తెలంగాణ ముఖ్యమంత్రి రేవంత్ రెడ్డి మీడియా సంస్థలను ఉద్దేశించి ఘాటైన వ్యాఖ్యలు చేశారు. తమ మంత్రుల ప్రతిష్ఠను దెబ్బతీసేలా కథనాలు ప్రచురించవద్దని స్పష్టంగా హెచ్చరించారు. మీడియా సంస్థల మధ్య విభేదాలుంటే వాటిని పరస్పరం తేల్చుకోవాలని, కానీ ప్రభుత్వ మంత్రుల జోలికి మాత్రం రావొద్దని తేల్చిచెప్పారు. ఏదైనా వార్త రాసేముందు తన వద్ద నుంచి వివరణ తీసుకోవాలని సూచించారు. తప్పుడు కథనాలు వెలువడితే అది తన గౌరవాన్ని కూడా దెబ్బతీసినట్టేనని సీఎం పేర్కొన్నారు.
Read also: Ward Reservations: నారాయణఖేడ్ మున్సిపాలిటీ వార్డుల రిజర్వేషన్లు ఖరారు
CM Revanth Reddy issues a strong warning to the media
ఖమ్మం పర్యటనలో కీలక ప్రకటనలు
ఖమ్మం జిల్లా ఏదులాపురంలో నిర్వహించిన బహిరంగ సభలో సీఎం రేవంత్ రెడ్డి ఈ వ్యాఖ్యలు చేశారు. ఈ సందర్భంగా జిల్లాలో రూ.362 కోట్ల విలువైన అభివృద్ధి పనులకు శంకుస్థాపన చేశారు. ఖమ్మం నుంచే తన రాజకీయ ప్రస్థానం ప్రారంభమైందని గుర్తు చేసిన సీఎం, ఈ జిల్లాను అన్ని రంగాల్లో ముందుకు తీసుకెళ్లడమే ప్రభుత్వ లక్ష్యమని తెలిపారు. ప్రజలకు అవసరమైన మౌలిక సదుపాయాలపై ప్రత్యేక దృష్టి పెట్టామని స్పష్టం చేశారు.
సింగరేణి టెండర్లపై ఆరోపణలకు ఖండన
సింగరేణి (singareni) బొగ్గు గనుల టెండర్ల విషయంలో అవినీతి జరిగిందంటూ వస్తున్న కథనాలను సీఎం తీవ్రంగా ఖండించారు. అనుభవం ఉన్న సంస్థలకే టెండర్లు కేటాయిస్తున్నామని, ఇందులో ఎలాంటి అవకతవకలకు అవకాశం లేదని స్పష్టం చేశారు. గత రెండేళ్ల పాలనలో ఒక్క రూపాయి అవినీతి కూడా జరగలేదని ధీమా వ్యక్తం చేశారు. తప్పుడు ప్రచారాలతో ప్రభుత్వాన్ని బద్నాం చేయవద్దని మీడియాకు హితవు పలికారు.
బీఆర్ఎస్ ప్రభుత్వంపై తీవ్ర విమర్శలు
గత బీఆర్ఎస్ ప్రభుత్వాన్ని విమర్శిస్తూ, అప్పట్లో రేషన్ కార్డు పొందాలంటే ఎవరో ఒకరు చనిపోవాల్సిన పరిస్థితి ఉండేదని సీఎం వ్యాఖ్యానించారు. తమ కాంగ్రెస్ ప్రభుత్వం లక్షలాది మందికి కొత్త రేషన్ కార్డులు జారీ చేసిందని తెలిపారు. ఎన్టీఆర్ ప్రవేశపెట్టిన రూ.2కే కిలో బియ్యం పథకాన్ని గుర్తు చేస్తూ, తమ ప్రభుత్వం ఉచితంగా సన్నబియ్యం అందిస్తోందన్నారు. అలాగే వైఎస్ఆర్ స్ఫూర్తితో 200 యూనిట్ల వరకు ఉచిత విద్యుత్ ఇస్తున్నామని చెప్పారు. పేదలకు 4.50 లక్షల ఇందిరమ్మ ఇళ్లను కేటాయించినట్లు వెల్లడించారు.
భద్రాచలం అభివృద్ధిపై సీఎం హామీ
భద్రాచలం అభివృద్ధిపై మాట్లాడిన సీఎం రేవంత్ రెడ్డి, గత ప్రభుత్వం ఇచ్చిన హామీలను నెరవేర్చలేదని విమర్శించారు. తమ ప్రభుత్వం భూసేకరణ పూర్తి చేసి భద్రాచలాన్ని అయోధ్య తరహాలో అభివృద్ధి చేస్తుందని హామీ ఇచ్చారు. మంత్రులంతా సమన్వయంతో పనిచేస్తున్నారని, రాబోయే పదేళ్లు కాంగ్రెస్ ప్రభుత్వమే అధికారంలో ఉంటుందని ధీమా వ్యక్తం చేశారు. తెలంగాణను దేశంలోనే నంబర్ వన్ రాష్ట్రంగా తీర్చిదిద్దడమే తమ లక్ష్యమని స్పష్టం చేశారు.
Read hindi news: hindi.vaartha.com
Epaper: epaper.vaartha.com
Read Also: