తెలంగాణ (Telangana) లో ఇటీవల అనూహ్యంగా కురిసిన భారీ వర్షాలు ప్రజల జీవితాలను అస్తవ్యస్తం చేశాయి. ముఖ్యంగా కామారెడ్డి, మెదక్ జిల్లాల్లో మంగళవారం రాత్రి నుంచి బుధవారం వరకూ కుండపోత వర్షాలు (Torrential rains) విరుచుకుపడ్డాయి. కొన్ని గంటల వ్యవధిలోనే 40 సెంటీమీటర్లకు పైగా వర్షం పడటంతో పలు ప్రాంతాలు పూర్తిగా నీటమునిగిపోయాయి.బుధవారం ఉదయం 8:30 నుంచి సాయంత్రం 5 గంటల మధ్య కామారెడ్డి జిల్లా రాజంపేటలో 41.83 సెంటీమీటర్ల వర్షపాతం నమోదైంది. అదే జిల్లాలోని కామారెడ్డి పట్టణంలో 28 సెం.మీ., భిక్నూర్లో 23.8 సెం.మీ. వర్షం కురిసింది. మెదక్ జిల్లా హవేలిఘన్పూర్లో 26.13 సెం.మీ. వర్షం పడింది. 24 గంటల్లో ఈ రెండు జిల్లాల్లో 30 సెం.మీ.కు పైగా వర్షం నమోదైందని విపత్తు నిర్వహణ శాఖ తెలిపింది.
జనజీవనం స్తంభించిపోయింది
వాన ధాటికి వాగులు, చెరువులు పొంగిపొర్లాయి. వీటి నీరు ఊళ్లల్లోకి ప్రవహించడంతో ప్రజలు ఇళ్లలోనే ముట్టడి చెందారు. ముఖ్యంగా హైదరాబాద్–నిజామాబాద్ మధ్య రవాణా పూర్తిగా నిలిచిపోయింది. నర్సింగి వద్ద 44వ నంబరు జాతీయ రహదారిపై వరద నీరు ప్రవహించడంతో వాహనాల రాకపోకలు ఆగిపోయాయి. వందలాది వాహనాలు నిలిచిపోయాయి. ప్రయాణికులు తీవ్ర ఇబ్బందులు పడ్డారు.హైదరాబాద్ డివిజన్ పరిధిలోని భిక్నూర్–తల్మడ్ల, ఆకన్పేట–మెదక్ సెక్షన్ల మధ్య రైలు మార్గాలు నీటమునిగాయి. దక్షిణ మధ్య రైల్వే పలు రైళ్లను రద్దు చేసింది. మరికొన్నింటిని పాక్షికంగా రద్దు చేసి, దారిమళ్లించింది.
విషాద ఘటనలు కలచివేశాయి
కామారెడ్డిలో ఓ ఇంటి గోడ కూలి వైద్యుడు మృతి చెందారు. రాజన్న సిరిసిల్ల జిల్లా గంభీరావుపేట సమీపంలో ఐదుగురు వరదల్లో చిక్కుకోగా, ఒక రైతు గల్లంతయ్యారు. కేంద్ర మంత్రి బండి సంజయ్ వీరిలో ఒకరితో మాట్లాడి సహాయం హామీ ఇచ్చారు.కలెక్టర్ సందీప్ కుమార్ ఝా, ఎస్పీ మహేష్ బి. గీతే పర్యవేక్షణలో డ్రోన్ల సాయంతో బాధితులకు ఆహారం, నిత్యవసరాలు అందించారు. ఎస్డీఆర్ఎఫ్ బృందాలు మరింత వేగంగా సహాయక చర్యలు చేపట్టాయి. నక్కవాగులో కొట్టుకుపోయిన కారులోని ప్రయాణికుడు సురక్షితంగా బయటపడ్డాడు.
ప్రభుత్వం అప్రమత్తం
పరిస్థితి తీవ్రతను గుర్తించిన సీఎం రేవంత్ రెడ్డి సమీక్ష నిర్వహించారు. అధికారులకు స్పష్టమైన ఆదేశాలు జారీ చేశారు. అదనపు ఎస్డీఆర్ఎఫ్ బృందాలను జిల్లాలకు పంపారు. మంత్రులు, సీఎస్ కలెక్టర్లతో టెలికాన్ఫరెన్స్ నిర్వహించారు.నాగిరెడ్డిపేట మండలంలోని పోచారం జలాశయం 8 అడుగుల ఎత్తు నీటితో పొంగిపొర్లుతోంది. 1.30 లక్షల క్యూసెక్కుల నీరు విడుదల కావడంతో అధికారులు సమీప గ్రామాలకు హెచ్చరికలు జారీ చేశారు.
Read Also :
