CM Revanth : రేవంత్ సిద్దిపేట పర్యటనకు హరీశ్ రావు వస్తారా?

సిద్దిపేట జిల్లాలో ముఖ్యమంత్రి ఎనుముల రేవంత్ రెడ్డి పర్యటన ప్రస్తుతం తెలంగాణ రాజకీయాల్లో అత్యంత ఆసక్తికరంగా మారింది. ముఖ్యమంత్రి హోదాలో రేవంత్ రెడ్డి తొలిసారిగా సిద్దిపేట గడ్డపై అడుగుపెడుతుండటంతో అటు అధికార కాంగ్రెస్, ఇటు ప్రతిపక్ష బీఆర్ఎస్ శ్రేణుల్లో తీవ్ర ఉత్కంఠ నెలకొంది. నంగునూరు మండలం నర్మెట్టలో నిర్వహించనున్న ‘రైతు ఉత్సవాలు’ ముగింపు సభలో సీఎం పాల్గొననున్నారు. ఈ పర్యటనలో భాగంగా దాదాపు Rs.300 కోట్లతో నిర్మించిన TG ఆయిల్ పామ్ కర్మాగారాన్ని ప్రారంభించడంతో పాటు, రాష్ట్రంలోనే మొదటి ఆయిల్ రిఫైనరీకి ఆయన శంకుస్థాపన చేయనున్నారు. అన్నిటికంటే ముఖ్యంగా, రైతు భరోసా పథకం కింద మొదటి విడత నిధులను ఈ వేదిక నుంచే విడుదల చేయనుండటం ప్రాధాన్యత సంతరించుకుంది. పారిశ్రామికాభివృద్ధి, వ్యవసాయ సంక్షేమం కలగలిసిన ఈ పర్యటన ద్వారా సిద్దిపేటలో కాంగ్రెస్ జెండాను బలంగా పాతాలని ప్రభుత్వం భావిస్తోంది.

ప్రోటోకాల్ ప్రకారం స్థానిక ప్రజాప్రతినిధిగా హరీష్ రావు కు ఆహ్వానం

అయితే, ఈ పర్యటనకు స్థానిక ఎమ్మెల్యే, మాజీ మంత్రి హరీశ్ రావు హాజరవుతారా లేదా అన్నదే ఇప్పుడు ప్రధాన చర్చ. ప్రోటోకాల్ ప్రకారం స్థానిక ప్రజాప్రతినిధిగా ఆయనకు ఆహ్వానం ఉన్నప్పటికీ, ప్రస్తుతం నెలకొన్న రాజకీయ పరిస్థితులు అందుకు భిన్నంగా ఉన్నాయి. సిద్దిపేట నియోజకవర్గానికి రావాల్సిన సుమారు ₹1,000 కోట్ల అభివృద్ధి నిధులను ప్రభుత్వం నిలిపివేసిందని హరీశ్ రావు గత కొంతకాలంగా తీవ్ర స్థాయిలో ఆరోపిస్తున్నారు. అభివృద్ధి పనుల విషయంలో వివక్ష చూపుతున్నారని విమర్శిస్తూనే, మరోవైపు రుణమాఫీ కాని రైతులతో కలిసి నిరసన కార్యక్రమాలు చేపడతామని ఆయన ప్రకటించారు. దీంతో ఈ పర్యటన సజావుగా సాగుతుందా లేక రాజకీయ ఘర్షణకు దారితీస్తుందా అనే ఉత్కంఠ నెలకొంది.

Harish Rao: అనుభవంలేని టీచర్లతో విద్యాకమిషన్ సాధించేదేమిటి?

అవాంఛనీయ సంఘటనలు జరగకుండా నిఘా

ముఖ్యమంత్రి పర్యటనను అడ్డుకుంటామన్న హెచ్చరికల నేపథ్యంలో పోలీసులు భారీ భద్రతా ఏర్పాట్లు చేశారు. సిద్దిపేట కోటలో సీఎం పర్యటన సందర్భంగా ఎలాంటి అవాంఛనీయ సంఘటనలు జరగకుండా నిఘా పెంచారు. ఒకవేళ హరీశ్ రావు సభకు హాజరైతే వేదికపై ఇద్దరు నేతల మధ్య వాదోపవాదాలు చోటుచేసుకునే అవకాశం ఉంది, లేదా బయట నిరసనలు చేపడితే పోలీసులు ముందస్తు అరెస్టులు చేసే అవకాశం కనిపిస్తోంది. రుణమాఫీ, రైతు భరోసా వంటి కీలక అంశాలపై ప్రభుత్వం స్పష్టత ఇచ్చేందుకు ఈ వేదికను వాడుకోవాలని చూస్తుంటే, వైఫల్యాలను ఎండగట్టాలని ప్రతిపక్షం భావిస్తోంది. ఆదివారం జరిగే ఈ పర్యటన సిద్దిపేట రాజకీయాల్లో పెను మార్పులకు నాంది పలికే అవకాశం ఉంది.