అంబర్పేట మహంకాళి అమ్మవారి బోనాల జాతర (Amberpet Mahankali Temple) ఈ నెల 20, 21వ తేదీల్లో అంగరంగ వైభవంగా జరగనుంది. ఈ పండుగను ఘనంగా నిర్వహించేందుకు అంబర్పేట దేవస్థాన సేవా సమితి ప్రతినిధులు అన్ని ఏర్పాట్లు పూర్తి చేశారు. ఇప్పటికే జూలై 6న ఘటం ఊరేగింపుతో ప్రారంభమైన ఉత్సవాలు జూలై 19 వరకు అంబర్పేట పరిసర బస్తీల్లో విస్తరించి ఘనంగా జరిగాయి. జూలై 20న ఆదివారం ఉదయం 4 గంటలకే అభిషేకంతో అమ్మవారికి ప్రత్యేక పూజలు ప్రారంభమవుతాయి. ఈ రోజంతా ధూప దీప నైవేద్యాలతో బోనాలు సమర్పించనున్నారు.
రెండో రోజు రంగం, బలిగంప, ఊరేగింపుతో ముగింపు
జూలై 21 సోమవారం తెల్లవారుజామున 3 గంటల నుంచి అమ్మవారి ఎదుర్కోలు కార్యక్రమం జరుగుతుంది. మధ్యాహ్నం 12 గంటలకు అమ్మవారికి నూతన వస్త్రాలు సమర్పించనున్నట్లు నిర్వాహకులు తెలిపారు. ఒకటి గంటకు పచ్చికుండ స్థాపన, రెండు గంటలకు భవిష్యవాణి చేసే రంగం కార్యక్రమం భక్తులను ఆకట్టుకోనుంది. మూడు గంటలకు పోతరాజుల ప్రదక్షణ, నాలుగు గంటలకు బలిగంప తీయడం, ఆపై సాయంత్రం 6 గంటలకు అమ్మవారి సాగనంపు ఊరేగింపు జరగనుంది. ఈ ఊరేగింపులో మంగళవాయిద్యాలు, కొమ్ము బృందాలు, శివపార్వతుల వేషధారణలు, కేరళ కళాకారుల నృత్య ప్రదర్శనలు ప్రత్యేక ఆకర్షణగా నిలవనున్నాయి.
భక్తుల కోసం భారీ ఏర్పాట్లు, కట్టుదిట్టమైన భద్రత
జాతరలో లక్షలాది మంది భక్తులు పాల్గొనే అవకాశం ఉన్నందున, ఆలయం వద్ద విద్యుత్ అలంకరణలతో కూడిన స్వాగత తోరణాలు ఏర్పాటు చేశారు. భక్తులకు ఎలాంటి ఇబ్బందులు కలగకుండా జలసౌకర్యాలు, ఆరోగ్య శిబిరాలు, ట్రాఫిక్ నియంత్రణ తదితర ఏర్పాట్లను సమితి ప్రత్యేకంగా నిర్వహిస్తోంది. పోలీస్ శాఖ కట్టుదిట్టమైన భద్రతా ఏర్పాట్లను చేసింది. అన్ని ప్రభుత్వ విభాగాలతో సమన్వయం చేసుకుంటూ ఏర్పాట్లను పర్యవేక్షిస్తున్నామని సేవా సమితి ప్రతినిధులు తెలిపారు. అంబర్పేట మహంకాళి బోనాలు జంటనగరాల్లో అత్యంత వైభవంగా జరిగే జాతరల్లో ఒకటిగా భక్తుల హృదయాల్లో స్థానం పొందింది.
Read Also : Snake Festival: బాబోయ్ పాముల పండుగనంటా.. చూద్దాం రండి
