తెలంగాణలో నిరుద్యోగ యువతకు శుభవార్త! గతంలో నిలిచిపోయిన ఉద్యోగ నియామక ప్రక్రియలు మళ్లీ ప్రారంభమయ్యే దిశగా ప్రభుత్వం కసరత్తు చేస్తోంది. ఎస్సీ వర్గీకరణ చట్టంపై స్పష్టత రావడంతో, నియామక ప్రక్రియలు వేగంగా ముందుకు సాగనున్నాయి.
నియామక ప్రక్రియలు మళ్లీ ప్రారంభం
2024 అక్టోబర్లో ఎస్సీ ఉపవర్గీకరణ చట్టంపై స్పష్టత కోసం ప్రభుత్వం ఉద్యోగ నియామక ప్రక్రియలను తాత్కాలికంగా నిలిపివేసింది. ఇప్పుడు సుప్రీంకోర్టు తీర్పు అనంతరం, తెలంగాణ ప్రభుత్వం ఈ చట్టాన్ని అమలు చేస్తూ, ఉద్యోగ నియామక ప్రక్రియలను మళ్లీ ప్రారంభించేందుకు సిద్ధమవుతోంది . తెలంగాణ ప్రభుత్వం, దేశంలో తొలిసారిగా, ఎస్సీ వర్గీకరణ చట్టాన్ని అమలు చేసింది. ఈ చట్టం ప్రకారం, 59 ఎస్సీ కులాలను మూడు గ్రూపులుగా విభజించి, 15% రిజర్వేషన్లను సముచితంగా పంచుతుంది . మొత్తం 20 నోటిఫికేషన్లను జారీ చేసి, విభిన్న శాఖల్లో నియామకాలు చేపట్టాలని లక్ష్యంగా పెట్టుకుంది.
కొత్త నోటిఫికేషన్లు విడుదలకు సిద్ధం
ఈ నెలాఖరులోగా తొలి విడతగా రెండు పెద్ద నోటిఫికేషన్లు విడుదలయ్యే అవకాశం ఉంది. మహిళా, శిశు సంక్షేమ శాఖలో 14,236 అంగన్వాడీ ఉద్యోగాలు, హెల్త్ డిపార్టుమెంట్లో 4 వేలకు పైగా పోస్టుల కోసం నోటిఫికేషన్లు విడుదల చేయాలని ప్రభుత్వం భావిస్తోంది. ఆర్టీసీలో మూడు వేలకుపైగా పోస్టులకు ఇప్పటికే అనుమతి లభించిందని ఆర్టీసీ ఎండీ సజ్జనార్ వెల్లడించారు. ఈ మూడు విభాగాలనూ మొదటి విడతలో పూర్తి చేసి యువతకు కొలువులు కల్పించేందుకు ప్రభుత్వం ప్రాధాన్యం ఇస్తోంది. గతంలో విడుదల చేసిన జాబ్ క్యాలెండర్ను ప్రభుత్వం రీషెడ్యూల్ చేయాలని భావిస్తోంది. ప్రధానంగా, పోలీస్, గ్రూప్-2, గ్రూప్-3, ఫారెస్ట్ బీట్ ఆఫీసర్, గురుకుల, సింగరేణి కాలరీస్, ఇంజినీరింగ్ విభాగాల్లో నియామకాలు త్వరలోనే ప్రకటించే అవకాశం ఉంది. ప్రతీ పరీక్ష నిర్వహణకు అటు అఖిల భారత పరీక్షల షెడ్యూల్, ఇటు రాష్ట్రంలోని ఇతర పరీక్షల సమయాన్ని పరిగణనలోకి తీసుకుని షెడ్యూల్ ఖరారు చేయాలి. అందుకే మంత్రుల బృందం ఈ విషయంపై ప్రత్యేకంగా సమీక్షించి స్పష్టత ఇవ్వనుంది. ఎప్పుడు ఏ నోటిఫికేషన్ విడుదల చేయాలి? ఏ పరీక్ష ఎప్పుడు నిర్వహించాలి? అన్న దానిపై త్వరలోనే ప్రభుత్వ నిర్ణయం వెలువడనుంది. ఈసారి విడుదలయ్యే నోటిఫికేషన్లలో ఎస్సీ వర్గీకరణ చట్టానికి అనుగుణంగా రిజర్వేషన్ను అమలు చేయనున్నారు. కొత్తగా రూపొందించబోయే రోస్టర్ ప్రకారం ప్రతి విభాగానికి న్యాయం చేయాలని ప్రభుత్వం నిర్ణయించింది. కొనసాగుతున్న నిరుద్యోగ సమస్యల మధ్య, ఈ ప్రకటనలు రాష్ట్ర యువతకు శుభవార్తగా మారనున్నాయి. నెలల తరబడి ఎదురు చూస్తున్న యువతకు త్వరలోనే కొత్త ఉద్యోగ అవకాశాలు లభించనున్నాయి.
Read also: CLP Meeting : నేడు కాంగ్రెస్ శాసన సభాపక్ష సమావేశం