తెలంగాణ ప్రజలకు టీజీఎస్ఆర్టీసీ (TGSRTC) తీపి కబురు అందించింది. ఉగాది మరియు రంజాన్ పండుగలను పురస్కరించుకుని తమ స్వగ్రామాలకు వెళ్లే ప్రయాణికుల కోసం భారీ స్థాయిలో ముందస్తు ఏర్పాట్లు చేస్తోంది. రద్దీకి అనుగుణంగా ప్రత్యేక బస్సులను నడపాలని సంస్థ నిర్ణయించింది. ముఖ్యంగా ఈ నెల 17, 18 తేదీల్లో ప్రయాణికుల తాకిడి ఎక్కువగా ఉండే అవకాశం ఉందని గుర్తించిన అధికారులు, ఆయా రోజుల్లో తగినన్ని స్పెషల్ సర్వీసులను అందుబాటులో ఉంచుతున్నారు. అలాగే పండుగ ముగిశాక ఈ నెల 23న తిరుగు ప్రయాణం కోసం కూడా ప్రత్యేక ఏర్పాట్లు చేశారు.
Read Also:Telangana : వారికీ ఉచిత స్కూటర్లు, స్కాలర్షిప్!
స్పెషల్ బస్సుల నిర్వహణలో ఎదురయ్యే వ్యయ ప్రయాసలను దృష్టిలో ఉంచుకుని, టికెట్ ధరల్లో కొంత మార్పులు చేసినట్లు ఆర్టీసీ యాజమాన్యం వెల్లడించింది. 2003లో ప్రభుత్వం జారీ చేసిన జీవో నంబర్ 16 ప్రకారం, పండుగలు లేదా ప్రత్యేక సందర్భాల్లో నడిచే బస్సులకు అయ్యే డీజిల్ మరియు నిర్వహణ ఖర్చుల నిమిత్తం సాధారణ చార్జీల కంటే 1.5 రెట్లు వరకు పెంచుకునే వెసులుబాటు సంస్థకు ఉంది. ఈ నిబంధన కేవలం ప్రత్యేక బస్సులకు మరియు ప్రయాణికుల రద్దీ ఎక్కువగా ఉండే 17, 18 మరియు 23 తేదీలలో మాత్రమే వర్తిస్తుంది.
మహిళలకు ఉచిత ప్రయాణం యథావిధి
అయితే, ఈ చార్జీల సవరణ సాధారణ (రెగ్యులర్) బస్సులకు వర్తించదు. రెగ్యులర్ బస్సుల్లో ప్రయాణించే వారు ఎప్పటిలాగే సాధారణ చార్జీలతో ప్రయాణించవచ్చు. అదేవిధంగా, రాష్ట్ర ప్రభుత్వ ప్రతిష్టాత్మక ‘మహాలక్ష్మి’ పథకం కింద మహిళలకు కల్పిస్తున్న ఉచిత బస్సు రవాణా సౌకర్యం పండుగ రోజుల్లోనూ యథావిధిగా కొనసాగుతుంది. పల్లె వెలుగు, ఎక్స్ప్రెస్, సిటీ ఆర్డినరీ మరియు మెట్రో ఎక్స్ప్రెస్ బస్సుల్లో మహిళలు ఉచితంగా ప్రయాణించవచ్చు.
ప్రయాణికులు తమ ప్రయాణాన్ని సులభతరం చేసుకోవడానికి ముందస్తు రిజర్వేషన్ సౌకర్యాన్ని వినియోగించుకోవాలని ఆర్టీసీ సూచించింది. ఆసక్తి గల వారు www.tgsrtcbus.in వెబ్సైట్ ద్వారా టికెట్లు బుక్ చేసుకోవచ్చు. పండుగ ప్రత్యేక బస్సుల గురించి మరిన్ని వివరాల కోసం ఆర్టీసీ కాల్ సెంటర్ నంబర్లు 040-69440000 లేదా 040-23450033ను సంప్రదించాలని అధికారులు కోరారు.
Read hindi news: hindi.vaartha.com
Epaper: epaper.vaartha.com
Read Also:
