హైదరాబాద్, పూణే మధ్య (Between Hyderabad and Pune) సికింద్రాబాద్–నాందేడ్ మార్గంలో రెండు కొత్త వందే భారత్ (Vande Bharat) రైళ్లు నడపాలని రైల్వే శాఖ నిర్ణయించింది. ఈ నిర్ణయంతో తెలంగాణ, మహారాష్ట్ర మధ్య రైలు కనెక్టివిటీ మరింత బలోపేతం కానుంది. రైల్వే అధికారులు ప్రకారం, ఈ కొత్త సేవలతో ప్రయాణ సమయం రెండు నుంచి మూడు గంటలు తగ్గనుంది.భారత ప్రభుత్వం ఎంతో ప్రతిష్టాత్మకంగా ప్రారంభించిన వందే భారత్ రైళ్లు మొదట్లో టికెట్ రేట్లపై విమర్శలు ఎదుర్కొన్నాయి. అయినప్పటికీ, వేగవంతమైన ప్రయాణం కారణంగా ప్రయాణికులు విస్తృతంగా ఆదరిస్తున్నారు. మిగతా ట్రైన్లతో పోలిస్తే గమ్యస్థానాలకు త్వరగా చేరడం వీటి ప్రధాన ఆకర్షణగా మారింది.
హైదరాబాద్–మహారాష్ట్ర కనెక్టివిటీ మరింత బలంగా
నాగ్పూర్కు ఇప్పటికే వందే భారత్ సర్వీస్ నడుస్తోంది. ఇప్పుడు పూణే కనెక్షన్ చేరడంతో హైదరాబాద్ నుండి మహారాష్ట్రకు ఇది మూడవ వందే భారత్ సర్వీస్ అవుతుంది. ప్రస్తుతం హైదరాబాద్లో నాలుగు వందే భారత్ రైళ్లు సేవలందిస్తున్నాయి. ఈ రెండు కొత్త రైళ్ల చేరికతో ప్రయాణికుల రాకపోకలు మరింత సులభతరం అవుతాయి.ప్రణాళికలో భాగంగా సికింద్రాబాద్–పూణే శతాబ్ది ఎక్స్ప్రెస్ స్థానంలో వందే భారత్ ఎక్స్ప్రెస్ నడపాలని పరిశీలిస్తున్నారు. ప్రస్తుతం శతాబ్ది ఎనిమిదిన్నర గంటల్లో ప్రయాణం పూర్తిచేస్తోంది. వారానికి ఆరు రోజులు నడుస్తూ పరిమిత స్టాప్లతో రెండు AC ఎగ్జిక్యూటివ్ క్లాస్ కోచ్లు, తొమ్మిది AC చైర్కార్లు, రెండు EOG కార్లతో సేవలందిస్తోంది. వందే భారత్ రాకతో ఈ ప్రయాణ సమయం మరింత తగ్గనుంది.
సికింద్రాబాద్ నుండి వందే భారత్ విజయాలు
సికింద్రాబాద్–విశాఖపట్నం, సికింద్రాబాద్–తిరుపతి, కాచిగూడ–యశ్వంత్పూర్ రూట్లలో ఇప్పటికే వందే భారత్ రైళ్లు నడుస్తున్నాయి. ఈ సర్వీసులు ఎల్లప్పుడూ అధిక ఆక్యుపెన్సీతో నడుస్తూ రైల్వే శాఖకు ప్రోత్సాహాన్ని ఇస్తున్నాయి. ఈ విజయమే సికింద్రాబాద్ నుండి మరో రెండు వందే భారత్ సర్వీసులు ప్రతిపాదించడానికి కారణమైంది.
దక్షిణ మధ్య రైల్వేలో కొత్త రికార్డు
ఈ రెండు కొత్త రైళ్లతో దక్షిణ మధ్య రైల్వే (SCR) మొత్తం ఏడు వందే భారత్ రైళ్లను నడుపుతుంది. దీంతో ఈ జోన్ దేశంలో అత్యధిక వందే భారత్ సర్వీసులు నడిపే ప్రాంతాల్లో ఒకటిగా నిలుస్తుంది.మరోవైపు సికింద్రాబాద్–ముజఫర్పూర్ అమృత్ భారత్ ఎక్స్ప్రెస్ కూడా త్వరలో ప్రారంభం కానుంది. రైల్వే అధికారులు ప్రకారం, ఈ సేవ ఒక నెలలోపు ప్రారంభమవుతుంది. దీంతో తెలంగాణ రైలు కనెక్టివిటీ మరింత విస్తరించనుంది.
Read Also :