తెలంగాణ ప్రభుత్వం రాష్ట్ర భద్రతలో కీలక పాత్ర పోషిస్తున్న తెలంగాణ ప్రత్యేక రక్షణ దళం (TGSPF) సిబ్బంది సంక్షేమం కోసం ఒక చారిత్రాత్మక నిర్ణయం తీసుకుంది. సివిల్ పోలీసులతో సమానంగా టీజీఎస్పీఎఫ్ సిబ్బందికి కూడా ‘పోలీస్ శాలరీ ప్యాకేజీ’ (PSP) వర్తింపజేయాలని నిశ్చయించింది. ఇందులో భాగంగా శనివారం సికింద్రాబాద్లోని బుద్ధ భవన్లో స్టేట్ బ్యాంక్ ఆఫ్ ఇండియా (SBI) మరియు టీజీఎస్పీఎఫ్ అధికారుల మధ్య అవగాహన ఒప్పందం (MoU) కుదిరింది. ఈ ఒప్పందం ద్వారా క్షేత్రస్థాయిలో విధులు నిర్వర్తించే సిబ్బందికి సామాజిక భద్రతతో పాటు ఆర్థిక భరోసా లభించనుంది.
AP: పన్నులు కట్టినంత మాత్రాన యజమానులు కాలేరు: HC
ఈ నూతన శాలరీ ప్యాకేజీలో అత్యంత ప్రధానమైన అంశం భారీ బీమా సౌకర్యం. విధి నిర్వహణలో లేదా ప్రమాదవశాత్తూ సిబ్బంది ప్రాణాలు కోల్పోతే వారి కుటుంబాలకు కోటి రూపాయల వ్యక్తిగత ప్రమాద బీమా అందుతుంది. ఒకవేళ అది విమాన ప్రమాదం అయితే ఆ మొత్తం రూ. 1.60 కోట్లకు పెరుగుతుంది. శాశ్వత వైకల్యం సంభవించిన వారికి రూ. 80 లక్షల వరకు పరిహారం అందజేస్తారు. కేవలం సిబ్బందికే కాకుండా వారి పిల్లల భవిష్యత్తుకు కూడా ప్రభుత్వం భరోసా ఇచ్చింది. మరణించిన సిబ్బంది పిల్లల ఉన్నత విద్య కోసం రూ. 28 లక్షలు, అలాగే ఇద్దరు కుమార్తెల పెళ్లి ఖర్చుల కోసం రూ. 10 లక్షల వరకు (ఒక్కొక్కరికి 5 లక్షలు) ఆర్థిక సాయం అందించేలా ఒప్పందం కుదుర్చుకున్నారు.
వైద్య ఖర్చులకు సంబంధించి కూడా ఈ ప్యాకేజీలో అద్భుతమైన వెసులుబాట్లు కల్పించారు. ప్రమాదాల్లో తీవ్రంగా గాయపడి ప్లాస్టిక్ సర్జరీ అవసరమైతే రూ. 10 లక్షలు, విదేశీ మందుల రవాణాకు రూ. 5 లక్షలు, ఎయిర్ అంబులెన్స్ సేవలకు రూ. 10 లక్షల వరకు బీమా కవరేజీ ఉంటుంది. అంతేకాకుండా, ప్రమాదం తర్వాత 48 గంటలకు పైగా కోమాలో ఉండి మరణించిన పక్షంలో అదనంగా రూ. 5 లక్షల పరిహారం అందుతుంది. ఈ ప్రయోజనాలతో పాటు తక్కువ వడ్డీకే రుణాలు, లాకర్ అద్దెలో రాయితీలు మరియు ప్లాటినం రూపే డెబిట్ కార్డు వంటి బ్యాంకింగ్ సౌకర్యాలు కూడా సిబ్బందికి లభించనున్నాయి. ప్రభుత్వ తీసుకున్న ఈ నిర్ణయం టీజీఎస్పీఎఫ్ కుటుంబాల్లో కొత్త వెలుగులు నింపుతోంది.
Read hindi news: hindi.vaartha.com
Read Also Epaper : epaper.vaartha.com