తెలంగాణ రాష్ట్రంలో ముఖ్యమంత్రి రేవంత్ రెడ్డి పాలనలో తాజాగా తీసుకున్న కీలక పరిపాలనా నిర్ణయాలు రాజకీయంగా, పాలనా రంగంలో చర్చనీయాంశమయ్యాయి. పలువురు విశ్రాంత ఐఏఎస్, ఐపీఎస్ అధికారులకు ముఖ్యమైన పదవులు అప్పగిస్తూ ప్రభుత్వం బుధవారం ప్రభుత్వం ఉత్తర్వులు జారీ చేసింది. ఇది ఒకవైపు సీనియర్ అధికారుల అనుభవాన్ని సద్వినియోగం చేసేందుకు తీసుకున్న నిర్ణయంగా ఉంటే, మరోవైపు కీలక పదవుల్లో నమ్మకస్థులను నియమించాలన్న ఆలోచనగా విశ్లేషకులు అభిప్రాయపడుతున్నారు.
సీఎం కార్యాలయ ముఖ్య కార్యదర్శిగా కె.ఎస్. శ్రీనివాసరాజు
ఆంధ్రప్రదేశ్ క్యాడర్కు చెందిన విశ్రాంత ఐఏఎస్ అధికారి కె.ఎస్. శ్రీనివాసరాజును ముఖ్యమంత్రి కార్యాలయం (CMO) ముఖ్య కార్యదర్శిగా నియమిస్తూ ఉత్తర్వులు జారీ అయ్యాయి. ఆయనకు రెండేళ్ల కాలపరిమితి నిర్ధారించారు. శ్రీనివాసరాజు గతంలో తిరుమల తిరుపతి దేవస్థానంలో (టీటీడీ) జేఈవోగా పనిచేశారు. ఆయనకు ఉన్న అనుభవం, పరిపాలనా పరిజ్ఞానం, ప్రజా సంబంధాల నిర్వహణలో నైపుణ్యం ఈ నియామకానికి ప్రధాన కారణమని తెలుస్తోంది.
శాంతి కుమారికి రెండో ఇన్నింగ్స్
తెలంగాణ రాష్ట్ర ప్రధాన కార్యదర్శిగా (CS) ఇటీవల పదవీ విరమణ పొందిన శాంతి కుమారికి ప్రభుత్వం మరో కీలక బాధ్యతను అప్పగించింది. ఆమెను మర్రి చెన్నారెడ్డి మానవ వనరుల అభివృద్ధి సంస్థ (MCRHRD) వైస్ చైర్పర్సన్గా నియమించడమే కాకుండా, డైరెక్టర్ జనరల్ (DG) బాధ్యతల్ని కూడా అప్పగించింది. ఇది ఆమెకు రెండో ఇన్నింగ్స్గా భావించవచ్చు. పాలనలో ఆమె అనుభవాన్ని రాష్ట్రం కోసం వినియోగించాలన్న ఉద్దేశంతోనే ఈ నిర్ణయం తీసుకున్నట్టు అధికారులు చెబుతున్నారు. శాంతి కుమారి పదవీ విరమణ అనంతరం కె. రామకృష్ణారావును రాష్ట్ర ప్రధాన కార్యదర్శిగా నియమించారు. అలాగే, ఐపీఎస్ అధికారి షానవాజ్ ఖాసీంను సీఎం కార్యాలయ కార్యదర్శిగా నియమిస్తూ మరో ఉత్తర్వు జారీ అయ్యింది. ఇది ప్రభుత్వం పాలనను మరింత సమర్థవంతంగా ముందుకు తీసుకెళ్లే దిశగా ఒక మార్గం.
మలాసన్ రెడ్డికి నిఘా విభాగంలో కీలక హోదా
పదవీ విరమణ పొందిన సీనియర్ ఐపీఎస్ అధికారి వి.బి. కమలాసన్ రెడ్డిను రాష్ట్ర నిఘా భద్రత విభాగం ప్రత్యేకాధికారి (OSD)గా ప్రభుత్వం పునర్నియమించింది. ఆయన ఈ పదవిలో కూడా రెండేళ్లపాటు కొనసాగనున్నారు. అంతేకాకుండా, ఇంటిగ్రేటెడ్ పోలీస్ కమాండ్ కంట్రోల్ సెంటర్ డైరెక్టర్గా కూడా అదనపు బాధ్యతలు అప్పగించారు. గతంలో ఆయనే ఔషధ నియంత్రణ విభాగం డీజీగా, ఆబ్కారీ శాఖ సంచాలకుడిగా సేవలందించారు. ఆయన అనుభవం నిఘా, భద్రత రంగాల్లో ప్రభుత్వానికి ఉపయోగపడనుంది.
ఇటీవలే సీజీజీ డైరెక్టర్ జనరల్గా నియమితులైన సీనియర్ ఐఏఎస్ అధికారి శశాంక్ గోయల్ను ఢిల్లీలోని తెలంగాణ భవన్ ప్రత్యేక సీఎస్గా నియమించారు. ఇది కేంద్ర ప్రభుత్వంతో సంబంధాలు మెరుగుపర్చేందుకు, ఢిల్లీలోని అధికార వ్యవస్థలో రాష్ట్రానికి ప్రతినిధిగా పనిచేసే కీలక పదవిగా భావించవచ్చు.
Read also: Mayday : మేడే శుభాకాంక్షలు- సీఎం రేవంత్
