Revanth Reddy : రేవంత్ స్పీచ్ ను బీఆర్ఎస్ ఎమ్మెల్యేల వాకౌట్ తెలంగాణ అసెంబ్లీలో మరోసారి రాజకీయ వేడి పెరిగింది. సీఎం రేవంత్ రెడ్డి చేసిన వ్యాఖ్యలపై బీఆర్ఎస్ నేతలు తీవ్ర ఆగ్రహం వ్యక్తం చేశారు. ముఖ్యంగా, బీఆర్ఎస్ అధినేత కేసీఆర్ గురించి సీఎం చేసిన వ్యాఖ్యలను తప్పుబడుతూ, బీఆర్ఎస్ ఎమ్మెల్యేలు సభను బహిష్కరించారు.
కేసీఆర్ చావును కోరుకున్న రేవంత్
అసెంబ్లీ సమావేశాల్లో ముఖ్యమంత్రి రేవంత్ రెడ్డి మాట్లాడినప్పుడు బీఆర్ఎస్ నేతలు ఆయన వ్యాఖ్యలకు తీవ్ర అభ్యంతరం వ్యక్తం చేశారు. మాజీ సీఎం కేసీఆర్ను మార్చురీకి పంపిస్తామని చేసిన వ్యాఖ్యలు పూర్తిగా అనుచితమని, రాజకీయ చౌకబారు మాటలు ఉపయోగించడం సముచితం కాదని ఆరోపించారు. ఈ కారణంగా, బీఆర్ఎస్ సభ్యులు ఆగ్రహంతో సభను వాకౌట్ చేశారు. వాకౌట్ అనంతరం బీఆర్ఎస్ సీనియర్ నేత, మాజీ మంత్రి హరీశ్ రావు మీడియాతో మాట్లాడుతూ తీవ్ర స్థాయిలో స్పందించారు. “తెలంగాణ కోసం ప్రాణాలను పణంగా పెట్టిన కేసీఆర్ చావు కోరుకోవడం రాజకీయ దిగజారుడుతనం. ఇది రాజకీయ వ్యతిరేకత కాదు, వ్యక్తిగత ద్వేషంగా మారింది” అని ఆగ్రహం వ్యక్తం చేశారు.అసెంబ్లీలో మంత్రి ఉత్తమ్ కుమార్ రెడ్డి చేసిన వ్యాఖ్యలు పూర్తిగా అబద్ధాలని హరీశ్ రావు పేర్కొన్నారు. ప్రత్యేకంగా, తెలంగాణకు కృష్ణా నదీ జలాల్లో జరిగిన అన్యాయానికి కాంగ్రెస్ పార్టీనే కారణమని ఆరోపించారు.
చంద్రబాబు-కాంగ్రెస్ నాయకుల భేటీపై వివాదం
ఇటీవల ఏపీ సీఎం చంద్రబాబును ఉత్తమ్ కుమార్ రెడ్డి దంపతులు కలిశారని, ఆయనతో కలిసి భోజనం చేశారని హరీశ్ రావు సంచలన వ్యాఖ్యలు చేశారు. ఇది కాంగ్రెస్ పార్టీ అసలు మతలబు ఏమిటో ప్రజలకు అర్థమయ్యేలా చేస్తుందని పేర్కొన్నారు. ఈ పరిణామాలతో తెలంగాణ అసెంబ్లీలో రాజకీయ వేడి మరింత పెరిగే సూచనలు కనిపిస్తున్నాయి. ముఖ్యంగా, బీఆర్ఎస్-కాంగ్రెస్ మధ్య మాటల యుద్ధం కాస్తా తీవ్ర రాజకీయ పోరుగా మారే అవకాశం ఉంది.