Teenmar Mallanna: కేబీఆర్ పార్క్ పేరు మార్చాలంటూ తీన్మార్

తెలంగాణ ఎమ్మెల్సీ తీన్మార్ మల్లన్న (Teenmar Mallanna) మరోసారి వార్తల్లోకెక్కారు. హైదరాబాద్‌ నగరంలోని ప్రముఖ పర్యావరణ పార్క్ కేబీఆర్ పార్క్ (Kasu Brahmananda Reddy National Park) పేరును వెంటనే మార్చాలని ఆయన అధికార పార్టీ కాంగ్రెస్ ప్రభుత్వాన్ని గట్టిగా డిమాండ్ చేశారు. శనివారం బీసీ నాయకులతో కలిసి పార్క్ వద్ద నిరసన ప్రదర్శన నిర్వహించిన మల్లన్న, ఈ సందర్భంగా మీడియాతో సంచలన వ్యాఖ్యలు చేశారు.

కాసు బ్రహ్మానందరెడ్డి పేరు తొలగించాలి – జయశంకర్ పేరు పెట్టాలి

తీన్మార్ మల్లన్న మాట్లాడుతూ- ప్రస్తుతమున్న కాసు బ్రహ్మానందరెడ్డి పేరును తొలగించి, తెలంగాణ సిద్ధాంతకర్త ప్రొఫెసర్ జయశంకర్ పేరు పెట్టాలని డిమాండ్ చేశారు. “కేబీఆర్ పార్క్ పేరును వెంటనే తొలగించి ప్రొఫెసర్ జయశంకర్ పేరు పెట్టాలి. ఒకవేళ ప్రస్తుత కాంగ్రెస్ ప్రభుత్వం ఈ చర్యలు చేపట్టకపోతే, ఆ పని మేమే పూర్తి చేస్తాం” అని స్పష్టం చేశారు. అంతేకాకుండా, కేబీఆర్ పార్క్ ముందు ప్రొఫెసర్ జయశంకర్ విగ్రహాన్ని కూడా ఏర్పాటు చేయాలని ఆయన కోరారు.

“ఇది బీసీల గౌరవ సమస్య” అని మల్లన్న స్పష్టం

తీన్మార్ మల్లన్న శనివారం కేబీఆర్ పార్క్ వద్ద కొందరు బీసీ నాయకులతో కలిసి ఆయన నిరసన వ్యక్తం చేశారు. భవిష్యత్తులో బీసీ ప్రభుత్వం ఏర్పడిన తర్వాత కాసు బ్రహ్మానందరెడ్డి విగ్రహాన్ని జేసీబీల సాయంతో పెకలించివేసి, ఆ స్థానంలో ప్రొఫెసర్ జయశంకర్ విగ్రహాన్ని ప్రతిష్ఠిస్తామని తీన్మార్ మల్లన్న హెచ్చరించారు.

అన్ని పార్కులు, ఆసుపత్రులు, కూడళ్ల పేర్లను మార్చాలన్న డిమాండ్

తీన్మార్ మల్లన్న తన డిమాండ్‌ను కేవలం కేబీఆర్ పార్క్‌కు మాత్రమే పరిమితం చేయలేదు.
ఆయన అభిప్రాయం ప్రకారం కేవలం కేబీఆర్ పార్క్ మాత్రమే కాకుండా, హైదరాబాద్ నగరంలోని అన్ని పార్కులకు తెలంగాణ ఉద్యమంలో కీలకపాత్ర పోషించిన వారి పేర్లను పెట్టాలని ఆయన డిమాండ్ చేశారు. దీంతోపాటు, నగరంలోని ఆసుపత్రులు, హోటళ్లు, వివిధ ప్రాంతాల పేర్లను కూడా తెలంగాణ మహనీయుల పేర్లతో మార్చాలని తీన్మార్ మల్లన్న ప్రభుత్వానికి విజ్ఞప్తి చేశారు.