికంగా వెనుకబడిన వర్గాలైన బీసీ వినియోగదారులకు కూడా రూఫ్టాప్ సోలార్ యూనిట్లను అందుబాటులోకి తీసుకురావాలని ముఖ్యమంత్రి చంద్రబాబు కేంద్రానికి సూచించారు. వీటిపై ప్రత్యేక సబ్సిడీలు, ఆర్థిక ప్రోత్సాహాలను కేంద్రం అందించాలని కోరారు. దీనివల్ల సామాన్య ప్రజలకు విద్యుత్ వ్యవస్థ మరింత సమర్ధవంతంగా, లాభదాయకంగా మారుతుందని ఆయన ఆశాభావం వ్యక్తం చేశారు.
కేంద్ర మంత్రులతో సమర్థవంతమైన చర్చ
ఈ సమావేశంలో కేంద్ర మంత్రులు రామ్మోహన్ నాయుడు, పెమ్మసాని చంద్రశేఖర్, మరియు ఆంధ్రప్రదేశ్ ప్రభుత్వానికి చెందిన ప్రధాన అధికారులు పాల్గొన్నారు. రాష్ట్ర అభివృద్ధికి అవసరమైన సహకారాన్ని అందించేందుకు కేంద్రం సహకరిస్తుందని, త్వరలోనే పాజిటివ్ ప్రకటనలు వెలువడే అవకాశం ఉందని విశ్వాసం వ్యక్తం చేశారు. పునరుత్పాదక ఇంధన రంగంలో ఆంధ్రప్రదేశ్ ఆదర్శంగా నిలవాలన్నదే చంద్రబాబు ప్రభుత్వ దృష్టి.
Read also: Bhargava Reddy: సజ్జల భార్గవరెడ్డిపై సుప్రీంకోర్టు తీవ్ర ఆగ్రహం